Oops! This image does not follow our content guidelines. To continue publishing, please remove it or upload a different image.
==========================
Бид энэ хөлөг дээр ирээд сар гаран боллоо. Энэ хугацаанд өөрсдийн хувийн мэдээллээс бусад бараг л бүх зүйлийг санасан гэж хэлж болно.
Ямар ч байсан эд юмсын нэршил, хэрэглээ, зориулалт дээр лав эргэлзэж, мартаж санах асуудалгүй болсон. Солиотой ч гэсэн өөрсдийн эх гариг болох Дэлхийгээ мартсан байсандаа одоо ч итгэж чадахгүй юм. Азаар одоо бид энэ бүхнийг санаж байгаа.
Бидний хичээгээд ч санаж чадахгүй байгаа ганцхан зүйл бол хувийн мэдээлэл буюу дэлхий дээрх амьдралаа санахгүй байгаа нь. Дэлхий дээр ямар ямар улс орон байдаг, ямар хэлээр ярьдаг, байгаль орчин, хот суурин гээд л бүгдийг санаад байгаа хэрнээ өөрийнхөө тухай л санахгүй байх нь жаахан бухимдмаар. . .
==========
Ямар ч байсан анх ирж байснаа бодвол энэ хөлөгт бүрэн дасаж бас өөрсдийн хийж байгаа ажилдаа ч бүрэн дассан гэж хэлж болно.
Энэ хөлөг хүмүүс бидний төсөөлж чадах хурднаас ч илүү хурдан аялах чадалтай онцгой хөлөг. Бас галактик гэдэг ямар том зах хязгааргүй ертөнц вэ гэдгийг ч биеэр мэдэрч байна. Үүгээр ч зогсохгүй харь гаригийн амьд биет байдаг байх гэж харанхуй таамаглалтай амьдардаг дэлхийн хүмүүс бидний хувьд төсөөлөлд багтамгүй олон гариг, олон янзын амьд бөгөөд оюун ухаант биет байдаг гэдгийг мэдэж авсан.
Зарим нь яг л бидэн шиг харагддаг ч онцгой хүч чадалтай, эд эрхтнүүд нь өөр зориулалтаар ажилладаг байх жишээний. Зарим нь бол яг л амьтан шиг харагддаг хэрнээ оюун ухаант хүний төрөлд ордог байх нь ч бий. Мэдээж хэрэг хүмүүс бидний төсөөлдөг шиг цэнхэр, ногоон, улаан, ягаан янз бүрийн арьстай нь ч байгаа.
Зүгээр л уран зөгнөлт кино руу яваад орсон мэт гайхалтай амьдралыг сүүлийн нэг сард мэдэрч байна.
Энэ хөлгийн гол зорилго бол эрчүүдийн жирэмслээд байгаа нууцыг олох юм байна лээ. Ганцхан манай дэлхийд ч бус бусад гаригуудад ч бас ийм явдал тохиогоод байгаа тул үүний нууцыг тайлах нь бидний гол зорилго. Гэвч үүнийхээ хажуугаар хамгаалалт багатай жижиг гаригууд дээр гарч байгаа гэмт хэрэг, гаднын халдлага, өөр гаригийн довтолгоо, дээрэмчдээс хамгаалах, аврах ажиллагааг ч бас хийдэг.
