[ Unicode ]
လမ်းကြားလေးထဲက အခြေအနေဟာ စိုးရိမ်စိတ်တွေ ၊ မသင်္ကာမှုတွေနဲ့ ရောယှက်နေတယ်။
" ထွက်ပြေးဖို့ မကြိုးစားနဲ့ ၊ ငါတောင် စားစရာလေးတစ်ခု ခိုးမိလို့ အမိအရ လိုက်ဖမ်းခံထားရတာ ၊ ဒီပုလိပ်က မခေသူပဲ "
ထွက်ပြေးမယ် လုပ်ထားတဲ့ မြင်းလှည်းဆရာဟာ ကြိုးတုတ်ခံထားရတဲ့ ထယ်ဟျောင်း စကားကြောင့် တွန့်ဆုတ်သွားတယ်။ နဖူးပြင် တစ်ဝိုက်မှာ နီရဲနေတဲ့ဟာလည်း အဲ့ဒီပုလိပ်ရဲ့ လက်ချက်ပဲ ဖြစ်ရမယ်လို့ မြင်းလှည်းဆရာ ခပ်စိပ်စိပ် တွေးတယ်။ ဗြာများနေတဲ့ မြင်းလှည်းဆရာရဲ့ နောက်ကွယ်မှာ သူတို့အစီအစဉ် အောင်မြင်လို့ တိတ်တဆိတ် အောင်ပွဲခံနေတဲ့ လူနှစ်ယောက်ရှိတယ်။
" မြန်မြန် ဖြေစမ်းပါ ၊ မဟုတ်မှ စခန်းကို ကိုယ်တိုင်သွားပြီး ပြောချင်တာလား ၊ အဲ့လိုဆိုလည်း ရတယ်နော် ငါ့မှာလက်ထိပ်ပါသေးတယ် ၊ ခြောက်တာတော့ မဟုတ်ဘူး သေနတ်လည်းပါတယ် "
စာအိတ်တွေ ထည့်ထားတဲ့ ချည်အိတ်ထဲ မွှေနှောက်ပြကာ သူ့ရဲ့ဇာတ်ကောင်ကို အပီအပြင် သရုပ်ဆောင်နေတဲ့ ဂျောင်ဂုအား ထယ်ဟျောင်း ဂုဏ်ယူစွာနဲ့ ကြည့်နေတယ်။ ဒီကောင်ကလေး မလုပ်တတ်တာ ဘာကျန်သေးလဲ ဆိုတာပါ ထပ်လောင်း တွေးလိုက်သေးတယ်။ မြင်းလှည်းဆရာဟာ တစ်ခါမှ ပြစ်မှုမကြူးလွန်ထားခဲ့ရာ ဒီနေ့မှ တွေ့ဖူးတဲ့ ခရီးသည်အတွက်နဲ့ စခန်းအထိ သွားဖို့ရာ မထိုက်တန်ဘူးဆိုတာ အသိတရားရလိုက်လို့ ဖြစ်ကြောင်းကုန်စင်ကို ရှင်းပြတယ်။
ဂျောင်ဂုတို့ ထင်ထားတဲ့ အတိုင်းပင် အဲ့ဒီ ခန္ဓာကိုယ် ခပ်တောင့်တောင့်နဲ့ လူကြီးဟာ အိမ်ရာမဲ့ကလေးတွေကို ခေါ်သွားပြီး ရောင်းဝယ်ရေး လုပ်နေသူဖြစ်တယ်။ အိမ်ရာမဲ့ကလေးတွေ ပျောက်သွားရင် တိုင်ကြားချက် ပို့မယ့်သူတွေ ရှားသလို ၊ အဓိကထားပြီး ရှာဖွေပေးမယ့် ပုလိပ်တွေကလည်း မရှိသလောက်ပါပဲ။
ကလေးတစ်စုကို လူစိမ်းတစ်ယောက်နဲ့ တွေ့တဲ့အခါ နောက်ဆက်တွဲတွေ မဖြစ်ရအောင် အဲ့ဒီလူဟာ မြင်းလှည်းဆရာအား နှုတ်ပိတ်ခပေးပြီး သူတို့ရဲ့ တည်နေရာကို ပို့ခိုင်းပေးတယ်။ နောက်ပြီးမြင်းလှည်းဆရာအား လက်စတုံးဖို့ အကြမ်းဖက်ခဲ့ပေမယ့် သူဟာ တစ်ကောင်ကြွက်သမား ဖြစ်တာကြောင့် နှုတ်လှုံပြီး သူ့ကိုပေးထားတဲ့ အဖိုးအခတွေထဲက တစ်ဝက်ကိုသာ ယူ၍ ပြန်ပေးခဲ့လို့ အသက်ရှင်နေတာဖြစ်တယ်။
