#خلف_قناع_الطموح
#من_تأليفي_Macilia_ch
الحلقة 0️⃣2️⃣: 《 فوضى عارمة 》
طلال : لا منعرفكش أول مرة نشوفك
دنيا: تتمسخر مش هك!!
طلال: إذا معندكش شي تقوليه متضعيليش وقتي مخصنيش ناس مهبولة تخسرلي نهاري
جاء يمشي زربت مدت يدها شداتو من مرفقو تحكي بالزربة
دنيا: انا صحفية و مذيعة أخبار .. حابك تعمل معايا لقاء صحفي
نزل عينو بالشوية يخزر ليدها لي حاكمة مرفقو ...هز يدو الثانية يبعد فيدها عليه ...حط عينو فعينها يخزرلها لثواني وهي بدورها قعدت مزروعة فبلاصتها ما حبت تتحرك
قلب عيونو منها و جاء رايح بلا ما يجاوبها ...جن جنونها من برودو و تعاملو معاها
دنيا: على الأقل جاوبني متخلينيش معلقة كي الحطبة
حبس فبلاصتو شادد على قبضة يدو ...كبس على فكو من الغش و تلفت لعندها يحكي ببرود
طلال: همجيتك و اسلوبك هذا منظنش يليق بوحدة عندها مهنة تتطلب الكفاءة و الخبرة ما عدا إذا توسطولك ليها
خرجو عيونها من كلامو ....ضحكت باستهزاء تحكي
دنيا: كيفاه تتجرأ !! قول من الأول مش حاب تعمل اللقاء بلا لف و دوران الظاهر عندك ضغينة ضدي ...ما معلوم مكانش حد ميعرفنيش و أكيد تغزلت لأني معروفة و ناجحة فمسيرتي و نتا من الناس لي متحبش تشوف ناس أنجح منك
شاف فيها من فوق لتحت و مشى بلا ما يجاوبها
قعدت واقفة فبلاصتها مدة تستوعب حركتو و النقاش لي دار بينهم ....خذات نفس طويل تحاول تهدي روحها ...صرت على سنانها تحكي بتوعد
دنيا: هك مالا سي طلال راح ندمك على النهار لي خممت تتجاهلني فيه ...واش حاسب روحو هذا ...جح.ش
رمات شعرها ورا ظهرها و مشات تتمختر كأنو ما صرا والو.....خرجت من الأوتال و ركبت فطوموها متوجهة لمقر القناة متحلفة فطلال ...في طريقها كومبوزات رقم رؤيا مساعدتها ...غير حلت الخط نطقت بالزربة
دنيا: رؤيا نسحقك تجيبيلي حاجة ضد ذاك المتخ.لف
رؤيا: شكون قصدك !
دنيا: طلال بن سايح نسحقك ديري جهدك و اليوم نفضحو و نرجعو سيرة على كل لسان
رؤيا: تعرفي إذا المدير سمع بلي ناوية تفضحيه مراحش يخليك هو بذات نفسو طلب منك تعملي لقاء حصري معاه ماشي تفضحيه
دنيا: ميهمش مش علاجال واحد جا البارح راح يأثر على مكانتي ...و المدير وقت يعرف بخرايبو و يشوف نسب المشاهدة العالية راح يشكرني
رؤيا: ندعو تجوز كيف قلتي و إلا يا دنيا راكي تلعبي بالنار
دنيا: إيه فهمت فهمت نتكل عليك سلااام
قطعت عليها الخط و كملت تسوق فنفس الوقت تبسمت بشر و هي تخمم كيفاه تفضح طلال و تخليه سيرة على كل لسان
فهذاك الوقت رؤيا بدات تتحرى على خلفية طلال ....مدت يدها خربت شعرها تتأفأف ...ما لقات عليه والو تقدر دنيا تستخدمو ضدو ....فجأة خرجلها خبر يبان من 6 شهور على فضيحة تخص طلال وقت كان فأمريكا قضية فساد كبيرة مازالت ماشية و وقت ثبتت التهم عليه إضطر أنو يسافر من البلاد ....تبسمت من الشق للشق فرحانة من لي لقاتو شوية و كانت فقدت الأمل...زربت طبعت الوثائق لي لقاتهم و حطتهم فملف ....دارت على وراها رايحة لمكتب دنيا تخبرها بلي لقاتو
أنت تقرأ
خلف قناع الطموح {من كتابة Macilia ch}
Romansaخلف قناع الطموح 《قيد الكتابة》 قصة دراما رومانسية خفيفة بطلتها مذيعة أخبار مشهورة تقع ضحية طموحها الأعمى و البطل حديث الثراء تتقاطع طرقهما داخل إطار تشويقي من الأحداث . باللهجة الجزائرية من تأليفي Macilia ch ممنوع النقل ❌️❌️ قيد الكتابة
