Ta hopi drùk. Ta manera kos ku mundu ta bai kaba. Hendenan ta aktua manera no tin mañan. Inteligensia ta algu ku a disparsé. Hendenan literalmente ta puntra algu ku ta dilanti nan nanishi. Anto ora kaba mester yuda nan hiba kos outo tambe si ni un florin pa danki.
Preokupashon ta rei. Pero e trabou ta kita mente i no mester pensa riba e realidat. Den tur e lokura ak,i ta tòg dushi pa tei bek. Na Hulanda mi tabata sinti'mi manera un karné ku ta wòrdu di yag pa vários leon di tur banda.
Debenan tabata akumulá mas lihé ku mi por a paga nan. Ni un Mc Donalds mi no por a kumpra pa mi mes. Mi ruta di tur dia tabata trabou pa kas nada mas. Pa mi di malu, mama a bira malu. Ta é so mi tin. Nan kier a hink'é den un "tehuis" pero mi a ninga redondamente. E lugánan ei ta famá pa trata hende malu i mata nan. Mi a purba di kue dos para den un tiru. Mi a bini Kòrsou bek pa kuida mama i tambe skapa di Hulanda. Pa nan no para'mi na aeropuerto, mi a bini via Alemania.
Ken lo a kere ku seis luna a pasa asina kaba.Trabou ta trabou pero Hesus mi tin bèrgwensa. Mi lo ke disparsé ora mi mira hendenan ku mi a bai skol kuné tur ta mihó pará ku mi. Mi tin rabia riba mes pasombra mi a bai Hulanda i hasi mi bida un desaster. Na lugá di siña mi a keda fiesta i hasi prèt.
Awor'akí Stichting Studiefinanciering ta riba mi i mi no tin ni un diploma p'e gastunan astronómiko ku mi a traha.
Ma logra skapa di nan pero un dia nan lo haña'mi. Mare mi por a bai bék den tempu i kambia algun kos.
Aworakí ki mi ta trahando na Japan N.V.
Mi tin sigur ku e kontrakt no ta kuadra i ku nan ta hòrta'mi ora. Pero sin edukashon kiko otro mi por haña? Mi ta buskando si.
E sèn ta yega nèt nèt. Tratamentunan di mama ta karu. Tur kos mi por hasi den e lugá aki, e doño sa tambe. Ta algu malu pa ami. Paso nan por pone mi traha for di kasa, yena rèki i hasta "boekhouding" sin mester paga mi komo tal. Awe mes ta bispu di Pasku i ta hopi drùk. Mi tin kasi un luna kaba ta trahando sin niun dia liber.
E doño a primintí di paga mi "zwart" pa e dianan èkstra. Mi mester di e sèn ey. Mi a konfi'e i hasi un grasia wak ham i sult i poko ayaka pa alegra mama. Awor mi ta man na sanka. Pagatinu ta serka di kaba i fuera di e ham i otro kumindanan , no tin nada otro di kome òf bebe.
Porfin e dia ta yegando su fin. E delaster kliente ta bandoná e lugá i nos ta sera. Hesus , e lugá aki ta spantoso ora e ta bashí. Ta un área basta grandi i sukú awor ku tur lus a paga. E kòrtinanan ku ta ròl i ku ta klap sera duru, ta buta'bu sinti manera ta den un prizon bo ta.
Mi no sa kon trese e kos dilanti pero mi ke mi sèn aworakí manera e a primintí mi. Ni dies plaka mi no tin pa mi kue bus bai kas.
"Tarig , paga e kòmpiuter i sende e alarma pa mi" , e doño ta bisa'mi. Ta ami ku n'e so a keda. E tin hopi konfiansa den mi.
Wèl buta un tarea mas riba mi CV. Awor m'a bira bewaker tambe.
Mi ta hasi loke e a "bisa'mi"* i ta top'é na porta. "Teng, i mi pago?"
Teng ta grawatá kabes. "he eh mi a lubidá mes. djaluna sin falta"
Mi pechu ta reis. Mi ta morde primi mi kachete riba otro. Hopi hopi gana di dal e un krou mi tin aworakí. Si e bisa algu mas mi ta dal e un koño. Pero mi mester di e trabou aki , mi konsenshi ta keda bisa. -Pero no laga nan tuma'bu hasi bo kèns. Mustr'é un lès. Kòrda mama, kon bo ta yega kas?-, ta palabra nan ku ta keda drai den mi kabes.
Telefon ta ring. Teng ta sak'é for di su saku kana bai ayabanda. E ta papia na un idioma ku mi no ta komprondé. Nan su tono si bo ta skucha ku ta un hende konosí i ku e ta kontentu. E ta hasi señal ku mi yama ayó i bai den su outo.
Ami ta keda para einan manera un pendeu pensando kon mi ta hasi bai kas, kiko nos ta bai kome. Laga'mi kuminsá kana. Mi ta dal un stap i trapa riba un bulto. Mi ta wak abou i bira un bará di sèn. Lihé mi ta kue kont'é. Ta 750 florin. Mi sa ku ta di Teng. E ta mara ku un sticker hel manera semper e ta uza.
Nèt e ta bek ta bai. Ki mi hasi?
