Bo ta kere den maldishon?
Mi wela a haña mi mama ku 15 aña di edat. Mi mama a haña ami ku 16 di edat. Ami sí no ke e bida aki. Mi ke logra mas. Bida tin muchu mas ku djis relashon i sèks só. Mi ke ta e kambio den e famia aki i kaba e sirkulo visioso.
Mi a hasi mi esfuerso na skol. E plan ta pa mi kaba skol sekundario i sigui ku mi estudio na Hulanda. Un dia mi lo ke bira veterinario, kual ta un dòkter di bestia.
Mas serka mi ta di e meta , mas difísil kosnan ta birando. Mama tin poko dia kaba ta hasiendo fèrfelu. Segun mi , e ta yalurs riba mi logronan. Ya kaba mi ta mas leu ku e lo a yega. Tin ora mi ta kere ku e ta odia'mi pa kita su hubentut for di dje.
E ta pone nos tur rumannan kontra di otro. Su kastigu tabata ku ta yu muhé so e a haña.Papa tambe apénas ta na kas te pa e bisa algu. Segun ami den profundo paden e no ke ta ku mama, e no ke ta aki mes. Pero e hecho ku nan a haña ami i mi rumannan , ta buta ku e ta keda aki nan numa pa bèrgwensa.
Poko tempu pasá , diskushon a bira asina fuerte , te ku mi a bai for di kas. Mi lo mustra nan tur ku mi no mester di nan pa biba. Mi lo sigui ku mi bida i bira un dama independiente. Lo mi mustra nan ken ta Jessica.
Ma bai keda serka un bon amiga pa un ratu ku ta biba Banda 'Bou. E tampoko no tin n'e dje bon ei pero ta mihó ku ta riba kaya.
Mi a keda den un kas huntu ku su "oma" i su ruman hòmber.
Segun tempu ta bai , mi a bira bon i rekonsiliá ku mama. Mi a pidié despensa pa e ònbeskòp ku mi tabata , i e manera ku mi a anda kuné. Mi a pidi'é i bis'é ku mi ke bini kas bèk. E a akseptá nos man habri. Papa manera semper a djis keda ketu gruña un kos i sigui hunga su wega nan riba telefòn.
Ántes mi a mira bida muchu fásil i tabata hopi naif. Bida a kue buèlta nan i ma haña'mi obligá na tuma sierto desishon nan. Shete aña a pasa asina.
Di un parti mi ta felis di tei na kas bèk, speshalmente ku e dianan di fiesta.
Kas ta pèrtá ku tantu hende aden asina. Mi rumannan nan ta hopi rabiá , awor ku nan tin ku drumi banda di otro riba kama , awor ku mi tei bek. Kasi kasi no tin espasio pa hasi nada.
Otro mañan mi ta hasi 21 aña i Xanaya mi yu lo hasi seis. I mi tin un mas na kaminda. Mi soño di bira un veterinario awor ta parse mas un huma ku a waya bai ku bientu. Mi no ta papia ku e amiga di Banda 'Bou mas i su ruman hòmber , tata di mi dos yunan ta un desgrasiado di marka mayó.
