Mi mihó amigu ta e palabra problema. Unda ku mi bai e ta siguimi. Awe trobe no ta un eksepshon.
E a bin ku mi te den choka mata pariba aki.
Hopi suku mes Fuik ta. Ora di fia sèn hende nan ta poeslief i ora di paga bek nan ta skonde manera kakalaka den kashi.
E famia wowo grandi manera pikinees naki tin mi fadá. Basta dia e ta birami rònt kaba. Awe si mi a pega pleitu ku nan. Ta manera den nèshi vruminga ma trapa.
Mama ku tio ku wela ku primu i tur a sali wak ki ta pasando.
Pero ami no tin miedu di nan. Ta dimas. "Mi ta paga bu si Aaron. Mi a hañami strobá ku un kos aki. Pero mañan mi a keda di haña un sèn ey"
NO, mi ke wòrdu paga awor awor. Mi no ke tende ni mira nada. Wak pa mi haña mi sèn esei so mi ta bisabu.
Un primu/tio/tata òf whatever, nan tur parse otro. Ta kana bin hasi fresku.
"wak kon bo ta papia ku mi ruman pa kos no pasabu" E ta menasa.
Par di suheto mas ta aparesé for di e kas i ta kana bini mi direkshon. Mi sanger ta kushi kaba pero mi no tin gana di bringa ku mei 7 hòmbu. Anto esei ta sin konta e muhé nan.
Mi ta hisa mi T-shirt mustra nan e pistol ku mi tin wantá na mi faha.
Aki no tin ganga. Keda rustig para einan pa kos no pasa BOSNAN !
Un di e dama nan mas bieu mi ta suponé te wela ta kore bini ku sèn den man. "tuma , tuma mucha hòmber. Nos no ke problema"
Mi ta tuma e bará i kont'é. Mi wowo nan ta keda wak rònt opservá wak ken ta bini mi direkshon paso e famia kompletu a rondonámi.
E sèn ta kuadra i nan a duna hasta 50 florin di mas. Mi ta kue dos 25 pa dun'é bek.
"no e ta bon. Porfabor lag'é asina." E welita ta roga. "mi ke djis mi trankilidat"
Mi ta pone e bará serka di mi pistol i pa fásil hinka e dos 25 nan den mi saku patras.
Tin basta un kaminda pa mi kana. E outo ta muchu plat i no por drenta e kaminda malu yen buraku aki. Mi a parkeer te aya fo.
No tin ni luna pa duna un tiki lus. Skuridat ta manera èkstra aki nan. Ta ketu. Ni un kriki ta hasi zonido. E kalbas nan seku den mondi so ta zona manera maraka ora e palu zoya den e bientu spantoso.
Mi ta sinti inkómodo i ta kuminsá kana mas duru. Mi stap nan ta hundi den e lodo fresku. Áwaseru a kaba di kai poko ratu pasá.
Diripiente un zonido fuerte mi tras. Manera ta un piedra enorme a kai. Mi ta saka mi pistol I bira wak. Mi no ta mira nada. Pero si mi ta mira e awa ta move den e plas manera un kos a trapa aden.
Mi ta keda bek ku kara. Te den mi alma mi ta sinti ku tin algu ta wak mi.
Un zonido den mondi. Tin dos wowo kòrá manera kandela. Un kachó gigantesko ta bula basha datu ku infrou abou. E ta hap agresivo. Mi ta hala mi man nèt na ora pe no morde mi. E moveshon ta pone e pistol slip bai kai den e plas i disparsé.
E kachó ta kana bini mas serka. Su baba ta keda lèk riba e suela ku ta muhá kaba. Su djente nan ta bria den e skuridat. E no ta ni kinipí wowo i ta keda wak mi stret. Milimeter pa milimeter e ta skùif. Su uña nan skerpi ta bora bai pèrdè den e lodo.
Aya tras mi ta mira poko sombra ta krese i krese. Kada bes mas nan ta bini mas serka.
Bientu ta bòltu. Mi por sinti e holó di e kachó. Nunka di mi bida mi a yega hole algu asina repugnante. Mi tin ku keda guli pa mi no saka.
Den mi saku mi tin un kuchú. Ora mi sake e bará di sèn ta kai abou. E kachó ta focus riba dje i atake. Manera un loko e ta morde kibra, sker e sèn nan.
Mi no sa i no ke sa kon e historia aki ta kaba. Mi ta sali na kareda awor ku e kachó ta okupá ku algu otro. Kada un stap ta move mas lihé ku e otro. E kachó tambe a realisá su bobedat i ta kore mi tras.
Den mondi mi ta tende yen zonido straño i harimentu. Kon e hende nan a hasi yega lihé asina. Manera makaku nan keda ta bula den e palu nan. Mi ta mira kon nan ta bula i pasa over di e kaminda. Ni wabi ni datu ni nada no ta stòp nan. Nan ta pasa den nan manera nan no ta eksistí.
E harimentu diabóliko ta halando serka. Mi kurpa ta kue kippevel. Mi ta mira nan sombra ta kore den mi skina di wowo. Nan stèm ta keda papia. "nos ta matabu. Awe ta bo lastu dia."
Un machete ta drei biniendo ta bini mi direkshon. E ta kai dal pega den suèlta mi dilanti. Mi ta trompeká riba dje kore kabes di gai.
Mi ta len ku mi man rekobrá balansa bek. E yabi outo ta kai. Mi ta logra gar'é nèt promé e yega abou. Mi ta primi e boton habri e lòk di leu. Mi ta mira e lus sende. Mi ta hopi serka djis un par di meter mas.
Mi focus ta riba e bahul. Eiden mi tin un arma mas.
Un par di nan ta kore pasa mi bai para entre ami ku e outo. Mi ta wanta un ratu. Mi por kita di aya pero e lo no yuda. Mi no tin forsa pa kore mas.
Mi ta sera wowo I kore duru bai direkshon di e dos sernan ku a para mi dilanti.
Awa ta kuminsá kai fuerte muhami kompletu.
Ku un velosidat haltu mi ta pasa mei mei di nan i ta sinti na kueru friu.
Mi ta bringa habri e bahul saka mi arma. Nan ta bek yen miedu. KU KEN BOSNAN TA HODE KU NE ? bini, dal un stap mas bosnan ta sa. Bini no mariku nan !
Nan ta hari I keda bek. Aunke awa ta kayendo nan ta manera kos ku no ta muha. Esun ku tabata debemi sèn ta keda mustra riba mi. Mi ta tende bisa "e kos aki no a kaba ainda" hinter e grupo ta bek i disparsé den e kortina di skuridat.
Un man ta kue mi tene fuerte na mi skouder.
Ku arma den mi man mi ta bira i mek. Ta un hòmber bieu. E ta asina fuma ku e alkohòl ta hole diesel na su kurpa.
"ki bo ta hasiendo hóben?" e ta puntra tambaleando kasi kai.
Hopi suèltu bo tin pai. Mi a hera di tirabu !
E hòmbu bieu ta respu, su holó di baf ta plama. T"ira mi? ku kiko bo ke tirami? Tirami ku un florin no?"
Pa spant'é mi ta pone e pistol na su kabes. Ku e kos aki.
"Ku buki bo ke tira mi?" E ta kontesta.
Mi ta wak den mi man i mira ku no ta un arma si no un beibel mi tin tene.
"ki bo ta hasi aki nan mes?" Pai ta puntra kasi pegando soño.
Babuká mi ta kontesta "e krou nan ey tras tabata debemi mi a bai tuma mi sèn."
E hòmbu bieu ta wak mi. Su wowo nan ta spang. Di spantu su fuma i soño tur a kita. "No tin nada eitras. E famia ku tabatin eitras a muri mas ku 50 aña pasá den un kandela"
Kos di fuma e hòmbu ki ta papia. Mi ta hinka man den mi saku patras i saka e dos 25 nan ku nan a dunami. Den mi man e sèn ta kambia bira un papel bieu maron. Den e lus di outo mi ta mira ku ta un prenchi, un foyeto. Riba dje mi ta mira e potrèt di e hòmber ku ta debemi sèn.Nasé 12 Febrüari 1901- Fayesé 5 Desèmber 1954
