Mi a kaba di sali Leny's hair & beauty salon. Mi no ke ni hala rosea te pa mi kana den bientu. Mi kabei tin ku keda perfekto manera e ta. Mas trempan mi a hasi mi uñanan na Touched by kim.
Awor si mi ta kla pa awe nochi.
Un baño fresku ku habon Dove. Lingerie sèksi ku ta marka bou di paña pa mustra e kaweta nan kiko tin. E drès Dolce Gabana ta sinti manera ta rondó di mi kurpa nan a kose. Mi no ta lesbi pero mi a keda dushi. Si mi a topa mi mes mi ta garantisá bu ku mi lo a pasa un lenga òf dos den mi pia. Esta sabroso bo a keda no.
Riba kashi banda di e spil tin un potrèt di Robi mi hòmbu. Suèltu é tin ku un dama manera mi.
Robi tin mi kansá. Mi stim'é si pero e ta dediká muchu tempu na trabou. Tur ora e ta bisami ku e kier dunami tur loke mi ke i meresé. I kon duru e ta traha i kon total loss e ta keda. Pero mi sa ku ta wega e ta hasi. Paso manera mi e lo no haña nunka mas.
Kada bes mi ta splik'é ku mi ke un yu paso mi ta sinti mi , mi so na kas. Su kontesta ta "si bo ta sinti laf bo mester buska algu di hasi. Un trabou kisas. É lo yuda tambe ku e gastu nan i buta ku mi lo tin ku traha ménos. Tin muchu gastu pa pone un yu tambe aserka"
Bo no por laga di nèk? Hopi ta esnan ku te awe ta deseá mi. Ta vários hòmbu tin ku tin gana di kriami i tratami manera e reina ku mi ta sin mi mester traha.
Ta Pasku, e sa bon bon ku mi kier a sali. Tòg e a ninga. É a bisami ku é fiesta ta kosta hopi sèn i ku é lo por kue 250% porshento si e tuma é warda di awe. Ta dia di fiesta.
Pero su kuenta, ami si ta biba mi bida.
Anyway pa kompletá mi unifòrm di kibra kaya, mi ta pone e toke final. Spùit poko di e kolonia One Million.
Outo ta pita dilanti porta. Nan a yega. Mi a tuma lift ku un grupo di amistat. Robi ta kier mi bai ku e otro outo. Pero e ko'i ta zona masha duru mes. E fènbèlt ta bati i e airco no ta traha. Ki e hende nan ta pensa di mi si mi bai fiesta asina? No yu !
Georgelis ta pasa kue su kartera Michael Kors ku ta butá den banda. E a kosta hopi sèn pero ta presisamente esaki ta bon. No ta kualke pendeu por kumpr'é. E kier keda úniko.
Fiesta den un palabra ta MASTER. E banda nan di mas hot di momentu a topa. Buleria, Gentz i Gio a buta bra i bula dak di WTC benta masha leu mes
Ma baila asina tantu ku mi pia ta hasi doló. Hopi vitamina pa wowo tambe. Mi a hinka mi number den basta telefon awe nochi. Bo no sa nunka. Maske bo ta na diet bo mag di wak e menú tòg?
E amistat nan a bai kas ratu. Nan no gusta keda te ora fiesta kaba paso hopi bes ta nèt n'e momentu nan aki ta bini problema. Kobarde nan. Ami si stima. Ta aworakí e kos ta sinta dushi. Tur hende ta keda wak i interkambiá informashon etc. Bo sa tòg?
A kuminsá bira ketu. Ta 4 or di mardugá. Lagami regla mi ko'i bai kas kuné.
Telefon ta bèl. Hasi lihé kue pa kaba. Porfin e a kontesta. -Robi bo ta bin buskami? fiesta a kaba-
Robi ta hala un rosea grandi na telefon i ku stèm grogi yen soño . -Mi ta kansá. Bo sa ku mi a traha hinter dia awe. Ta awor ei mi a yega. Dikon bo no a bai ku e outo? Ku ken bo a bai ? Nan no por trese bu kas.?
Georgelis ta chiww. -Si nan ta por a hibami kas lo mi no a bèl bo tòg? si ta asina bo ke basilá e ta bon. Laga numa. Mi tin sigur ku kualke un di e kabayero nan aki lo por dunami un lift. Mi a mira Klay tambe, mi ta pidié.-
-Georgelis komportábu.- Robi ta kontesta. Su soño a disparsé mes ora. -Mi ta bin buskabu. Mi a tahabu basta di keda hode ku Klay.-
Kontentu Georgelis ta sera e telefon. E sa ku e tin Robi rondó di su dede. E sa kon menasá Robi ta sintié ki ora e menshoná Klay ku ta su eks.
Áwaseru ta kayendo fuerte. Ta un nochi largu i tristu. Awor mi ta mi so drumí riba kama.
Mi pensamentu ta ketu bai riba e palabra nan ku mi wela a bisa semper. "Ora bo pidi algu, ta spesífiko. Pa universo no tum'é robes."
Awor mi ta hinter dia okupá trahando i mi tin e yu ku mi a pidi pe. 24/7 mi tin ku kuida Robi manera un baby despues ku é a keda paralisá den e aksidente é anochi aya na WTC.
