Nunka bo a stima un hende te ku e ta hasi doló?
Mi a krese den internat. Mi no por ni bisa ma biba paso ta eksistí mi tabata eksistí. Bo por konta riba un man kuantu bon desishon mi a yega tuma den mi bida.
Mi problema nan mi tabata solushoná nan ku violensia. Bringamentu tabata mi úniko medio di komunikashon. Bo wak mi straño? un wowo blousa lo siñabu pa no hasié mas.
Te awe mi no ta konfia ni mi sombra.
Ma kaba di kue un job serka un makamba aki.
"Waw, ik heb geen andere woorden om het te beschrijven" e krou aki ta bisa. "hier heb je 100 gulden extra. Het is echt mooi afgewerkt en snel ook. Je hoort zeker nog van me."
Anto nan ta bisa ku makamba ta pichiri ?. Pero esaki ta unu apart. For di promé bes ku e a wak mi e ta kana show den karson kòrtiku bai bini ta hari. Lag'é sigui hode pa mi pas'é un bon dòlò.
Pero pa aki ratu nan no mirami pa un ladron. "is niet nodig" Mi ta bis'é. "ik ben al betaald"
"nee joh, doe niet moeilijk. Je hebt het echt verdiend.
-Se no? Kayente ku bo ta- mi ta pensa. Por hasi bon uzo di e sèn ey. Vooral awe djabièrnè. Fin di luna ta leu.
Mi ta tuma e sèn i keda wak kon e sanka nai ta keda yanga bai paden. Nan ta poko plat pero den tempu di guera no tin misa. Haña lo e haña sigur.
Otro ora lo mi a tira riba dje pidié number. Pero mi sa mihó. Mi no ke hasi nada pa perhudiká e relashon ku mi muhé.
Ta prèt tin ora mira kon bida ta tirabu kurva. Semper mi a bisa ku nunka lo mi hode ku un muhé ku tin yu kaba. Nan ta ko'i chinga so, mi no ta e pendeu ku ta kria yu di niun hòmbu. Esaki tin dos yu di un relashon previo. I bo sa? No tin nada ku mi stima mas ku e dos kriatura nai.
Nan dos huntu ku e amor di e mama a kalmami hopi. Hasta trabou mi tin danki na e un style. For di tempu di lagere school mi tabata gusta e mama. Bon dushi e ta. Mi no ta ni sa ki mi hasi ku mi bida. Mi a bai MTS su tras djis pa mi purba konkist'é. Ni maske ki mi a hasi e no kier a tende pa mi.
Una bes einan mi a disidí kaba e opleiding di elektro numa. mihó kos ku mi por a hasi. Mi ta trahando na un empresa chikí aworakí.
E muhé a bai Hulanda i mi a pèrdè di bista. Diripiente ma tope den fiesta i ata nos aki.
Trabou di awe tabata fásil, chicken feed. Ta un bes a kaba. Ma mèldu na kantor ku mi a kaba i e manager a informa ku mi por bai kas numa i keda ku e outo.
Perfekto. Mi por lora laman un ratu ku e muhé i e mucha nan den wikènt.
Manera un KING ku 100 florin mi ta pasa KFC i Baskin Robbins wak un bucket i un pint pa un grasia.
Lagi hode bèrdat ta djabièrnè, mester por disfrutá tambe.
E rei na Kentucky tabata largu pero porfin mi ta kla.
Mi ta pasa pita Mai i e prima smoel largá ku ta sinta hasi redu hinter dia den balkon manera semper.
No ta gusta biba den kura di e muhé su mama ku demas famia no. Pero miéntras no haña algu mihó ta esaki tin.
Pakolmo mi tin un speshi ki, mi lo bati e muhé ku patin pa mata ora mi hañ'é.
E mucha nan ta na skol ainda kual ta perfekto. Nos tin un ratu huntu nos so.
Manera un Ninja mi ta slùip bai n'e kamber. Mi ta sinti e airu friu ta sali for di bou di e porta. Lo e ta na soño.
Mi ta tene mi patin ku ta parando. No wòri. Mi ta lant'é ku e koki.
Ta habri e porta. Mi wowo ta hincha manera ta santu a bai aden. E saku di Kentucky ta kai i tur kos ta plama abou.
MI TA MATE, MI TA MATA NAN TUR DOS. Mi mente no por prosesá palabra. Mi no por ni pensa. Ta hasi kalor, sodo ta kore den mi kara. E airco friu ta supla den mi lomba muhá.
Mi kurason ta bati fuerte. Ta asina aki ataka di kurason ta sinti? E bista ta bira blurry ku e awa ku mi tin den mi wowo nan ku ora pa ora ta birando mas suku.
Mi ta bula pasa riba e kama kòrta e distansia ku tin entre ami ku e desgrasiado.Mi ta mira e teror den e hòmber deskonosí aki su bista. E ta kremp den huki blo sunú.
E muhé puta ta purba di rasoná ku mi.
"Hala bo sanka aya banda !".
E ta bai dònder abou den kashi plama ora mi push'é.
Mi kurason ta hasi dolor, hinter mi kurpa ta na kandela. Algu, un kos, un hende tin ku paga pe. Mi mester satisfasé mi hamber pa violensia. Kara di e lolo aki lo ta un entree perfekto pa e bufèt di sla ku mi tin prepará.
No hasié, no hasié Day mi stèm interno ta keda ripití. Un momento di klaridat. Mi ta kòrda e téknika ku nan a siñami na internat pa deal ku mi rabia. 1,2,3,4..... e no ta trahando.
Mi ta sak riba dje i yen'é ku gòlpi miéntras mi ta konta e moketa nan ku ta konektá. 1,2,3,4, mi a pèrdè konteo, ta banda di 20 nai ta bai.
Mi no tin kunes mas ki pasa. E hòmber su bida ta slep den mi dede nan. Mi por sintié ora mi choke.
No por splika dikon ni ki ora. Pero mi ta laga bai. E kamber ta bira chikí. E muraya nan ta bini riba mi. Mi ta sinti kloustrofobiko.
E muhé ta yorando yen bèrgwensa bentá riba loke a sobra di e kashi.
Mi ta trapa riba e galiña nan yená ku zeta fis, e coleslaw sin smak i e pan nan tai manera rubber bai pafó.
Mi ta primi tròt te den bòm i lanta un orkan di stof i bandoná e lugá pendeu aki.
Riba kaminda e telefon ta keda bèl molestiá . Kasi sigur te MUHE. Ta ignore.
Pero e ta sigui hasi boroto. "Ki lolo bo ke? Nos no tin nada di papia mas"
Ta keda ketu na e otro banda di liña. "ta robes? Ta Daydrion?"
"mi a kere ta otro hende. No tabata e intenshon pa..." ta bisa e manager.
"Ay no wòri. Mi a lubidá par di papel importante den outo. Bo por trese nan p'ami please? Mi ta hopi okupá i no por sali"
Ainda ta hasi kalor. Ta drei e airco den outo but'é na high. E ta zona duru ora e supla. Mare e por tapa e pensamentu nan maligno ku ta pasa den mi kabes.
Mi ta habri dash-board i kue e papel nan ku e manager a bisami i bai ku nan paden pe.
"Hey Daydrion. Bo ta rabiá ku mi ainda?" E ta puntra hasiendo wega. Semper e ta un hende alegre.
"Bo tin hamber? Bo ke un pida sèntwich? E ta hopi pika si"
"No danki, mi no tin apetit." Mi ta splik'é.
"Miedu di pika bo tin?. Basta ku e ko'i mako nai. Aktua manera un hòmber"
Un baño di furia. Ta pèrdè kabes. "Ki koño bo di? Bo ta duda den mi hombresa?"
Skuridat.
Gritu nan horibel. Mi man ta sinti pegahoso manera honing tin riba nan. Mi ta wak den banda i mira e sekretaria ta grita i yora. Mi ta baha kabes wak abou. Mi duim nan ta den e kabes di mi Manager. Mi a primi su wowo nan manda aden.
Spantá mi ta lanta para. Ki ma hasi ? ki ma hasi mi dios !
