Sùlt bon pika ta drumí den zür ta kue sabor. Ayaka nan sabroso ta stoom kla pa aki ratu. Piña Colada i Ponche Crema ta den frizer for di anta ayera. Di ham nos no ta papia mes. E holó so ta lagabu sa den ki temporada di aña nos ta.
Pafó ta hasi friu. Awa a kai hinter dia i ta fresku. Ta briando suku kual ta hasi e ambiente mas cozy ainda. Klòk di misa ta batiendo mustrando e último persona nan ku nan mester hasi lihé i drenta pa kaba.
Fragansia nan europeo karu ta dominá oksígeno. E kèrstbom ku tin ta prònk den huki tambe ta plama su aroma.
Misa ta yen yen. Ta noche buena i tur hende ke tuma nan delaster bendishon promé ku Pasku.
Tin vários kara alegre ta kana rònt mustrando nan hòmbu òf muhé ku nan ta bati na sobra di nos hende nan simpel. E outo nan ku tin para eifó no ta stail di show. Aunke nan sa bon bon ku no tin parkeerplats nan mester pasa dos tres biaha dilanti e entrada pa tur hende mira ta ken ta kore e outo último modelo ey. Si e ta di hür ta for di bo asuntu. Sera bo boka, baba i sintibu inferior.
Até, misa a kuminsá. Pastor ta kana yega i deseá tur hende un felis anochi. E pastor aki ta un di esnan di mas hóben. Hopi lo bisa ku e ta prediká bon. Pero mas hopi lo bisabu ku e ta bon dushi. Dama nan tin kustumber di atmití esaki.
Ku su kara kariñoso e pastor ta pasa su bista riba e hende nan ku ta sinta dilanti i yama nan bon bini.
PANGALANG e zonido duru ta echo den e misa ku a bira ketu ketu. Pastor a laga su krus di oro i otro prendanan presioso kai. Ku man temblando e ta kai na rudia i ta buk abou. Manera un hende siegu e ta keda tira man busk'é riba suela.
Dos dama ta kore sali for di misa hariendo. "Mi no por kere ku bo a hasié" Esun ta bisa e otro.
"MI A BISABU, mi a bisabu ku e pushi dushi feita aki si lo kita su konsentrashon" Claudette ta kontesta hariendo.
