قصتنه تتحدث عن أحد البنات التي عانت من سوء معاملة اهلها وتغربت تحت نوافذ جديدة حتى أصبحت محط للإنظار ..
هل ستكون هناك معنى للحرية والأمان في حياتها تحت ظلم العشائر؟
الزمن كفيل لتوضيح لنا هذا الأمر..!!
...
واذا گدامنَا واحٍد بچه نمُوت
بكُل موضوع دمع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
البارت السادس من قصة ( في جحر الظلام )
...
وعلى صوت البجي والصراخ والهوسه طلعت ام محسن وهي دكول: ولج يا عكربه مارتاح إذا ماشوفج بالجفن يالحيوانة خزيتينه الله ياخذج..
ام الشيخ بقهرر: ولج استحي على نفسج تدعين على بنتج من لحمج ودمج صدك إلي استحو ماتو، امشي يمه امشي لا خلفله عليهم وعلى مسؤوليتهم
الشيخ : يمههه دصعدي بساع لسياره منا العالم صوووتج ام الشيخ بحسره : يمه ما سمعته شكالت حركت كلبي هل ماتستحي لا خلفه على هيج ناس، وانتي يمه درحمي عينج من البجي كافي معليج بحجيهم اني بيتي مفتوح الج احطج بعيوني يمه..
وكل هذا الحجي ينكال وكحيله دموعها ماوكفت وهي تسمع حجي امها وشلون تدعي عليها وماتفكر غير ..صدك اني هيج سايبه وما رف كلبها عليه لهاي درجة اني عاله على أهلي حتى ابوي شمرني وتخلى عني واخوي إلي ماشفت حتى بعينه شفقه ليش ياربي شسويت بحياتي حتى هيج اتجاازه من اهلييي
والهدوء خيم على السيارة وكل واحد بيهم تفكيره بشي وماكو غير الحسرات إلي بالكلب
وصلت السيارة للبيت وتلكاهم محمد بالباب وهو يحاجي الشيخ ويكله ..
ها شيخنا طولت بهل درب وينك من صباحية الله.. سكت من شاف امه والبنيه الوياهم وحالته حاله
الشيخ بنرفزه: وخر يابه من طريق،، فوتي يمه فوتي جوه ارتاحي وانت الحكني خويه محمد..
صار شيخنا ..
وعلى دخلتهم استقبلوهم البنات والحيره بعيونهم لحالة امهم والبنيه
هزت راسه الكحيله ومشت وياها وكل خطوه تخطيه وتحاجي نفسها إلى متى راح اظل هيج ..
وبديوان كاعد شيخ مهيمن وكبالهم محمد وام شيخ حسناء وهو يحجي سالفه كلها ل أخوه محمد وويه كل حجايه تنكال تتوسع عيون محمد على الصار وهو يستغفر ربه
محمد: لا حول ولا قوة الا بالله بيا حال وصلوا الناس لدرجة يذبون بنتهم بالشوارع
الشيخ مهيمن: يمه سمعيني زين وهذا الحجي ما يطلع من هاي الغرفة ولا يوصل وينحط بحلك أحد
هاي البنيه اجت دخيله عدنه وبابنه مفتوح إله وإحنا مانرد الدخيل دام دك بابنه هذا شي من أصول ومعروف ببيتنه..
ام الشيخ: اي يمه صح هاي بنتي من اليوم ورايح اداريها واحطها بعيني حاله حال خواتك..
الشيخ مهيمن: يمه ادري كلبج طيب وماراح تقصرين وياها بس يمه لمتى إحنا نخليها عدنه شهر شهرين وهي بنيه حديثه وبيتنه مفتوح للرايح وجاي والكرايب منا يمه والناس ماترحم إذا لكتله لزمه وتعرفين هواي حبايب ينتظرون الزله من الشيخ مهيمن ..
واني اكلج يمه هذا الحجي ويظل بيناتنه اني يمه مال عقد وهالخراببط ماكدر عليها مو سالفة أن هي غريبه، بس يمه اني لحد هسه ماعرف فصله من أصله وهذا الشي اني حذر بيه خصوصا من بعد ماشفت اهلها اليوم ولحد هسه اكول الغلط من منو حتى وصل البنيه تهرب منهم وبنفس الوكت مااكدر ازوجه لولدنه وهي حالته هيج ونضمضم بالسالفة ولا نكدر نحبسه بمكان ونحكمه لاتطلعين لاتخيشن هاي مو حل
فالحل الأنسب أن هي صديقة حنين وجايه عدنه فترة تسكن لحتى الله يفرجه وأريد توصلين الحجي للبنيه ولخواتي علمود يكون العلم عدهم وياخذون بالهم من زلة لسان إذا طلعت ووكعت بحلك أحد خوش يمه؟
ام الشيخ: صار يمه هسه اوصيهن وافهمهم الحجي... يله اني اطلع اشوفهن
الشيخ مهيمن: خوش حجي يله اني اصعد اريح شوي حتى يأذن وانت هم ديربالك على لسانك ليفلت يم جويسم وكاظم
محمد : لا خويه لا تشيل هم اعتبر سالفه انسدت من طلعتك من باب
الشيخ مهيمن: يله اترخص.. على بركة الله محمد : مرخوص يالغالي.
.....
دخلت أم الشيخ للغرفة وهي تشوفه بناته محاوطات الكحيله وكاعدين يهدون بيها
طلعن البنات من الغرفة ووحده تتعارك ويه الثانيه من تسوي الأكل
ام الشيخ : شوفي يمه واسمعيني زين وخلي هالحجايتين حلقه بإذنج منا ورايح هذا البيت بيتج واني امج وهذني خواتجج حالج من حالهن ايدج بيدهم بالبيت ماريد تكعدين وحدج بالغرفة وتحزنين على ولا شي يمه ترى إذا هم ماثمنوج احنه نثمنج والدخيل عدنه مايطلع إلا إذا راسه مرفوع خوش يمه؟
الكحيله ودموعها بعينها: صار عمه بس وحجي ناس شلون ام الشيخ : سمعي يمه زين أنتي هنا صديقة حنين وجايه عدنه تعيشين لأن عايشه بغيير محافظة وهذا الأصح هسه حتى الله يفرجها وهذا الكلام ما يطلع من هذا البيت لأن الحجايه إذا وكعت بحلك واحد محد يرحم يا يمه
نزلت رأسها الكحيله والغصه بكلبها ودكول: لا يا عمه صار مايطلع وان شاء الله ماتشوفون مني العيبه ..
... يتبع..
وهنا انتهى البارت السادس من رواية (في جحر الظلام ) اعذروني حبيباتي قصير وعلى تأخير هم
عمريِ الحلوين دمتم سالميَن ، خلص البارت وياكم اليوم ، ان شاء الله حبيتوا الاشياء.. الي أنزلها .. وحب چبير الكم💗
اتمنى تتفاعلون بيه وتصوتون عليه إذا عجبتكم وأي شخص عنده قصة أو موضوع يتواصل وياي انستا خاص ..
