خفايا القدر علمتني معنى الحياة
الكاتبه ـ رفيف الحسني
علقوا على الفقرات حبايبي
صوتوا للبارت
**********************************
ابو مسلم ـ وينك مسلم يله تعال نروح للدرس غير تروح وياي لو تبقى هنا
مسلم ـ اي بابا جاي اروح وياك
ابو مسلم ـ ام مسلم محتاجين شي نجيبلكم ويانه
ام مسلم ـ لا سلامتك ابو مسلم
ـ مسلم يلبس دشداشه رجاليه رغم صغر عمره ووياهه عرقجينه توضع على الراس للصغار
يروح ويه ابوه للدروس الدينيه لكون ابوه معمم وصاحب علم ياخذه وياه للدروس الحوزويه
مسلم رغم صغر سنه بس كل گعداته وسوالفه ويه الكبار ويمشي ويه ابوه لكل مكان يروحله
يعني محاضرات دينيه مجالس علميه بين الطلاب واستاذهم الشيخ المعمم او السيد او يروح وياه للمجالس حسينيه يستمع ويفهم
مسلم عنده اخ واخت اخوه ادم اصغر منه ب 3 سنوات و ورد اصغر من ادم ب 3 سنوات
مسلم ـ گاعد بالصف وادرس حالي حال باقي الاطفال بصف الاول الابتدائي
عمري جان 6 سنوات سمعت صوت طلق شوي واجاني واحد من جماعتي يركض ويصيح
ـ ولك مسلم الحگ ابوك انقتل تعال
مسلم ـ جانت بيهه الطائفيه والقتل على الهويه بسنة 2005 طلعت من المدرسه اركض اريد اوصل لبيتنه واشوف اذا صدك يحجي هذا الولد لو جذب
شلون ابوي ينقتل وهو ما مسوي شي لو مأذي احد وكله ينصح الناس ويعلمهم ويفهمهم الدين ويسمع للكل ويساعد الكل وعمره ما صاح بوجه احد لو كسر خاطره
وصلت وشفته صدك مقتول والناس ملتمه على بيتنه امي جانت صغيره بداية العشرينات من ترملت
من مات ابوي جنت صغير على تحمل مسؤولية اخواني جان ادم عمره 3 سنوات و ورد كلش صغيره عمرهه 5 اشهر
اخذونه عمامي لبيت جدي اني وامي واخواني مسوين الفاتحه واني ما اعرف اي واحد منهم بس گاعد بنص الناس
وكل شوي وواحد يگول هذا ابنه وخطيه وبعده صغير وشنو ذنبهم تيتموا بهيج عمر هو واخوانه بسبب الطائفيه
بقينه ببيت جدي لما خلصت الفاتحه ورجعنه لبيتنه نعيش بي بس رجعنه واحنه خسرانين ابوي
بعد ما مات ابوي اجوا خوالي ياخذونه نعيش وياهم ما قبلوا نبقى وحدنه وامي بعدهه صغيره
اخذونه لبيتهم ابوي هم جان موصي امي اذا صار عليه اي شي نروح نعيش ويه خوالي مو نروح لعمامي
