နှင်းငွေ့မြူတို့ရစ်ဆိုင်းသည်သာ မြင်ခဲ့ရသူအဖို့ မျက်လုံးနှစ်လုံးဖွင့်လိုက်သည်နှင့် တိမ်ပင်လယ်ကြီး အရှေ့ရောက်နေသည်ဟာ ထူးဆန်းအ့ံသြဖွယ်အတိ။ ဆောင်းလေညင်းတို့ဟာ အသွေးအသားထဲအထိစိမ့်ဝင်နေလေရာ ထူထဲသည့် အနွေးထည်တွေပင် ကာကွယ်မှုမပေးနိုင်ချေ။ တရုတ်ပြည်ဘက်မှ တင်သွင်းသည့် စောင်အထပ်ထပ်ကို ခြုံထားပေမယ့် ရွာက ဂွမ်းစောင်ထူထူဟာ ပိုပြီးနွေးထွေးစေသလို ခံစားမိရသည်။ တောင်တန်းတွေကြားမှ တိမ်ပင်လယ်ကို နံနက်တိုင်း ထိုင်ငေးရင်း မြေပြန့်ကချစ်သူကို တမ်းတမိပြန်သည်။ အလှအပရှုခင်းတွေဟာ တစ်ဦးတည်းထိုင်ကြည့်နေလျှင် လွမ်းစိတ်ပိုစေတတ်သည်မဟုတ်လား။
အိပ်ရာထဲမှ ထလာတော့မီးဖိုထားသည့် ဘေးတွင် ဆက်ထိုင်ရင်းငေးသည်။ ဘေးနားမှာ ထိုင်နေသည့် ကလေးနှစ်ယောက်ကတော့ သူ့ကိုအဖော်ပြုရင်း လာနေပေးကြသည့်သူတွေပင်။ သူတို့အချင်းချင်းပြောဆိုနေသည့် စကားတွေကိုတော့ သူလည်း နားမလည်ပေ။ ငြင်းခုန်နေကြဟန်တူသည့် ကလေးနှစ်ယောက်ဟာ သူ့ကိုပါ ဆွဲထည့်ပြီးမေးလာသည်။
" Zool ရုံမယ် မိုမိုဆင် ရှိလယ်နော့ ဆာယာ "
ခပ်ဝဲဝဲစကားသံရယ် အဆင်ပြေသလို သုံးနှုန်းလာသည့် စကားလုံးတွေအား သူလည်း အသားကျနေခဲ့ပြီ။
" အင်း ရှိတယ်လေ"
သူ့ထံမှ အဖြေစကားရလေတော့ အချင်းချင်းပြန်ပြီး ငြင်းခုန်ကြပြန်သည်။ သည်ကလေးတွေရှိနေလေတော့ အနည်းငယ်အပျင်းပြေသည်ကလည်း အမှန်ပင်။ သူ့အနားကပ်ကာ မေးတတ်သည့် မြို့ကြီးပြကြီးကအကြောင်းတွေကိုဆိုလျှင် ထပ်ခါတလဲလဲပြောရပေါင်းလည်း များချေပြီ။ ဝမ်းသာစရာတစ်ခုကတော့ သည်ဒေသမှ ကလေးတွေဟာ ဗမာစကားကို အကျွမ်းတဝင်ရှိလာကြသည့်အချက်ပင်။ စာသင်ကြားရာတွင်လည်း ပိုပြီး ထိရောက်လာသည်။ တစ်ခါတရံ ဗန်းစကားတွေကိုသာ နားမလည်နိုင်ဘဲ ရှိနေကြသည်ကသာ လိုအပ်ချက်တစ်ခုဖြစ်နေခဲ့သည်။
" ကဗျာ ရေးတတ်လား ဆာယာ "
ဆရာ ဟူသည့် စကားကို သူတို့၏မပီမသအသံနှင့်ပြောလေသော အခါ ဆာယာ ဆိုသည့် သူ့နာမည်သာ ထွက်လာတတ်သည်။
VOUS LISEZ
ဆာယာ_ completed
Roman d'amourဆာယာ ဆိုတာ အေးရိပ်တဲ့လေ ။ ကလေးတွေအတွက် အေးမြတဲ့အရိပ် ဖြစ်စေတဲ့ ဆာယာ ဆိုတဲ့ ဆရာ ။ ရာဇသဝဏ် ရဲ့ နှလုံးသား အေးရိပ်ကလေးပါ။ ဆာယာ တဲ့လေ။ ရာဇသဝဏ် + ဆာယာ
