إشراقة حب

3

*#إشراقة_حب《03》*❤️
*#بقلم_آمنة_حمزة*
*★ــہہہـہہـ♡ــــــ★ـــــــہہہـہہـــــــ★ـــــ❥*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
الصباح اول ما صحيت صليت وابتديت اجهز في امي لانو اصلا هي كانت صاحية صحت صلت الصبح وما رجعت نامت تاني....اثناء ما كنتا بساعدها في اللبس حسيت بيها جيعانة ومحتاجة تأكل حاجة او تشرب لبن او اي عصير المهم تدخل حاجة في خشمها بس المطبخ فاضي وما عندي قروش اشتري بيها حاجة عاتبتا نفسي انو ما كان من المفروض ارفض القروش الاداني ليها مدثر دي هسي كان ساعدتني بس رجعتا قلتا اهم شي عزة النفس القروش دي وسخ دنيا ساي ،امي تقول قرت افكاري طوالي طلعت قروش من تحت المخدة وقالت لي امشي اشتري الحاجة العايزة تشتريها دي ،القروش الطلعتها كانت كتيرة شديد اتخلعتا وقلت ليها جبتي القروش دي كلها من وين يا امي ،قالت لي دا مدثر امس ختاهم لي هنا مع انو حلفتو بس رفض ،زعلتا شديد على انو قدر يعمل الفي راسو ويخلى القروش ووعدتا نفسي انو ارجعها ليهو بس هأشيل منها جزء بسيط هسي امشي اجيب بيهو لبن لامي من الدكان وبرجعو ليهو وقت يجي ،فعلا لبستها وبقت جاهزة وانا شلتا بستلة اللبن ومشيت الدكان اشتريتو واشتريت معاهو بسكويتة عشان يتقل ليها بطنها شوية وما تجوع ،وقت جاية راجعة لقيت عربية مدثر واقفة قدام بابنا ،فتحت الباب ودخلتا لقيتو قاعد مع امي تحت الشجرة وبيتكلمو بصوت اقرب للهمس ومن شافوني سكتو عديل ،اتأكدتا مية في المية انو امي ومدثر ديل في سر وراهم ما ساي ،وقت شافني جيت قال لي كان تنتظري شوية انا اجي ولا تتصلي على تلفون تقول لي عايزة كدا وكدا بدل ما تطلعي انتي ،قلت ليهو مافي داعي احتياجتنا بنوفرها برانا ،امي قالت لي عيب منك الكلام دا يا ريم ولا اشتغلتا بيها ودخلتا المطبخ فورتا اللبن وكبيتو في كباية وختيت معاهو البسكويتة جبتو ليها وقعدتا ،هو كالعادة طبعا كان ماسك تلفونو وبيطبظ فيهو ،امي قالت لي مالك ما كبيتي ليهو لبن معاك ،قبل ما افتح خشمي هو قال ليها انا ما بشرب حليب يا حجة اشربي انتي بالعافية عليك ،في قلبي قلت ليهو حتى لو بتشرب انا ما هأديك لانو اصلا جبتو بسيط وقدر امي بس عشان ما اشيل قروش كتيرة من قروشو ،رفع راسو من التلفون وقال لي انتي رقمك كم ،جاوبت ليهو امي بانو ما عندي تلفون وانا اكتفيت بالسكات بعد امي خلصت شرابها قال لينا خلونا نمشي عشان نعمل الفحوصات بدري ،قفلتا الابواب ومشيت كلمتا خالتو فاطمة اننا هنمشي وطلعتا مشيت لقيتو ركب امي قدام في العربية ومنتظرني بس....جيت ركبتا وراء وهو اتحرك طول الشارع كان بيتونس مع امي كأنهم بيعرفو بعض والغريبة انو كان بيضحك معاها بقيت مستغربة في شخصيتو دي واتأكدتا انو يا مجنون او لابسو جني يعني اختلاف توتل من التعامل البتعاملو مع امي ومن التعامل البتعاملو معاي وحتى تعاملو مع ناس بيتهم شكلو ما حلو ،وصلنا المستشفى وهو نزل ساعد امي حتى قبل ما انا انزل ودخل بيها وانا كنتا وراهم ،بعد ما دخلنا للدكتور كتب لينا الفحوصات الهنعملها واغلبها كان برة المستشفى وطبعا اكيد هتكون غالية شديد حمدتا ربنا انو سخر لي زول يساعدني بالرغم من استفزازو وتكبرو دا بس حقيقة ما هأقدر ما اشكرو لانو لو ما هو امي ما هتقدر تعمل العملية