*#إشراقة_حب《09》*❤️
*#بقلم_آمنة_حمزة*
*★ــہہہـہہـ♡ــــــ★ـــــــہہہـہہـــــــ★ـــــ❥*
بعد ما دخلنا الغرفة هو قعد في سرير وانا قعدتا في السرير القصادو عاين لي فترة طويلة وقال لي انا هأقول ليك اي شي بس ما عايزك تتأثري بالكلام الهأقولو ليك دا ،قلت ليهو اذا الكلام مؤثر البخليني ما اتأثر شنو ،قال لي يعني قصدي ردة فعلك ما تكون قوية ،قلت ليهو طيب انت كدا احكي لي اول حتى بعدها نشوف ،قال لي طيب اول حاجة عايز اقولها انتي عرفتيها اللي هو ابوك زمان كان شغال مع ابوي صح ،قلت ليهو صح ،قال لي طيب انا ابوك دا بعرفو معرفة شخصية وبحترمو جدا وزول عزيز على ،عاينتا ليهو بإستغراب وقلت ليهو يعني كنتا شغال معاهم انت ،قال لي لا ما شغال معاهم بس ابوك دا قدم لي انا وامي خدمة طول عمري ما هأنساها ليهو حقيقة انا ما كنتا بعرفو بس في يوم جى مع ابوي البيت على الاغلب عندهم حسابات وجو يتموها ،وامي عملت ليهم الشاي وادتني وديتو ليهم الوقت داك انا ما كنتا كبير شديد كدا يعني المهم وديت الشاي وسلمت على ابوك وطلعتا قعدتا مع امي وبنتونس ،شوية كدا ابوي جى طالع من الغرفة وبنادي في امي ،لبست توبها وطلعت وانا طلعتا وراها وابوي من شافها جى مسكها من يدها شديد لواها ليها وقال ليها دا شنو الشاي العملتيهو دا ،حرفيا زمان ابوي بيفتعل اقل المشاكل عشان يضرب امي ،امي بالالم الحست بيهو دا صرخت وابوك جى طالع من جوة بصوت الصرخة دي وجى مسك ابوي منها وقال ليهو يا فيصل اي صح دي مشاكل اسرية وما مفروض اتدخل بس الكلام دا ما صح منك وقدام الولد كمان المهم بجاي وبجاي هداهو وطلع وانا اليوم داك حبيت ابوك شديد لانو هو الوحيد القدر يقيف لابوي لانو اي زول غيرو ابوي ما كان بيسمع ليهو ،المهم اتكرر الموقف دا مرتين وتلاتة وابوك كل مرة بحجز ابوي من امي وكل يوم بكبر في نظري واحترامي ليهو بزيد شديد ومع اني ما قدرو في العمر بس صاحبتو وبقيت احب امشي ليهو في السوق واقعد اتونس معاهو بالرغم من انو ابوي كان بحنس فيني عشان اجي واشتغل معاهو بس برفض ،ابوي بقى اذا عايز يجي البيت بجيب ليهو زول عشان يمسكني لو عايز يضرب امي ،لانو في كل مرة انا كنتا بصارع فيهو بس برضو ما بقدر عليهو ،المهم يوم وراء يوم وانا بمشي لعمي ياسين ابوك واتعودتا عليهو وكان بحكي لي عنك انتي واخوك اسعد على طول وفي يوم انا مشيت السوق عشان اسلم عليهو بس لقيتو مستعجل وكان طالع وقت سألتو ماشي وين قال لي ضربو ليهو وقالو ولدو تعبان وهو ماشي يحصلو ،مشيت معاهو ووقفتا في الباب ما حبيت ادخل لحدي ما جى راجع وشايل اخوك في يدو وقال لي اجري شوف لينا عربية يا مدثر يا ولدي ،جريت ناديت اقرب بتاع عربية وجينا شلنا اسعد اخوك وديناهو المستشفى ،بعد قال كدا سكت مسافة وختا يدو في وشو ،انا لهنا كنتا متابعة معاهو وساكتة ومنتظراهو يكمل ،وقت رفع راسو المرة دي عيونو كانت حمراء استغربتا فيهو وقلتا ليهو انت بتبكي يا مدثر مسح دموعو سريع وقال لي اخوك اسعد مات كيف ،قلت ليها كيف مات كيف يعني ،قال لي ابوك قال ليكم مات بشنو ،قلت ليهو قالو اتسمم بس ما عرفنا السممو شنو ،قال لي فعلا كلامو صح واخوك اتسمم ،قلت ليهو وانت عرفتا كيف قال لي الدكتور قال لينا الكلام دا في المستشفى وما اتسمم بأكل ما نفع معاهو ولا كدا اخوك اتسمم بسم زرنيخ ،دموعي نزلو وقلت ليهو انت ليه مصر تبكيني هسي الداعي شنو انك تذكرني بكل الكلام القديم دا ،كل مرة اتذكر فيها انو اخوي مات متسمم وما عارفين السممو شنو قلبي بيحرقني عشان يدي مكتفة وما بقدر اعمل شي ،قال لي امسحي دموعك دي عشان اقدر اتفاهم معاك ،مسحتها وبقيت منتظراهو يكمل كلام ،قال لي بعد ما الدكتور قال كدا سألت ابوك وقلت ليهو يا عمي ياسين اسعد دا اكل شنو اخر حاجة ،قال لي والله يا ولدي اسعد دا قبل ما انت تجي بدقايق كان قاعد معاي وجى عمك ابراهيم اداهو قطعة باسطة وبالرغم من انو اسعد رفض يشيلها بس هو اصر عليهو وشالها ،قلت ليهو بإستغراب عمي ابراهيم ،قال اي والله يا مدثر مشيت قعدتا طرف وبقيت افكر عمي ابراهيم دا بكره عمي ياسين شديد وكم مرة شايفاهو بتكلم مع ابوي عن انو هو قاعد يفضلو عليهو ،الشك ابتداء يدخل قلبي والوقت داك كان عندي تلفون صغير خاتيهو للمكالمات عشان اذا قطفان احتاجت حاجة في المدرسة ولا كدا يضربو لي طوالي شلتا تلفوني واتصلتا لابوي وقلتا ليهو عمي معاك في الدكان قال لي اي معاي قلت ليهو سوقو بالغصب وتعال بيهو مستشفى.....عمي ياسين دا ولدو تعبان وهسي ما معاهو زول ،وطبعا عشان عمي ياسين عزيز على ابوي قال لي خلاص سمح جاين عليك ،مشيت وقعدتا مع ابوك وبقيت اهدي فيهو واخوك كان جوة وبيعملو ليهو غسيل معدة لحدي ما ابوي وعمي جو وعمي كان واضح انو زهجان وجى بالغصب ،انا كنتا بعاين لعمي بس ومنتظر اي ردة فعل منو ،وقت الدكتور طلع وقال لابوك انو اخوك مات حتى يداب شفتا ردة الفعل المنتظرها عند عمي وكان مبسوط عكس ابوي الاتأثر لموتو شديد ،ابوك كانت حالتو منهارة ووقع في الارض وابتداء يبكي بأعلى حسو والا انا وابوي بالجلالة هديناهو وخليناهو يقوم. عشان نقدر نكمل الاجراءات ،عمي كان واقف بعيد وما ابدا اي ردة فعل ،بعد خلصنا الاجراءات الدكتور قال لينا ممكن تفتحو بلاغ عادي ويشرحو الجثة وبعدها ممكن تتوصلو اذا هو اتسمم براهو او في زول خت ليهو سم في حاجة ،ابوك عشان زول مسالم قال ما عايز يعذب ولدو واكرام الميت دفنه وقام بكل المراسم ودفناهو معاهو وبعدها مشى ،طبعا وقت كان بيحكي انا ما فضلت ولا دمعة ف عيوني ،يعني اخوي اسعد مات مكتول ،قبل ما يواصل تاني قلت ليهو يعني قصدك يا مدثر انو دا عمك السمم اخوي ،قال لي جايك في الكلام بعد الحصل دا ابوك تعب وبقى ما بقدر يجي السوق وانا فقدتو شديد لانو على طول كان بيديني في مواعظ وبنصحني وبقى لي ابو اكتر من ابوي ،المهم يوم وانا داخل على البيت لقيت عمي واقف في الحوش برة وبيتكلم في التلفون وسمعتو جاب سيرة ابوك ،ما ركزتا وكنتا عايز اواصل مشي بس وقفني صوتو وهو بيقول لي الزول المعاهو في التلفون هدا كتلتا ليهو جناهو وما هيقدر يعمل شي تاني واما فيصل دا هين ما عليك بيهو ،اتصمغتا في مكاني واتحمقتا وكنتا ماشي ليهو والوقت داك كان ممكن عادي اتضارب معاهو بس مسكتا نفسي بالعافية وطلعتا تاني قلت امشي اكلم ابوك عشان يبلغ ليهو البوليس بس وقت وصلتا ابوك كان تعبان برضو وما كان الزمن بيسمح انو احكي ليهو حاجة واخر حاجة قال لي يا مدثر يا ولدي انا ما عندي زول في الدنيا دي بقدر أمنو على مرتي وبتي غيرك لو عندي معزة عندك اقيف معاهم ،كنتا عايز اقول ليهو السمعتو من عمي بس تاني اتراجعتا وطلعتا بعد ما وعدتو انو احافظ عليكم وتاني يوم سمعتا انو مات الوقت دا يداب كنتا داخل الجامعة زعلتا على ابوك شديد وحملتا عمي موتو هو واخوك بس ما كلمتا زول وقررتا انو اساعدكم زي ما وعدتا ابوك بس ما كنتا لاقي شغل الزمن داك وعلى قدر البلقاهو بمشي بيهو الجامعة وما حاولتا اشيل قروش من ابوي خالص وكنتا كل يوم بجي بطمن عليكم من بعيد لبعيد لحدي ما خلصتا جامعة واشتغلتا وعرفتا انو امك عيانة و....،قاطعتو وقلت ليهو وشنو يا مدثر وشنو وانفعلتا وبقيت ابكي بصوت عديل ،قلت ليهو اخوي عمل شنو لعمك لمن يعمل فيهو كدا ،قال لي يا ريم ،قلت ليهو ما ريم ولا حاجة وتقول لي بكل برود ردة فعلك ما تكون قوية وما تتأثري دايرني اقول ليك شنو ،اقول ليك عافية ليكم ومع انو لا ابوي لا اخوي ما عملو ليكم حاجة ،قال لي ياريم ،قلت ليهو معليش ولا حرف تاني ما بستحملو منك وحق اخوي وابوي الفي رقبتكم ربنا بشيلو ليهم وانا ما هأقول ليك هأشيلو ليهم وقمتا على حيلي وقلت ليهو بالنسبة للكلام القالو ليك ابوي اعتبر نفسك ما سمعتا حاجة منو وامانتو السلمها ليك دي انحنا هنقدر عليها وطلعتا خليتو وهو بنادي فيني ،طلعتا ولقيت امو واقفة جنب الباب وشكلها كانت بتسمع في كلامنا وقت جيت طالعة قالت لي يا ريم ،قلت ليها معليش يا خالتي بس حاليا ما هأقدر اتكلم معاك ،طلعتا خشم الباب جى محصلني مدثر وقال لي ريم بطلي ركوب رأس انا ما وريتك عشان تأخدي موقف انا قلتا ليك حق ابوك بجيبو ليك ،قلت ليهو ما عندك شغلة فيني يا مدثر ،قال لي طيب هسي ماشة وين ،قلت ليهو مكان امشي ما عندك شغلة ،قال لي زي ما جبتك هنا هأرجعك ،ما اشتغلتا بيهو وبقيت ماشة على الظلط ركب عربيتو وجى حصلني وركبني معاهو غصب ،طول الشارع كنتا ببكي وبتذكر في كلام مدثر القالو لي ،اول ما شفتو ماشي بشارع بيتهم وقفتو وقلتا ليهو وديني بيتنا يا مدثر ،عاين لي وما قدر يناقشني ودور العربية تاني ومشى على اتجاه بيتنا ،وقت وصلنا بيتنا نزلتا قبل ما يقيف عديل زاتو وقفلتا ليهو الباب شديد هو وقف العربية وجى وراي ،انا من دخلتا العريشة لقيت امي قاعدة قلت ليها السلام عليكم بس ودخلتا الغرفة قفلتها على وخليتها مستغربة فيني
عدو يومين وانا حابسة نفسي جوة الغرفة وما اتكلمتا مع امي خالص وهي بدورها ما ضغطت على وشكلو مدثر اتكلم معاها عشان كدا ما سألتني ،كنتا بمشي الحمام وبرجع الغرفة وهي بتجيب لي الاكل جوة من غير ما تتكلم وتطلع وكدا احسن لانو انا زاتي ما قادرة احكي ليها حاجة هأقولها ليها شنو يعني انو مدثر واهلو هم القتلو اخوي اسعد ،قررتا مع نفسي انو هأطوي الصفحة الاسمها مدثر دي لانو بعد الحكاهو لي دا مستحيل ارجع واقعد معاهم في بيت واحد وهأنزل اشتغل واواصل جامعتي لانو مافي شي بنفعني غير شهادتي دي وقلت من بكرة هأمشي افتش شغل وما هأرجع البيت لو ما لقيت
