إشراقة حب

5

*#إشراقة_حب《05》*❤️
*#بقلم_آمنة_حمزة*
*★ــہہہـہہـ♡ــــــ★ـــــــہہہـہہـــــــ★ـــــ❥*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
مر اسبوع كامل وانا قاعدة فوق في شقة مدثر مع امي وما قاعدة انزل تحت لاي سبب من الاسباب ،ومافي زول بيجيني غير قطفان بتأخد ونستها معاي وتنزل والعرفتو منها انو ابوها سافر البلد ليهو يومين وهيرجع اليلة ،امي حالتها اتحسنت شديد وبقت قادرة تتحرك ودا الخلاها تصر على انو تقول عايزة ترجع بيتنا ،طيلة فترة الاسبوع دي ما اتكلمتا مع مدثر خالص وهو بدورو كان بجي راجع المساء خالص ويطلع الصباح بدري من غير ما نشوفو ،امي اتحسست من حركتو دي وقالت انو احتمال منزعج من قعادها بس حاولتا اغطي ليهو قدامها واقول ليها انو مشغول الايام دي في حين انو زاتي فكرتا في نفس كلام امي وقررتا انو اواجهو عديل لو جى اليلة ،يوميا بليل هو بيكرر نفس الحركة العملها يوم داك دي بيكون راكع في المصلاية ووببكي بس ما حاولتا اسألو من السبب ،بعد ما امي اتغدت قالت عايزة تأخد ليها نومة شوية قفلت الباب وطلعتا منها قعدتا في الصالة وبقيت منتظرة مدثر يرجع ،مرت ساعتين حتى سمعتا صوت الباب الكبير بتاع الشارع فتح ،عرفتا انو دا هو وكنتا عايزة اتأكد مشيت وقفتا في الشباك ومنتظراهو ينزل ،بس ما اتفأجات وقت لقيت انو احسان نازلة وهو نزل وراها ،ما عرفتا فهمو شنو الولد دا يعني الايام الفاتت دي كلها هو كان بمشي معاها وبجي راجع كذلك معاها ،ما قلتا في نفسي ما دام عاجباهو كدا وعندو ليها حاجة معرسني انا ليه ،قفلت الشباك وقعدتا منتظرة يجي داخل ،يمكن بعد عشرة دقايق حتى جى داخل وشكلو ما اتوقع انو يلقاني قاعدة لانو متعودة كل مرة يجي يلقاني مع امي يا نايمة ،وقت شافني قال لي مساء الخير وخت مفاتيحو في التربيزة قلت ليهو مساء النور عاين لي وقعد قال لي خير شكلو عندك موضوع ،قلت ليهو فعلا عندي موضوع لي اسبوع ما لامة فيك بالاضافة لانو امي اتحسست من حركتك بتاعت انك تطلع الصباح بدري وما تشوفك وترجع اخر اليل عشان تلقاها نايمة وقررت انو ترجع بيتنا ،خت يدينو في وشو وسكت مسافة بعدها قال لي عارف نفسي مقصر معاكم بس الفترة دي مضغوط شديد وافكاري جايطة ،قلت في نفسي صحي مضغوط بامارة انك يومي بتطلع مع احسان وبتجي راجع معاها ،واصل كلامو وقال لي لاكن الحجة انا هأتكلم معاها هسي وعايز يدخل لامي بس وقفتو وقت قلت ليهو انها نايمة رجع قال لي طيب انا اخد حمام واجيك راجع عندي معاك كلام وفي الفترة دي بس عليك الله اعملي لي كباية قهوة وتكون كبيرة لانو مصدع شديد ،فرحتا انو اخيرا هيتكلم ويفهمني الوضع عشان كدا هزيت ليهو راسي بحاضر وهو دخل غرفتو وانا قمتا مشيت المطبخ بس لقيت انو الغاز قاطع ،قلت خلاص امشي تحت اعملها واجي ،نزلتا تحت وما صادفتا زول ما عارفة الناس دي قاعدة تمشي وين لا صباح لا مساء هم مافي وما بتكون في غير حبوبة مريم وطول النهار واليل هي بتكون نايمة ،دخلتا عملتا القهوة وكبيتها في السيرمس وطلعتا من المطبخ دخلتا الهول عشان اطلع فوق بس سمعت صوت زول بيتكلم في التلفون وكلامو اقرب للهمس كنتا عايزة اواصل مشي بس في شي خلاني ارجع واتبع الصوت دا ووقت وصلت قريب منو لقيت انو دا حيدر وكان بيتكلم ليهو مع زول وبيقول ليهو اتصرف طلع لي البضاعة دي من البيت داك وديها بيت تاني انا عايز لو قلبو عليها السماء دي ما يلقوها ما ركزتا مع كلامو كتير وقلت معناها بيتكلم في الشغل وطلعتا فوق لقيت مدثر غير ملابسو وقاعد في الصالة وقت شافني جاية وشايلة السيرمس قال لي الغاز هنا قطع ولا شنو ،قلت ليهو اي قال لي طيب تمام الصباح ذكريني اشيل الانبوبة معاي كبيت ليهو القهوة وبقى يشرب فيها وفي نص شرابو قال لي يا ريم والله انا ما زول كعب زي ما انتي مفتكرة ،حمدتا الله انو بدا يتكلم وبقيت ساكتة وبعاين ليهو بس منتظرة يخلص كلامو قال لي احيانا الانسان بيتصدم صدمة كبيرة شديد ما بتطلع منو بسهولة نهائي وانا واحد من الناس الاتصدمو ديل ،قلت في نفسي ما دام فتح السيرة اسألو بالمرة من سبب بكاهو بليل يومي دا بس هو قاطعني بقومتو رفعتا راسي عاينتا ليهو قال لي المهم عندنا حديث تاني مع بعض وشال كبايتو دخل بيها غرفتو ،لا دقيقة يعني هسي كلامو معاي كدا خلص وبدل ما يفهمني حاجة الا جاط لي تفكيري ومشى زعلتا زعل هسي دا ياهو كلامو العايز يقولو لي يعني ،دخلتا غرفتنا انا وامي وكنتا بنقنق اتفاجأت وقت لقيتها صاحية جيت عليها وقلت ليها انتي موش قلتي عايزة تنومي قالت لي جاتني صحية وما قدرتا ارجع تاني ،رقدتا جنبها في السرير وقلت ليها كدا هتفضلي مساهرة ،قالت لي لا برجع انوم تاني وانتي بعد دا خلاص امشي لراجلك انا بقيت كويسة ،قمتا من السرير وبقيت اعاين ليها قلت ليها يا امي انتي عارفة كويس زواجنا دا تم كيف عشان كدا مافي اي داعي للبتقوليهو دا ولا في حاجة من الحاجات الفي راسك هتحصل ،قالت لي اي ما مشكلة حتى لو مافي حاجة بس برضو انتي لازم تمشي غرفتك وحبة حبة الامور بتتصلح بيناتكم واعملي حسابك انو انا بكرة الصباح برجع بيتي خلاص كفاية قعاد ،قلت ليها امي...قاطعتني وقالت لي قومي يا ريم الله يرضى عليك ،قمتا وانا بقول في نفسي امي دي ليه عايزة تدخلني في حتة ضيقة وهي خاتة شنو في راسها وعلى اساسو قالت كلامها دا ،وقت وصلتا غرفة مدثر بقيت مترددة بين انو ادخل او لا ،ولو دخلت هسي هيقول على شنو في النهاية اتوكلتا ودخلتا والحمدلله انو لقيتو نايم ،طوالي رقدت في الكنبة واتكرفستا وعلى الاغلب نمتا على طول