الحرمان

البارت الثالث عشر

نوفه، هذا اليوم اصعب يوم بحياتي قفدت مو بس حازم فقدت نفسي فقدت هيبتي وسندي بهاي الحياه
چان يوم صعب كل اشويه اطيح ويصحني
اگعد مسودنه عليه
ام محمد وابو محمد ما قصرو گالو انتي مرته تگعدين ابيتچ النسوان تعازيچ وجابن مله
والشيخ بمضيفه سوه عزه لروح حازم
الكتلني اكثر حازم ما وگفت عليه لا شفته من دفنوه لا ودعته لا حضنته وبچيت يمه هاي تضل غصه طول العمر
فالح، شالو اجنازة صالح والكل يلطم ويدگ انا افكر فاهم وياهم لو لا هذا خال ولده معقوله
ما نصبو اهله فاتحه الا ياخذون حگه
ادخلت اشيوخ العشاير
حازم الله يرحمه مهدور دمه وما چان لازم يجي
وصارت گعدات ومنو الكاتل محد متاكد
بس هم الكاتلينه
اخوته مارضو يستفصلون
العشاير طاحت عليهم حازم كتل وفصل واخذ بتهم وافصل وهم لازم يسون مثل ما سوه غيرهم

طلبو طلب قبل لا يفصلون فاهم يحلف وياهم لو لا
جابو كلام الله
حلف فاهم بكلام الله لا وياهم ولا منهم ولا ادري صح ما متندم على اسوايتهم بس ما الطخ ايدي بالدم
فصلوهم انا چنت متاكد طارق وياهم صح بعيدين وملثمين لكن اعرف طوله والاثنين اكيد من ولد عمه
وبعدها بايام نكشف ان طارق اطى ربع حازم افلوس وقنعهم يغدرون بيه

نوفه،مرن ثلث تيام على موتت حازم صارت حياتي بلايه طعم الحجيه باليل يمي تبات
الشيخ گالي انا ابوچ ما اردچ ابد الهم شتردين انا موجود بحمايتي
بس انا حسيت نفسي صرت ثقله لا اهل اروح ليهم رجلي راح
ربي اخذ امانتك وخل اتبع حازم وارتاح تعبت
هذا دعائي بكل صلاه
ما اروح لبيت الشيخ بس بيومها مخلصه ماي اخذت جدر ورحت اجيب منهم
سمعتهن گالن عدنا خطار غريب
گعدت يم الحجيه شويه وصاحلي الشيخ
استغربت اشعده
گالي بويه هذوله احموينچ يگولون هاي مرت اخونه وزحمه نعوفها تردين تشوفين شعدهم تردين بكيفچ
انا وياچ ما اعوفچ بويه
تعاي شوفيهم ما بيهم غريب
نوفه، صعبه عليه اطب ليهم حليت عباتي وطبيت السلام عليكم
وعليكم السلام
بس شفتهم ادموعي نزلن
فارس، ادموعج غاليه خويه. هذا امر الله
قايد، اعذرينه خويه التهينا بالفاتحه وما اجيناچ
بس اليوم لا تردين ويانه وحازم وكتلوه بعد شلهم عدچ
احنه اخوتچ
نوفه، الله يحفظكم بس انا ما اگدر ارد
فارس، خويه الوكت اتغير وان شاء الله تصفه الگلوب
وامس فاهم وده ناس واخذ مرته
وانتي اختنه ابيتنه ما تروحين لفاهم
قايد، والنعم من الشيخ ابو محمد بس تضل ديرت غرب وذيچ ديرتچ
نوفه، بعد تفكير طويل وحچيهم والشيخ يگلي بكيفچ ابنيتي انتي حره محد يجبرچ
قررت ارد وياهم
گتلهم هاي هيه ارد وياكم
قايد وفارس، هلا بيچ والله تونه ارتحنا
الشيخ ، ما ترد وياكم لباجر انا وام محمد انجيبها
فارس، ليش تكلف نفسك نروح سوه
الشيخ، لا هاي مثل بتي ولازم اوصلها بيدي

نوفه، اتغدو وراحو والشيخ طلع رحت لبيتي لميت ملابسي بس الغراض والباقي گلت اكيد ما اخذهم
اجت الحجيه تبات يمي الحجيه التبات وياي هي ام الشيخ