"عند العزبه "
نياف وهو جاي بحليب نياق : تفضل ياجدي
الجد: هلا نياف تسلم يمينك يابو حبيب ولله انك اطيب من اخوانك وانا جدك
مقرن : افا يجدي وانا سميك ومافيه اطيب من نياف زعلت انا خلاص بغير اسمك
الجد :ماترضا قم قم بس ساعد ابوك وعمك في بني بيت الشعر
مقرن : سم طال عمرك غالي وطلب رخيص
نياف : جدي تبي شيء انا برجع للبيت امي مسويه فطور وتقول تعال اخذه لجدك وعمانك
الجد : وش اوله تتعب نفسها الله يهديها يسوونه العيال هينا
نياف : ولله ياجدي تعرف طبخ العيال عليك ابه مهو زوين يا يكثرون الملح ولا قللوه
الجد : ههههههه ولله انك صادز وانا جدك اجل توكل ولا تنسى علاج سكر عند عمتك
نياف : ابشر طال عمرك نياف ركب سيارة وراح للبيوت البيوت تبعد عن العزبه عشرين كيلو
خلصو من بناء بيت شعر
ابو مقرن : مقرن وانا ابوك رح الامك جب من عندها الفطور
مقرن : نياف راح
ابو عبدالعزيز: وراك تتعب ام مقرن كان سوينا فطورنا وعينا من الله خير تتعب المره وتتعب الغليم
ابو مقرن : ولله وانا اخوك هي الي شارت قالت لا تسون فطور انا بسوي وارسل العيال علي يجون ياخذونه وتعرف ام مقرن تخاف اسكر ينخفظ عند ابوي
ابو عبدالعزيز: ولله انها اصيله ام مقرن
نياف : يهل الدار ادخل ولا فيه احد
ام مقرن : تعال للمطبخ يانياف البنات في المجلس
نياف : وش وش ذا ريحه الزينه يام مقرن صراحه طبخك لا يعلى عليه
ام مقرن : ياحبيبي يانياف الله يخليك لي ولا يحرمني من كلامك الحلو يابوي
نياف: امين ويخليك لي الا وراك في المطبخ بروح وين البنات
ام مقرن : سحاب وامها عندنا وعانهم مع سحاب يضحكن ويسولفون
نياف : لاحقات على سوالف مع سحاب يجن يساعدنك
ام مقرن : لا خلهم ينبسطون مع بنت عمهم واخذ شنطة الفطور يلا خالصه
نياف : ياجعل هاليدين ماتمسها النار يلا توصين على شيء
ام مقرن : سلامتك يابوي
نياف : اميره اميره
ام مقرن : وش تبي فيها
نياف : ابيها تجيب علاج جدي يقول عند عمتي ام مفلح
اميره : هلا مين الي يناديني
نياف : انا من بيناديس
اميره : هو غير مقرن ونياف ينادوني 😒
نياف : من تبين حضرت جنابك ؟
اميره : اخلص علي وش تبي مقومني من عند سحوب عشان تسالني من بيناديني غيركم ؟
نياف : مابيك بس روحي الى عمتي تعطيك علاج جدي
اميره : كان ناديت نوره ليه انا
نياف : هو مجادل اخلصي علي ينتظروني بالفطور
اميره : زين زين لا تموت علينا
نياف : اخو اميره صدق انتي وش بلاتس اليوم
اميره تركته وراحت الى عمتها
اميره : عمه نياف يبي علاج جدي
ام مفلح : يعمري يانياف جاي عشان علاج ابوي
ام عبد العزيز: نياف وينه مبطيه عنه ماجيته
اميره : واقف بـ لحوش ينتظر علاج جدي
ام مفلح : هاك عطيه نياف وقولي له مفلح معهم
اميره : ابشري
طلعت اميره وام عبدالعزيز سوا
ام عبدالعزيز: وشلونك يانياف عساك طيب
نياف : هلا هلا عمه آم عبدالعزيز بخير ونعمة وشلونتس انتي عساتس طيب
ام عبدالعزيز: بخير ونعمة يالله لك الحمد
نياف : يجعل دوم
اخذ العلاج من أميره وطلع من البيت
اميره : نياف نياف وقف
نياف : وش فيك فيك شيء
اميره : لا بس عمتي تسال تقول مفلح معكم
نياف : وكل اركض ذا وصياح سمعوك الجيران عشان مفلح 😉
اميره : نياف اعقب وعمتي الي سالت مو انا
نياف يضحك : لا الظاهر انه انتي مو عمتي بس ابشرك انه عند العيال مع مقرن وعبدالعزيز
اميره : انقلع انقلع انت ومفلح تخيل بس اخر عمري اسال عن مفلح يشينك انت وياه
نياف : تبين شيء غير مفلح ولا اوصل المفلح شيء
اميره سكرت الباب في وجه نياف وقالت :مابقى الى اهتم المفلح يع
نياف ركب سيارته يضحك وراح للعزبه
وصل نياف العزبه ونزل شنطة الفطور معه وجلس ينادي العيال
الجد : وراك تاخرت مهب عادتلك وانا جدك الظاهر مقرن اعداك
مقرن : افا يجدي وراك علي اليوم كذا
الجد : قم قم سو الشاهي وساعد اخوانك ولا بس تسدح لي وتبلع من تمر
نياف : ولله ياجدي مادريت اني تاخرت ويضحك
عبدالعزيز: نياف جبت الخبز وينه ؟
نياف : اي عبدالرحمن اطمر جبه في السياره
عبدالرحمن راح يركض لسياره
مفلح: هذا الشاهي الي يحبه قلبك ياجدي سكره قليل مهو كثير
الجد : ولله اني ادري محد يعرف لي الى مفلح
ابو مقرن : كلنا يابوي مانبى الى مفلح ونياف ام الباقين ميته نارهم
ابو عبدالعزيز: عز الله انك صادق مار عيالي مره تقول رخوم
عبد العزيز : افا يابوي وش مقصرين فيه تعال يدحوم اسمع ابوي وش يقول
الجد : يسمع ولا مايسمع انتم يثلاثه ناركم ميته وجالسين جنب بعض
نياف ومفلح يضحكون
نياف : قام لسياره يجيب المويه وعلاج جده تفضل ياجدي
الجد : تسلم ياولدي اجلس اجلس كمل فطورك
جلس نياف يفطر
ابو مقرن : الا ابو نوف ماكلمكم مهب طالع لديره طول ماجانا
الجد : يقول ان بنياته عندهم مدرسه ولا يقدر يطلع الايام هاذي انكان شيء في الاجازه
ابو عبدالعزيز: انا كلمته قبل سبوع يقول ان زوجته حامل ومايبون يطلعون لين تلد هي بواخر شهورها
ابو مقرن : الله يرزقه بالولد الي يشيل اسمه
كلهم قالو " امين"
الجد :يلا شيلو قشانكم هاذي بنصلي ونروح للبيت الشمس حاره اليوم
مفلح : نياف انتظرني بروح معك
مقرن : مفلح ماتروح معي ؟
مفلح : لا بروح مع نياف اخذ عيال عمي عبدالله
نياف : الحين جدي يقول رخوم متخاوين هههههه
مقرن : يويل جدي من ربي كل شيءٍ يامقرن يامقرن وفي النهايه مقرن رخمه هههههههه
مفلح : شف انت وش مسوي ومزعل جدي ولا ليش يحطك رخمه
عبدالعزيز: ولله جدي يكدنا كد وفي الاخير رخوم ترا انا ومقرن نشتغل اكثر من شغلكم
نياف : جدي ناوي عليكم بيعلقكم عند العزبه ههههههه
مقرن : الله يستر انا بروح ادور لي وظيفة ونحاش عنكم مثل عمي فهاد 🤣
مفلح : الله يوفقك
نياف : الله يوفقك وانا اخوك
عبدالعزيز: تكفى يامقرن اخذني معك
مقرن : ادرس الجامعه ونحاش عنهم عان نياف ومفلح فيها
عبدالعزيز: انا يدوبي مرتاح من الثانوي مهب الجامعه لا ولله ابي العسكريه
ابو مقرن : انتم ورا متحركون يلا قدامي انت وياه جهزو القهوه في المجلس وحنا جايينكم
نياف و مفلح سياره ومقرن وعبدالعزيز سيار وعبدالرحمن جلس مع شياب
نياف وصل قبلهم ودخل المطبخ ماكان يدري ان سحاب موجوده في المطبخ مع نوره واميره
شاف قفاها وشعرها الحرير ولفت ضهرها تضحك قعد فاهي فيها وما حس على عمره الى
مفلح يقول نياف: ناد امي معك
وتحنحن نياف : اميره تعالي ابيك
اميره : واقفه على باب المطبخ هلا نياف وش تبي
نياف جهزو القهوة ابوي وجدي بيجون في المجلس وقولي الى عمتي مفلح يبيها في المجلس
اميره ستغربت من نياف منول كل ماشافها قعد يطقطق عليها بـ مفلح
وراحت الى عمتها
اميره : عمه مفلح يبيك في المجلس
ام مفلح : هلا طيب وانا عمتس بجي استاذنكم يابنات
ام مقرن : اذنك معك يام مفلح
نياف جالس في المجلس وللحين تنعاد عليه شوفتها وشكل ضحكتها الي اسرت قلبه
ماحس الى ام مفلح تقول :وشلونك يانياف
نياف :هلا هلا عمه ويبوس راسها وشلونتس عساتس طيبه
ام مفلح : ولله بخير ونعمه وشلونك انت عساك جبت معدلن زين في الجامعه
نياف : الحمدالله اعلى من مفلح ويضحك
مفلح : تراه غاش مني يامه
ام مفلح اذا غاش منك وجاي اعلى منك وراك طايح
ويقعدون يضحكون
نوره : نياف القهوة
نياف :جايك جايك خليك ابيك
نياف راح لباب المجلس
نياف : نوره بسالك عندكم احد ؟
نوره : ايه سحوبه
نياف : مافيه غير سحاب بنات الجيران ماجو عندكم ؟
نوره : نياف وش فيك ماعندنا الى سحاب فيك شيء
نياف : لا وش بيكون فيني بس شفت بنت طالعه واحنا داخلين غريبه اول مره اشوفها متغطيه كلها
نوره : يمكن ام عجب كانت هينا مع عماتي
نياف : اها زين ادخلي داخل
نوره راحت مستغربه من نياف
وصلو العيال والجد وعياله وجلسو في المجلس يتقهوون وتغدو
نياف : يلا استاذنكم بنام لين العصر احس بتعب
الجد :اذنك معك وانا جدك
مقرن : الله لنا حنا لو نقول نبي نستاذن حرمتو علينا
الجد : تبي تقيل رح قيل معه من ماسك
مقرن : لا بجلس مع العيال
الجد : يلا انا بقيل بعد احس اني تعيبان
كلهم : نوم العوافي
ابو عبدالعزيز: عبد الرحمن وانا ابوك قم ناد امك واختك بنمشي حتى حنا بنمشي نستاذنك يابو مقرن تبي شيء
ابو مقرن : ابد اذنك معك وانا اخوك
نياف في غرفته ويسمع عبدالرحمن ينادي :سحاب ابوي يقول يركبون
قام نياف يبي يتاكد هي سحاب ولا لا عند شباك
ام عبدالعزيز: يلا مع سلامه تجوني شوي تعشو عندنا
ام مقرن و ام مفلح : ان شاء الله
اميره : عمه خلي سحاب عندنا ماشبعنا منها
ام عبدالعزيز: تجون شوي وتشبعون من بعض
ام مقرن : بنتعشى عندهم شوي وتشبعن من بعض
طلعت سحاب ومغطيه وجهه بطرحتها وتمشي ونياف كان واقف على شباك غرفته يبي يتاكد سحاب ولا نوره نادت سحاب ولفت سحاب وناظرت شبك غرفت نياف ولما ناظرت فيه سكر شباكه
نياف : الله يخذك شافتك الحين تقول نياف يبصبص مع شبابيك بتكرهك ياحمار
سحاب : هلا نوره وش فيك
نوره : اليوم حطي جلستنا فوق سطح نبي نستانس من زمان عن سطح بيتكم
سحاب : ان شاء الله اذا عزوز ودحوم ماجلسو فوق نظفته وجهزته لنا
ام عبدالعزيز: يلا يا سحاب سرعه
ركبو سيارتهم وحرك عبد العزيز
ابو عبدالعزيز: الى عزوز نياف وش فيه بس ساهج بفكره مهوب معنا وستغربتها عليه اليوم مهي عادتله ينام بدري
عزوز : ولله حتى انا ستغربت الظاهر متهاوش مع مفلح لانهم كانو مع بعض
ام عزوز : ولله يحليله ها نياف نسمت رحمن
ابو عزوز : ايولله تعلمو منه صيرو ريجيل تسمعون ابوي وش يقول عنكم صيرو نفس مفلح ونياف
عزوز : ولله ماقصرنا بس جدي حاطنا براسه ههههههه
كلهم ضحكو
اذن العصر
الجد : يلا الصلاة ياعيال
مفلح ومقرن في المجلس
مفلح: رح صح نياف مايحب الصلاة تطوفه
نياف داخل عليهم: عيا يجيني نوم أصلًا
مقرن : وش فيك
نياف : مدري اول مره يصير معي كذا اقوم فيني نوم واذا حطيت راسي على المخده يطير
مفلح : ولله انت غريب اليوم من وصلنا وانت منت على بعضك
نياف : يلا يلا بنصلي قبل جدي يجلدنا
مقرن يضرب مفلح على كتفه : اشك ان فيه شيء
مفلح : حتى انا استغربت مو هذا نياف الي نعرفه
وصلو المسجد
الجد : يابو مقرن روحو للبل ابو مفرح بيجي يشوف البعير يبي يشتريه وخذ مقرن معك
ابو مقرن : ابشر يبه يلا يامقرن ارواحك
مقرن : ابوي اخذ نياف ولا مفلح ولله مالي حيل تعبان من الصبح وانا اكرف
الجد : انا قلت مقرن يعني مقرن ابي نياف برسله
مقرن : زين زين يلا مشينا يابوي
الجد ومفلح ونياف راجعين للمجلس
نياف : جدي اسم وش بغيت مني
الجد : رح البيت عمك واخذ عبدالعزيز وروحو للغنم اخذو العلف في المستودع
نياف : ابشر طال عمرك
مفلح : جدي تبي مني شيء ولا اروح مع نياف
الجد : انت رح سلم عمانك
مفلح : ياجدي كل ماجيهم كل واحد يتعذر بحياته وين اروح الواضح انهم مايبوني خلني اروح مع نياف وعزوز
الجد : سلم سلام وتعال لا تقعد
مفلح : زين رايح
مفلح مايبي عمانه لان عمانه ماسالو عنه من يوم ابوه توفى ابوه توفى وهو عمره سبع سنوات ومن طفولته عايش مع خواله ومتربي مع نياف ومقرن ويعدهم اخوانه
طلع مفلح الامه ينادي يمه يمه
اميره في المطبخ تجهز قهوة جدها
اميره : نياف امي مو فيه رايحه عند ام معجب مسويه جمعه لحريم الديره عندها
مفلح : انا مفلح امي معها ؟
اميره ارتبكت يوم درت انه مفلح
مفلح : ورا ماتردين امي وين ناديها لي
اميره : عمتي مع امي عند ام معجب
مفلح : زين اذا جات قولي لها مفلح راح الى عمانه بس بيسلم عليهم ويجي جدي مرسلني
اميره : ان شاء الله
راح مفلح وهو كاره الروحه مايبي يروح الى عمانه
نوره : اميره مين تهرجين نياف
اميره : لا هذا مفلح يبي عمتي
نوره : مفلح ماشاءلله ومفلح مايدري ان عمتي عند ام معجب
اميره : مدري ذا الواضح انه مايدري
نوره : ماشاءلله بس
اميره : نوروه انقلعي عني مالي خلقك اخلص من نياف تجيني انتي
نوره : زين زين لا تعصبين بروح اجهز اغراضي عشان اذا جاء مقرن نروح الى سحوب
اميره : روحي عني
بيت آبو عبدالعزيز "
نياف يدق على عزوز مايرد دق الباب مره وعطى الباب ضهره ورجع دق الباب مره ثانيه
سحاب : مين عند الباب
نياف : انا نياف عزوز فيه
سحاب : لا طلع من شوي يقول بروح دكان حق جدي
نياف : طيب دحوم فيه
سحاب : اي نايم
نياف : وش نايم احد ينام ذا الحزه لو يدري عنه جدي ماخلا فيه عظمً صاحي صحيه بنروح للغنم
سحاب : زين دقايق الى هو طالع لك
نياف مايبي دحوم يبي عزوز بس يبي يسولف معها 🤣
طلع دحوم : نياف وش عندك
نياف يشوف ضلها ورا ألباب
نياف : احد ينام العصر
دحوم : تعبان خليتوني مع شيبان وكل شوي يدحوم و يدحوم لين انهد حيلي
نياف يضحك: محد قالك اجلس معهم كان ركبت معي
دحوم : وين بنروح الحين
نياف : اركب بنروح للمستودع ناخذ العلف وناخذ عزوز ونروح للغنم
دحوم: غريبه ماخذت مفلح
ركبو سياره قال نياف : مفلح مسكين جدي قال له رح العمانك سلم عليهم ولا يبي يروح
دحوم : ولله لو عماني عمان مفلح ولله موقف عليهم ماسالو عنه من وفاة ابوه مالومه صراحه يوم مايبيهم
نياف : ولو انهم مايبونه يسلم عليهم صلة الرحم من يقطعها
دحوم : ولله ياصلة الرحم الي مايبيني مابيه
أنت تقرأ
مـا يشابـه حضورك غيـر مـزن و غمـام أمطرت بك حضور و رحبّت بك سحاب
Poesíaنياف بطل القصة اصغر عيال حبيب مربيه الجد ويحب جده ويسمع كلمته ولا يرد له كلمه يحب النياق ويحب التعليم حلمه يكون دكتور يسافر بعثه برا سعوديه عشان يكمل مسيرته التعليميه التكمله في البارتات .... @rw.melo : حساب الانستا شاركوني ارئكم وتشبيهاتكم هنا...
