نتعرف ع العايلة الاولى
عائلة حارب بن محمد بن ال....... حارب متوفي هو وزوجته وتركو 3اولاد ووبنت واحد من اولاده من حرمته الاولى وتوفقت بعد ولادته بسنة ونص وبعدها خذ حرمته الثانية وحرمته الاولى يابت ولد وسمته محمد الي هو بوهزاع
اول بجرهم هو بوهزاع
عايشين بابوظبي ونصهم برماح الي عايشين بابوظبي هم
بوهزاع
نتعرف على عايلة بوهزاع
بوهزاع اسمه محمد وعمره 42سنة رجل اعمال طيب وحنون ويوم ينذكر اسمه بالميالس الكل يفز له باحترام وله شركة وطبعا بمشاركة اخوانه
متزوج من بنت خاله ام هزاع واسمها فطيم وهي اصغر من بو هزاع بسنتين يعني عمرها 40 سنة بس الي يشوفها يقول مستحيل ب 40 سنة حلوة طيوبة وحنونه على اولادها مثقفة خريجة دبلوم تحب القراءة ومهوووسة بالكتب وعندهم مكتبة بالبيت فيها كتب وايد طبعا هي الي شرت الكتب وتلاقيها بوقت الفراغ كل بالمكتبة
وعندها من بوهزاع 6 منه 3 اولاد و3 بنات
بجرها هو سيف وعمره 26 سنة متزوج من بنت عمه بوذياب هنودة وعمرها 25 سنةمرة طيبة وحبوبة والكل يحبها ومنها ولد واسمه محمد على اسم يده وعمره 4 سنين سيف يشتغل بالشرطة طويل حنطاوي شعره يوصل لين الرقبة اسود عيونه ناعسة عسلية وحبوب ويحب زوجته ويموت فيها ودوم قبل مايظهر من البيت لازم يتغزل في حرمته ولازم يتصل لها وهو في الدوام
من بعد سيف شما وعمرها 23 سنة خريجة باكالوريوس تشتغل بشركة ابوها لها غرفة خاصة حنونة وطيبة تحب سهيل ولد عمها بس ماتحب حد يعرف الوحيدة الي تعرف هي اختها مياسة لانها توصل لها اخباره عن طريق اخته دانة الي هي ربيعة الروح بالروح لمياسة طويلة وشعرها واصل لين الكتف لون كستنائي وعيونها ناعسات شرات اخوها سيف بلون بني
من بعد شما هزاع عمره 22 سنة وهزاع هو بطلنا خلوني اوصف لكم هزاع اوسم واحد بالعايلة وحليو وعذوب الكل طايح بهواه من وحدة تشوفه تتخبل به وتتمنى انه يكون من نصيبها خقاق شعره اسود غامق واصل لين الرقبة عيونه كبيرة ووساع بنية الخشم سيف له غمازات يوم يضحك >>>مالوم البنات يوم يحبونه له صوت حلو يوم يشل معضل وافضل عطرين له شيوخي وعود العربي مايظهر من البيت الا هو متسبح بهم يحب يروح العراقيب والكورنيش والعزبة وخاصة العزبة له حركات يعني شوي مغازلجي مركب تقويم بلون رصاصي لامع عسب يعدل من اسنانه على قولته
من بعد هزاع مياسة عمرها 20 سنة تدرس بجامعة زايد تخصص ادارة اعمال متوسطة الحجم يعني لاطويلة ولاقصيرة رشيقة بشرتها ناعمة بنيى على بياض عيونها صغار لونها بني صاحبة سوالف وضحك وخاصة يوم تكون ويا دانة بنت عمها مايخبن عن بعض ابدا كل الي يصير من بينهن لازم ينعرف
من بعد مياسة منصور عمره 18 سنة يدرس بجامعة ابوظبي تخصص ادارة اعمال مع انه ماله خص بالادارة يحب الفوتوشوب ويتفنن فيه اربع وعشرين ساعة ع النت اما للفوتوشوب او المنتديات لا طويل ولاقصير شوي مربرب شعره قصير ما يحب يطول شعره عيونه صغيرة بلون اسود
واخر العنقود مريامي شبيهة هزاع لي هالدرجة يحبها وايد عمرها 4 سنين بعمر ولد اخوها يعني ام هزاع بالاول ولدت مريامي وبعدين باسبوع ولدت هنودة ويابت محمد فتلاقيهم دوم ضرابة اذا تبا شي لازم يكون عندها او ينسمع صوتها للشارع حشرية ماتسكت الا اذا يابو لها الي تباه
وعندهم بشكارتين ميري تشتغل حق البيت وروني طباخة ودريول اسمه سلمان
ثاني عايلة هي عايلة بوسهيل
بوسهيل واسمه حمد متزوج من بنت جيرانهم طيب واب حنون يحب البنات وايد مانقول يفضلهم بس متعلق اكثر شي بالبنات وريال الكل يحترمه هو اصغر من بو هزاع ب3 سنين لان في واحد اكبر منه الي هو بوذياب
ويشتغل ويا اخوه بالشركة
ام سهيل واسمها شيخة مرة حنون وطيبة تحب تربي اعيالها ع الصح وماترضى بالغلط وماتحب تشوف بوسهيل يدلع بناته وايد ومنه 3 بنات ولد
بجرها سهيل وعمره 24 سنة يشتغل في الجيش يحب بنت عمه ومايخبر حد ابد انه يحبها ومحير لها بس هو ماخر الخطبة عسب انه هو يبا يتكفل بكل شي حنطاوي البشرة له غمازات عيونه وساع بنية اللون ملتحي ومعضل يعني نقول وسيم
وبنفس الوقت سهيلة هي التوم لسهيل وعمرها 24 سنة شبيهة اخوها تحب الطبخ طيبة وتحب اعمال المنزلية
بعد سهيلة دانة وعمرها 20 سنة بعمر مياسة تدرس بجامعة زايد نفس تخصص المياسة ربيعتها الروح بالروح مايفترقن ابد كل شي الي يصير من بينهن لازم ينعرف ومايخبن على بعض مرحة ومرتبشة دوم ماتحب الشجار او الصراخ مزوح عيونها بلون بني شعرها طويل وتحب دوم تخليه ماتربطه مع ان امها ماترضى عسب لا احد يحسده رشيقة ودلوووعة ابوها من الخاطر لان ابوها هو الي رباها عسب ان ام سهيل تعبت بولادتها فابوها هو الي اهتم بها ورعاها
واخر عنقودهم هي العنود وعمرها 7 سنين رقيص وربشة من تسمع اغنية نانسي ولا هيفا يبدا عندها الرقص بس امها ماتحب تشوفها ترقص اتم تصرخ عليها وتهاوشها بنوته حليوة تحب دوم تلعب بالماي ودلوعة ابوها بس مب اكثر عن دانة
عندهم بشكارة وحدة واسمها لونا حق البيت والطبخ مرة وحدة ماعندهم دريول الابو مايحب اييب واحد غريب بس ناوي اييب لهم وحدة تسوق السيارة عسب توصلهم للمشاوير
وهذيلا هم عايلة بو سهيل
خلونا ننتقل مرة وحدة لرماح ونتعرف على عايلة بوذياب وام غانم
وقبل ما ننتقل لرماح راح اعرفكم على اخت فطيم الي هي ام هزاع من الرضاعة مريم
عايلة بوسلطان
بوسلطان اسمه علي ريال طيب وحنون مدين دوم تلاقي القران بيده يقراه بوقت الفراغ ودوم يذكر الله مدير مدرسة بو سلطان متزوج وحدة مغربية قبل ماياخذ مريم بس توفت المغربية
تزوج مغربية وماكانت تهتم فيه ولا بعياله فاظطر انه يتزوج على راسها وحدة ثانية الي هي مريم
واعياله من المغربية
هم سلطان وعمره 27 سنة متزوج من بنت عمه واسمها امنه ومنه ولدين توم عمرهم 7 سنين بثاني ابتدائي
عبدالله وعلي حبوبين ويونسون الواحد بس دوم يضاربون بوقت الجيم اذا حد خسر يصيح وتصير مشاكل سلطان يشتغل بالاتصالات اما حرمته حاليا حامل بالشهر الخامس
وبعدها اي حمد ربيع الروح للروح لهزاع مايتفارقون ابد ابيضاني حليو اكبر من هزاع بسنة يعني 23 سنة صاحب حركات مغازلجي بس ناوي يترك هالعادة من بعد ماشاف دانة بنت عم هزاع مرة شافها بالمطبخ وتحراها ميري وراح شرب ماي وكانت مو منتبهة له ويلس عالطاولة وهو يشرب الماي فتحرى دانة هي ميري :حمد : ميري روحي زقري هزاع اي بسرعة اهني يبست مكانها دانة ماعرفت شو تسوي عصب حمد : ميري شو فيج صمخة روحي زقري وقبل مايكمل رفع راسه وانصدم يوم شاف وحدة بنت غاوية وماخاز عينه عنها دانه حست انه وقفتها غلط وظهرت برع المطبخ ومن بعدها حمد يفكر بدانة
اما عياله من مريم 2 ولد وبنت
بجرها هي الريم وعمرها 22 سنة بعمر هزاع تحب هزاع بس ماتعترف لحد وتتمنى انه يخطبها بس هي عارفة انه مستحيل لان هزاع يعتبرها شرات اخته فهي تحاول تنساه جامعية تدرس بجامعة العين لان يابت نسبة ما اهلت الها انها تدخل جامعة زايد فدخلت جامعة العين تخصص علوم انسانية
وبعد الريم سعيد عمره 18 سنة مهووس بالبلايستيشن يوم يقعد ع الجيم مستحيل ينش من اللعبة الا يوم يفوز وهو بكلية التقنية تخصص كمبيوتر ويحب ركوب الدراجات
اكيد تستغربون ليش ينادون مريم ام سلطان مع انهم هب عيالها بالعكس مريم هي اللي ربت عيال المغربية وهم صغار لان امهم بذاك الوقت ماكانت تهتم الا للموضة وخرابيطها اما التربية خلتها حق مريم تربيهم مريم ماقصرت وياهم واعتبرتهم شرات اعيالها لي درجة ينادونها بامهم وينادونها ام سلطان وام هزاع يعتبرونها شرات خالتهم
وعندهم بشكارتين نرجس للبيت وماريا حق اعيال سلطان والدريول خلف مع ان مريم تحب هاي تشتغل ما تحب الشغالة تشتغل بدالها
الحين نتعرف على عائلة بوذياب اللي في الرماح
بوذياب ريال والنعم فيه الكل يشهد له يحب حرمته ويموت فيها بس مو كثر العزبة يعشق شي اسمه عزبة وكل ويك اند تلاقيه بالعزبة اسمه عبدالله ويشتغل بالشركة بس هو يقعد بالبيت ويخلي بداله يروح ولده مبارك وذياب
ام ذياب واسمها مهرة مرة طيبة بس هذرة وايد من تسمع خبر تلاقي الخبر منتشر يعني ايلس بالبيت عسب تسمع الاخبار شو صار بالدنيا بس حبوبة والكل يحبها
ذياب هو بجرهم وعمره 28 سنة متزوج من ربيعة اخته غبيشة الهنوف يحبها ويعزها ومايروم على فراقها ومنه 3 عيال بنتين توم وولد (مهرة على اسم يدتها طيبة وحنونة تحب عمتها غبيشة وايد ودوم تلجا الها بوقت الضيق وخاصة يوم تضارب مع اختها التوم شيما وهم بنفس العمر 9 سنين شيما عين الشر بحد ذاتها ولسانها متبري منها شرات عمتها ظبية طالعة عليها واخوهم الصغير اسمه عبدالله على اسم يده حبوب وخريش ومررتبش دوم وعمره 5 سنين بالروضة
من بعد ذياب هنودة الي هي حرمة سيف
من بعد هنودة اي مبارك وعمره 24 سنة اسمراني شوي وعيونه ناعسات سودة طيب وحبوب والي بقلبه يتم مايخبر حد عنه الا اخته غبيشة ويحب بنت خالة هزاع الريم مرة شافها يوم راح يزور بيت عمهم بو هزاع وانعجب فيها ودوم يفكر فيها معضل انيق دايما وهو الصراحة غرشوب رماح
من بعد مبارك اي ميحد وعمره 23 سنة يحب اغاني ميحد ودوم يغني ولا ننسى عوده دوم وياه يدرس بجامعة الشارقة تخصص هندسة بس يدرس بايام الويك اند يروح الجامعة وباقي الايام ع العود ماله شغل بسوالف البنات
من بعد ميحد محبوبة البيت والكل يحبها غبيشة وعمرها 22 سنة لها سوالف وتضحك الي مايضحك الواحد يرتاح لها يوم يكون مضايق والبيت من دونها مو شي يعني هي الي محلية البيت وخريشة وفيها شوية خبال وبنت اخوها مهرة وايد تحبها وتتمنى تطلع شراتها تدرس بكلية التقنية بتخصص علوم زراعية تحب الزراعة
واخر عنقودهم ظبية مغرورة متكبرة ماتحب حد غير عن اخوانها متسلطة عمرها 17 سنة بثالث ثانوي ادبي تلاقيها اربع وعشرين ساعة ع التلفزيون او النت اذا شي مايعيبها تسوي مشاكل طبعا شيما ماخذة منها هالصفات يعني كريهة وشايفة نفسها وايد وتحس انها احلى البنات مربربة شوية شعرها كاري عيونها بنية صغيرة
عائلة بوغانم
اخته اسمها لطيفة متزوجة من عبدالرحمن بوغانم توفى وترك لها 3 اعيال تربيهم مرة طيبة وحبوة وحنونة واوقات مشددة بسبب الخوف على اعيالها ماتبا يطيحون او يرتكبون الغلط رفضت تتزوج من بعد بوغانم الله يرحمه وفضلت تربي اعيالها وطبعا بوهزاع مايقصر فيها دوم يطرش لها فلوس تراها اخته
بجرها غانم ووحيدها وعمره 25 سنة يشتغل في شركة عمه خريج بكالوريوس درس بالخارج يحب بنت خاله سهيلة وناوي يخطبها بس الي في القلب يتم مستور حلو غرشوب وجميل عيونه ناعسات ذباحية حنطاوي مايل للبني معضل وعنده ربيع بطي الروح بالروح دوم وياه بالعرقوب يشكي احواله حق ربيعه
بعد غانم اخته عويش مخلصة الثانوية ويالسة بالبيت ماتحب شي اسمه دراسه مع ان ماشاء الله عليها يابت نسبة حلوة في الثمانينات عمرها 21 سنة تحب الطبخ وتتفنن في الطبيخ شعرها واصل لين نص الظهر ناعم وحلو خشمها صغير مرتب وعيونها سودة
واخر عنقودهم نورة ثاني ثانوي وعمرها 16 سنة مربربة تحب الاكل ماشاء الله عليها من الاوائل تتمنى تصير دكتورة لو يابت نسبة عالية خاطرها تسافر برع تدرس مع ان هالشي مستحيل فقبلت بالواقع انها تدرس الطب بجامعة العين حلوة والي محلنها غمازاتها وجسمها ملائم تقول تبا تسوي رجيم عسب تخف لكن طبعا من تشوف الاكل تنسى كل شي وهمها الوحيد هو الاكل
هذي هي عائلة حارب بن محمد بن ال .....
وبعدين راح اعرفكم على عائلة بطلتنا بس مو الحين يوم نعرفها اكثر
