عند الحريم يالسين يرمسون عن الجارة وعن هذي فلان بنت الفلان وغيرها , وضحك وسواف وغيرها ويمهم دلة الشاي والقهوة والزعتر ... من ناحية كانت وياهم ام هزاع بس مو منتبه لهم لان كل تفكيرها بريلها .....
ام غانم : ام هزاع .....وينج عنا يالغالية ...؟
ام هزاع: وياج فديتج ...
ام ذياب : وين ويانا من ساعة واحنا نزقرج ولاتردين علينا ....؟؟؟
ام هزاع: السموحة منكن فديتكن ....
ام سهيل: لا تفكرين وايد ياام هزاع كل شي بيتصلح ياخويتي...
ام غانم : هي يام هزاع بس انتي اذكري الله وربج كريم ....
ام هزاع وبعيونها دموع: الا اله الا الله , بس هذا بوهزاع يا ام سهيل , عمري مازعلته بشي والله مو بيدي ... خالتي شيخة هي الي اصرت اني مااخبره .....الله يسامحج يا خالتيه ليتج ماحلفتيلي ...؟؟؟
ام سلطان: فديت قلبج يالغالية صلي ع النبي , روحي عنده وان شاء الله يتصلح كل شي ...
وراحت عنهم ام هزاع عسب تشوف ريلها , وهن كملن عن القيل والقال.......
ام هزاع شافت ريلها يالس على صخرة بروحه ومن شافته بهالحاله يلست تصيح , انتبه لها ابوهزاع وخاف ان فيها شي....
ابو هزاع وهو خايف عليها : بلاج يالغالية ؟ شي مستوي ؟ وليش تصيحين؟؟؟؟
ام هزاع: سامحني يابوهزاع .... ولاتحط بخاطرك علي والله كان ودي اخبرك عسب تروح لامك ,, وانت تدري اني مستحيل احرمك منها لو هي امك ,, فهي خالتيه ... وعزيزة علي...
بوهزاع وهو يمسح دموعها : لاتخافين يام هزاع وانا اسف وحقج علي , ادري اني قسيت عليج , وانتي مالج ذنب , وشرات ماقلتي امي من تقول شي لازم تسويه وهي بعد امنتج انج ماتخبريني .. واعرف انج ماتبينها تزعل منج .....خلاص فديتج مسحي دموعج تراها غالية انا مااحب اشوف دموعج تنزل ....
ام هزاع وهي تمسح دموعها : الله لايحرمني منك يابوهزاع.....
ابوهزاع: تحبيني يا ام هزاع ؟؟ ولي هالدرجة ماتبين تزعليني ....؟؟
ام هزاع وهي مستحية : اكيد يابوهزاع وانا من لي غيرك في هالدنيا انت ريلي,وحبيبي,وبوعيالي بعد, الله يحفظك ويبعد عنك كل شر ....
ابوهزاع فرحان : امين ,.... خبريني ..كيف هي امي تغيرت ولا شرات ماهي ....؟؟؟
ام هزاع: يوم اكلت الخبز تغير منه شي ...؟؟؟
ابوهزاع: لا شرات ماهو نفس الطعم ......
ام هزاع: عيل خالتي ماتغيرت وشرات ماهي , بس تدري شوي كبرت لكن مازالت رحيمة وحبوبة ....
ومن صوب ثاني عند الشباب
منصور , سعيد , مبارك , غانم , ذياب ,ميحد,حمد , هزاع, سيف, سهيل,: يالسين في الخيمة مسوينها لهم خصيصا ::::: يلسة شبابية
منصور وسعيد يالسين يلعبون بلاي ستيشن فيفا .....
حمد وهزاع ومبارك وغانم : يلعبون كيرم ..
اما سهيل فهو بعالم يفكر بشما وانه بعد العزبة راح يخطبها رسمي ويفكر انه العرس وكتب الكتاب يكون بيوم واحد ....يعني بعطلة الربيع الحبيب مستعيل
ميحد يالس ويا عوده يضرب فيه
ذياب : يالله ياميحد اطرب لنا من اغانيك ...
سيف: هي والله ياولد عمي من زمان ماسمعنا صوتك....
ميحد : شو تبون اغنيلكم ,, اي اغنية
سهيل انتبه : غن اغنية شل غشاه
هزاع : خذت قلبي
حمد شاف هزاع وفهم قصده
ميحد :تم اول بغني اغنية شل غشاه , وبعدها خذت قلبي ,, وبدا ميحد يدق ع العود
شل غشاه وشفت عينه تبتهل
يا هلا به راعي العنق الجميل
هازف"ن" عوده و خصره معتزل
نابي الردفين والمضمر نحيل
يستره طي"ن" على الردف انتشل
ماخذ"ن" وصف العتيم ووصف ليل
والخدود أقمار والمبسم عسل
وثمان"ن" مارتفع عنك الهزيل
كن في ثغره أمازيج النحل
واصدري ضان"ن" يداعبه الهديل
إن تكلم خذني بحب وغزل
همسه وصوته شفا القلب العليل
حشمته حشمه وإذا ادلع خجل
متزن روزه وفي طبعه ثقيل
صعب وأكبر من ألاعيب وحيل
وعن هواة الصيد صيده مستحيل
عاد لي وبنظرة عيونه كفل
قلبي اللي راح في وده دخيل
الوفا لأهل الوفا عز ومثل
والقناعة معدن القلب الأصيل
وطبعا صارت الخيمة كلها طرب وضحك ...
اما عند الشياب بوذياب وبو سهيل وبو سلطان يالسين يتفقدون البوش والغنم ومرة وحدة يحلبون من حليب البوش والغنم .....
