#عزيزُ_قلبي "11"
"نحن ضحايا توقعاتنا المفرطة))
واحد إنتي دافعة ليهو كل تكاليفه وأي مصيبة يعملها بتتجرجري للأقسام عشان تطلعي منها...ما قصرتي معاهو ولا في شيء..وهو شايفك مجرد واحده روحها فيهُ وما ممكن أبداً تقدر بدونه...ضامن وجودك لدرجه إنو زعلك ما بيفرق معاهو...مستنية شنو من واحد بخليك تراضي نفسك بنفسك يا وِعاد...قولي مستنية شنو !!
_دنقرت راسي تحت وحاولت أمسك دموعي أنا عارفة رحيم معاه حق وسمعت الكلام دا عدة مرات نُود شاكلتني فيه بس كمان قلبي ما كان راضي يفهم!
_عمومًا يا وِعاد أنا ما كُنت حابب أقعدك هنا وأقول ليك إنو صحبي ما يستاهل بس كمان ما هان علي أشوفك بتضيعي كدا من وراه..كل العندي قلته ليك وإنتي أدرى بعد كدا وأبصم ليك بالعشرة علاقتكم دي ما ماشة قدام خطوة وخسارة تعبك فيها.
_رحيم جاي تقول كدا يداب؟
_إنتي يا وعاد اللي بتتأخري عشان تفهمي كُل حاجة.
_رفعت راسي والدموع مالية عيوني بس كلامه هزاني وكان لازم أرد بس ما كان في كلمة مناسبة هو فعلًا أنا اللي بفهم أي شي مُتأخر.
رحيم حاسب وطلع بلا ما يودعني حتى خلاني قاعدة في مكاني مصدومة براجع حساباتي مع نفسي.
من اول ما عرفت زياد وحياتي معاه عبارة عن مشاكل..أنا اللي إفتكرت هقدر أغير منه ويكون شخص كويس عشان نكمل بس هو اللي ما حابب يتنازل أو يغيير شي.
ما بعرف كيف إتغشيت بكلامه الحلو حاليًا أنا شاكة في صدق كل الذكريات اللي كانت بينا ودي أكتر حاجة سيئة حصلت لي.
على قدر ما أحاول أتذكر ليه موقف حلو يشفع ليه جواي في صوت بقول لي كل دا كان كذب يا هبلة.
أنا فعلًا هبلة وغبية شديد في واحدة زي تقدر تغيير واحد لعيب وحريف وبيدخل تلات علاقات مع بعض زي زياد؟
كل مرة قال لي البت دي زميلة، صديقة، بعرفا ساي، وأي مُسمى أطلقه طلع يا إما كان في علاقة معاها أو بيحاول فيها.
أنا ما بس إتكسرت وقلبي وجعني أنا ما خليت جواي شي لحد غيره..حاسة إني كارهة بني أدم كلهم بي سبب زياد.
قدر شنو كان سيء وقالب حياتي أنا كتير مرات ما عرفت أفرح بكل حاجة حلوة حصلت معاي بسببه..عمري ما عانيت مشاكل قدر اللي عانيتها معاه.
زياد بياخدني من أكتر لحظاتي اللي بكون فيها رايقة ومبسوطة ويحشرني في مشاكله اللي ما بتخلص.
إتذكرت لما:
إتصل علي من نص الطلعة اللي طلعتها مع صحباتي عشان نغيير جو وطلب مني ألاقي رحيم بسرعة يديني بطاقته الشخصية أوديها ليه في مكان بعيد عشان هو ما بقدر يطلع.
كم مرة لفيت معاه الصرافات شارع شارع.
ما بحسب التعب الجسدي أنا بقول كم مرة تعبت نفسيًا معاه لما أمه عملت العملية وفضل إسبوع فاصلني..لما كان عندي إمتحانات وكنت عيانة ما قادرة أقرا وما لقيت منه أي دعم.
لما أفرح وما ألاقيه عشان يشاركني فرحتي.
لحظات كتيرة أنا حاليًا ندمانة أشد الندم عليها.
تفاصيل كتيرة سيئة ما قادرة أنساها ليه.
طلعت بعد مسافة رجعت البيت لقيت نُود لسة ما جات رقدت ما عارفة كم من الزمن كنت بفكر جديًا بعد كلام رحيم دا إن مفروض أفصل زياد وأقفل أي باب بينا ..!
