#عزيزُ_قلبي "18"
"وكُل خوفي أن يحُبك غيري))
_صباح الخير!
_صباح النور يا جميل.
_صحيت متين؟
_قبيل فقلت أعمل الشاي وبعدها أصحيك.
_كٌنت تصحيني أعمله.
_كُنتِ تصحيني أمس مش إتفقنا نسهر؟
_بس ما هان علي..كنت نايم وإنت تعبان.
_بالضبط ما هان علي..كنتِ حلوة وإنتِ نايمة شبه الأطفال كدا.
_شكله مزاجك رايق!
_قومي صلي وخلينا نشرب الشاي.
_حاضر.
بحب أجواء الفجر..بس عمري ما إتخيلت ممكن تكون بالجمال دا لما أطلع الحوش بدل ما كنت في الحمام الداخلي..سمعت صوت العصافير في شجر جيرانا..وشكل الغيوم وهي راحلة..نسمة الهواء الباردة..صفارة سيد اللبن وصرير الأبواب وهي بتتفتح..عاينت بفتحة الباب شايفة الدكاكين مزحومة وفي شُفع في الشارع ونسوان بصبحوا بعض واقفات مع سيد اللبن جا في بالي ألبس توبي وأطلع.
يمكن ما عشت حياة رفاهية للدرجة افقد التفاصيل دي بس كنت بت مدللة بتجهز في غرفتا وتطلع بالعربية من جوة البيت..الحي اللي عشت فيه ناقصه يكون حي بعد التفاصيل البسيطة اللي سحرتني دي ♡
غسلت وشي وإتوضيت صليت وفضلت في المصلاية أعوض شوية تأخيري للصبح.
جا عزيز وجاب معاه شاي وبسكويت شربنا وحكى لي هيعمل شنو في يومه وسألني عن يومي.
ما كُنت مخططة لي شي فقلت ليه بشوف بعدين.
جهز نفسه وقدمته للباب بعدها رجعت رتبت الغرفة وبخرتها ♡
تفاصيل اليوم كانت عادية لحدي قريب للفطور ما كُنت مجهزة شي عادي باقي الغدا وكنت هطلع أجيب إندومي وطعمية لقيت نساوين في الباب سلموا علي ودخلنا كانوا شايلين فطورهم وجايني.. كانوا 4 إتنين قريبات لي في العمر وواحدة خالة كبيرة والتانية أكبر مننا شوية..رفضوا أجيب شي قدر ما إعتذرت منهم فضلوا يتونسوا معاي ويعرفوني بيهم طلعوا ساكنين في البيت اللصق معاي طوالي..فطرنا وشربوا معاي القهوة وطلعوا قريب الضهر كانوا طيبات شديد وحبيت كرمهم ولطفهم رغم إنو دي كانت أكتر حاجة شايلة همها كيف أقعد براي في حتة ما بعرف فيها شخص بس الحمدلله ♡
بعد الضهر كنت عايزة اخت حنتي لما نُود إتصلت.
_يا مزة!
_قلبي.
_وصفي لي سيد الركشة دا نحن توهنا.
_جاية علي بعد الزمن دا.
_وصفي وإنتِ ساكتة.
_وصفت ليهم وأصلًا ما كانوا بعيدين من المكان 5دقايق ووصلت.
دقت الباب وقالت لي تعالي شيلي معاي.
_ما لابسة توبي يا وهم.
_امشي ألبسيه وتعالي.
_اووف نود بتتصرف من راسا نفسي يوم ما تفاجئني.
دخلت جبت توبي وجيت لقيتا بتنزل معاها مزهريات وجايبة زهور وشتلتين.
_دا شنو دا أسي؟
_ديل زهور.
_تاعبة نفسك ليه؟
_ما جبتهم ليك جايباهم لعزيز.
_عزيز لكن.
_دخلناهم وطلعت عبايتا كأنها كانت مخنوقة.
_ختي الزهور دا جمب المزيرة هناك ما يزبل بعدين حنزرعه أسي الجو سخن.
_إنتِ الجابك الزمن دا شنو؟
_لقيت نفسي مالة وما عندي موضوع قلت أتموضع بيك.
_نود إنتِ هاملة صح؟
_دي معايرة؟
_كلمتي كريم؟
_رسلت ليه ريكورد قلت ليه زهجانة هحسب 3ما رديت علي همشي لننا وهو أصلًا ما معبرني ولا داخل وبقى ما شغال بي حبه إتغيير.
_خشي خشي يا نود.
_واو البيت حلو ♡
_حلوة عيونك الشافته.
_أحييينا من عيوني.
_أنا عايزة اخت حنة داك المطبخ في باقي قهوة وفي ليمون لو عايزة.
_نفسي في حاجة بس ما عارفاها شنو.
_أبقي قابليني لما تعرفيها.
_بقيت أخش وأطلع ..
_أها قلتي لي جيتيني ليه؟
_عشان قاطعة موضوع.
_تعالي ختي معاي حنة.
_بري البهبشني حنة شنو وأنا ما معرسة.
_ما يمكن تعرسي إتعلمي فيني.
_بحنني هو بعدين.
_هتتغشي لو قال ليك كدا.
_المشكلة هو ما قال دا سيناريو زي البرسمهم في دماغي وما بحصلوا.
_الحمدلله نزلتي تعيشي معانا في عالمنا وسبتي الخيال.
_اسي أنا جايك تسرحيني الحنة شنو ليك؟
_بتحنن لراجلي إنتِ ما لقيتي تعملي شعرك إلا الليلة؟
_والله بقينا نقول راجلي.
_بطلي ياخ وتعالي ساعديني دي اول مرة أخت حنة عايزاها تطلع حلوة.
