#عزيزُ_قلبي "20"
____
عند وِعاد:
لما رغد قالت كده حسيت قلبي إتكسر..جاني إحساس ما حلو بالمرة..عاينت ليهم للمرة التانية..رحيم كان بعاين لي جوه عيوني..كان نفسي يأكد لي هو المعلومة دي.
_ده بجد ؟؟
_إتفاجأتي صح !؟
_بتعرفوا بعض من وين أصلاً !!
_هبلة أنتي..ما عرفتونا على بعض أيام بنطلع معاكم إنتي وزياد.
من كتر ما كنت مُركزة مع زياد وعلاقتي بيهٌ..ما عارفة ذاتو رغد ورحيم متين بقوا أصحاب كده..أصحاب ؟؟..لا القصة عندهم متطورة أكتر من كده.
صوتي طلع مخنوق_تتهنوا♡
_حبيبتي♡..على فكرة رحيم ح يعمل خطوة جادة بس..
_لسه شوية علينا يا رغد
_ربنا يسهل عليكم
قربت أبكي ومن جواي بقول أبكي ليه وعشان شنو وده شنو الغباء الأنا فيهٌ ده.
_يعني للدرجه دي نحنا ما جايين مع بعض
_ما فهمت !!
_يا بت ملامحك إتغيرت..ما فرحانة لينا ولا شنو ؟؟
رحيم قال ليها_وِعاد يمكن إتفاجأت بس
تلفونها رن..طوالي قامت على حيلها_ثواني بس يا شباب عشان المكالمة دي مهمه جداً..شالت تلفونها وقامت من جنبنا..حسيت النفس يدوب بيطلع..شعور إنك يدوب أكتشفت إنو في إنسان حباك بس إنت إتأخرتَ ده شعور قاسي.
_ما كلمتني إنكم متواصلين
_إفتكرتك عارفة
_يوم عزمتني القهوة
_كنت ناوي أكلمك
_رحيم ممكن سؤال !!
_أسألي أكيد
_ليك حرية الإجابة طبعاً...رحيم إنت كنت بتحبني !؟
عاين لي في عيوني وبثقة قالها_أيوة يا وِعاد كنتَ
قلبي وقع_وليه ما كلمتني !! ليه كنت ساكت كل ده !!
_حبي ليك كان واضح يا وِعاد بس أنتي الإخترتي ما تشوفي..كنت عاوز وحابب اقرب بس أنتي البتبعديني وتحرجيني..وبعدين لما قعدت مع نفسي..لقيتها صعبة علي..صعبة علي أحب واحده..كانت زولة صحبي.
دموعي نزلت_زولة صحبك !!
_صدقيني كده أفضل ليك ولي..وما تفتكري إني إرتبطت ب رغد عشان أنساك..أنا فعلاً معجب بيها♡
_كنت فاكرة إنو...أنسى
_هأنسى يا وِعاد وأنتي برضو هتنسي وكلنا هنعيش
"أحمل لك من الحب ما لا يقال ويكتب..والآن أضع القلم مٌعلناً نهايتنا التي لم يكن لها بداية"
رجعت البيت بجرجر خيبتي معاي ودموعي مالية خدي..ما عارفة كيف أستحميت ورقدت في سريري...قدر شنو العلاقات مؤذية لينا ولقلوبنا..عشان كده ربنا حرمها وقطع حبال الوصل بينا وبين الشباب..عشان ربنا عارف إننا ح نتأذي..لما قعدت مع نفسي لقيت إني انا الأذيتها..لما سلمت قلبي بيدي لإنسان ما بيستاهل..لما ختيت ثقتي كلها في واحد ما بتقارن مع الرجال..لما خنت ثقة كريم فيني ولما مليت يدي بواحد زي زياد...يمكن رحيم ما قاصد يقولها بس كلمته على قدر ما وجعتني على قدر ما صحتني من غفلتي.. "زولة صحبي"..أيوة هي كده وما عندها معنى تاني...زولة ساي..ماف شيء بينها وبين الشخص القدامها..أستاهل بتقال عني كده واستاهل الحصل لي..أنا عارفة لما أجلد ذاتي ما ح استفيد شيء...بس من اللحظة أنا لازم أكون وِعاد تانية خالص.
