حاجة من الحاجات اللي محدش كتير بيقولها، اننا بنتحول مع الوقت لابائنا وامهاتنا
ومقصدش بس في الملامح ولا طريقة المشي ولا شكل الجسم ..
يعني كل راجل لما بيكبر، لو ركز هيلاقي نفسه بيتصرف بنفس طريقة ابوه، بيقول نفس مصطلحاته، بيبرر نفس تبريراته، بيكون عنده نفس وجهة النظر بالنسبة للحياة
وكل ست لما بتكبر، بتتحول لنسخة من امها، بنفس الصفات، ونفس الافكار، ونفس طريقة التعامل مع الحياة
ودة كله بيحصل حتى لو كنا مركزين اوي اننا منطلعش زيهم .. حتى لو كان هدف حياتنا اننا نكون عكس كل حاجة شوفناها منهم .. برضو بنطلع زيهم..
هي طبعا الصورة مش قاتمة اوي كدة
وكتير اتحرروا من انهم يكونوا نسخة من ابوهم وامهم
لكن اللي عايز اقوله ان الوراثة والبيئة في اوقات كتير بيكونوا اقوى من قوة ارادتنا وفنتازياتنا عن الحياة .. عشان كدة حتى لو قدرنا نتحرر بشكل جزئي، لكن مش هنقدر نكون مختلفين عنهم 180°
يمكن بالعكس كمان .. اوقات نفورنا من شخصياتهم وصفاتهم بيكون هو السبب الاساسي اننا نطلع شبههم
(النقطة دي معقدة شوية وصعب تتفهم
بس اللي بيحصل ان لا وعينا بيحس بالذنب من كراهيتنا لابائنا، يقوم يخلينا نتصرف زيهم عشان يثبتلنا انهم مش وحشين اوي زي ما كنا فاكرين
او كنوع من انتقامنا من نفسنا لإننا جرؤنا اننا نكره آباءنا واحنا اطفال برغم كل اللي قدموه لينا)
لكن الاهم، وبعيدا عن الالاعيب النفسية دي، الوعي هو الخطوة الاولى
يعني مهم جدا اننا نبقى مدركين ان المسار الطبيعي اننا نبقى نسخة منهم ونتصرف زيهم وهنربي ولادنا بطريقتهم في تربيتنا .. وان اول خطوة في تغيير النتيجة دي اننا نفهم ان دي طبيعتنا، واننا نقدر ناخد خطوات نتغير بيها عشان نقدر نطلع بنتيجة مختلفة
والحاجة التانية اننا نعذر نفسنا .. يعني منكرهش نفسنا لما نلاقي نفسنا اتصرفنا بالشكل اللي كنا كارهينه في اباءنا .. نفهم ان دي طبيعتنا وان دة السوفت وير الخام اللي احنا نازلين بيه ..
واننا حتى لو ملقيناش نفسنا اتغيرنا تماما، الا اننا نقدر نكون افضل بنسبة بسيطة كل يوم .. ودة كفاية اوي، واكتر بكتير من اللي معظم الناس بتقدر تعمله اصلا...
