رواية جددي فيني حياتي باللقاء /للكاتبة وديمة العطا...

7

.....

رجع حمد وحصلها راقده على الكرسي ووقف يتاملها وهو ايحس بنفس الشعور الي يحسبه دايمن يوم ايشوفها قرب منها اكثر وما ستحمل نزل ايديه تحتها وشلها واتوجه للسلم عشان ايروح الدور الثاني كان يتامل ويهها والخصله الشقرا الي نزلت على طرف ويهها واول ما صعد السلم اربع سلمات ياه الصوت من وراه
ابوحمد:حمد
التفت حمد بسرعه متفاجئ بابوه وفتحت امل عيونها على قوة اللفه وتفاجئت انها قريبه وايد من صدر حمد عقبها انتبهت ان حمد شالنها
حمد:هلا ابويه
تم الاب يطالعه :ترا ماشي باقي عن الصلاه تيدد والحقنيه
حمد:ان انشالله
والتفت لامل ونزلها
حمد:وانتي ....قالولج البيت مافيه حجر عشان ترقدين في الصاله
امل بارتباك:انا انا ماحسيت وراحت عليه رقده
مشى عنهم الاب وهو ايوصي حمد:لاتتاخر عن الصلاه.......زين يوم خونت عن السريه
اختفى ابو حمد عنهم وطالع حمد امل بطرف عينه بعد ما خذ نفس
حمد:شبلاج اطالعينيه جذيه
ابتسمت امل:ماشي
وصعدت بسرعه لفوق وتم حمد واقف ايحاول ايهدي من توتره ودقات قلبه
وصلت امل لباب غرفة البنات وقبل لا تدخل رفعت ثوبها من عند الصدر وشمته
امل"اووف ريحته لصقت ههه
ودخلت داخل وهيه مستانسه
صلى حمد مع ابوه وترخص وسرح لبوظبي
.................................................. ....

عند سيارة سعيد وهو يستعد للسيره لمنطقة العين عشان ربيعه عازمنه على عرس اخوه اقترب امنه سهيل
سهيل :هاه بتمشي
سعيد وهو محتاس بالسياره ايفتح السدات ويسكرهن :هيه بتخاوينيه
سهيل:لا مقدر .....باروح اسلم على بطوي البارحه يا من السفر
سعيد:ترتووب شي فالخاطر
سهيل:هيه مر على بيت خالوه واعط العاش البوكس هذا وقلها من عند شما
سعيد:يمكن ما مر
سهيل :عيل كلم اختك واتفاهم معاها
سعيد:اوووووه هاته هاته
البوكس كان صغير بحجم كيكه صغيره
سهيل:هاه وصله قبل لاتروح العرس ...اعتقد فيه كيكه عشان ما تخيس
خذ سعيد البوكس وحطه عداله وراح وتم سهيل واقف وابتسامه اتلوح على شفايفه
في العين اتوجه سعيد على طول لبيت خالته نزل وهو شال البوكس
كانت الريم وامل والخاله قاعدات في الصاله ويتهن العاش تركض
العاش:سعيد ..سعيد ولد خالوه ياي....هههه واظن يايب معاه هديه حق حرمته
الريم كانت قاعده تقرا مجله وابد ماهزها طاريه ولا الي تقوله العاش
العاش:انتي ايه قومي ريلج عند الباب
الريم:قسمن باله ان ما سديتي ثمج ان تي هذي الجره على راسج
العاش:بسم الله ...احيدج تشردين اول يوم انقولج يا ...ولا الحين قدا عادي
الريم:عاشوووه
امل:انا باروح فوق
صعدت امل وظلت ريم مكانها والام وقفت اول ما سمعت سعيد
سعيد:هوووود
ام حمد:اقرب يا ولديه
دخل سعيد:السلام عليكم
وبعد السلام والتحفي على خالته وبنات خالته قعد سعيد وهو مستقرب اول مره ايشوف الريم في الصاله....الله يستر اكيد في خاطرها رمسه بس مش الحين ورايه عرس
سعيد:شحالكم خالوه
ام حمد:بخير فديتك انته علومك
سعيد:الحمد لله طيبه علوميه
....التفت للعاش
سعيد:العاش هاج شمووه مطرشه لج البوكس هذا
العاش:اليه انا؟؟!!!ّ
سعيد:هيه شو المناسبه مطرشين لج كيكه
العاش:والله كيكه
خذت العاش البوكس وراحت للطاوله الي يرفعون عليها المواعين
ام حمد:اقرب ياولديه.....الريم وين رايحه
الريم:باروح فوق
ام حمد:تعالي حطينا قهوه
الريم:اميه كل شي جدامج ....شو بحط بعد
سعيد:خالووه يعنيه افداج لا تكلفون على عماركم انا مستعيل باروح ربيعيه يرقبنيه بس حبيت اوصل الامانه واسلم
ام حمد:مايصير يا ولديه لازم تتقهوا.......ّ
الريم سيري سوي قهوه يديده
الريم:ان شاءالله
رجعت الريم للمطبخ
ام حمد:العاش سيري انتي بعد ساعديها
العاش:بطالع شو في البوكس؟