يا فهد صرت أشرب الماء ولا يقطع ظماي

البارت التــاسع ّ

اما عند محمد .. كان جالس مع اخوانها ولايعرف ايش يصير !
وكان يتجاهل شعور تأنيب الضمير !
لعبير و لنفسـه !
الي ضيع حب حياته و ارتبط ببنت ما يعرف
عنها اي شي .. بس عشان موقف ما كان ملزوم فيه !
.
يوم جديد .. في بيت ابو طلال .. ام ماجد كان جالس بروحها .. وفجاءه رن
الجرس ..
حست قلبها فز و اللتفت للباب .. فتحت الشغاله و كانو نوره و صمود داخلين .. ام ماجد وقفت بصدمة .. ما توقعت ابداً .. بناتي !
اما عند نوره وصمود .. كانو خجلانين و متوترين
جداً وكانها شخص غريب جداً
سلمو عليها .. ام ماجد : ليش مكلفين على انفسكم
نوره : لا كلافه ولا شي
صمود : نوره مسويته بيدينها ..
ام ماجد : الله يسلم هاليدين .. حياكم تفضلو
و جلسو وعم الهدوء ..
ام ماجد : شلون عبير عساها ازين ؟
نوره : اي الحمدلله .. وعم الهدوء مره ثانية .. و قامت صمود و قهوت امها و اختها .. و ما هي الا ثواني
و نزل ابو طلال .. و بترحيب : حيّ الله
وانا اشوف البيت منور
نوره : بـ أهله .. و اتجهو له و سلمو عليه .. ابو طلال : شلونكم و شخباركم ..
نوره : الحمدلله بخير يا جعلك بخير
ابو طلال : انتي الكبيره ؟
نوره : اي طال عمرك
ابو طلال تنهد ورجعت فيها الايام .. : كنتي الغاليّة عند جدتك
كانت ما تسولف الا فيك
نوره : الله يرحمها و يغفرلها
ابو طلال : امين يارب .. و اللتفت على صمود : عاد انتي ما شفناك
ولا نذكرك ابداً
صمود تنهدت : الله يسامح الي كان السبب .. !
ابو طلال : ما تدرون والله
نوره : ما ندري بس تظن ان فيه شي بالدنيا
يستاهل كل هذا ؟
ابو طلال : هالحين لما مرت السنين عرفت
ان صدق الدنيا ما تسوى .. صمود : ليش ؟
تكفى قل لنا ليش !!!
ابو طلال : سوالفن قديمة ما تفيد لكن
كان فيه شراكة بيني و بين جدك من سنين
و دخل الشياطن بيننّا .. وكان ببداية زواج مريم و منصور .. جدكم جلس يضغط على ابوكم يطلقها
ما يبي احفاده فيهم منّا .. و انا و تنهدت : وانا سويت سواته .. و جلست
اضغط على امكم تطلب الطلاق
لكن ما اعند من ابوكم الا امكم .. مرت السنين .. و جيتو انتو و الخلافات تزيد
ما تنقص . . شغلنا واحد .. و نتواجه
و العداوة تزيد .. و تنهد : صارت مشاكل بيينا و تدخلو ناس
واجد بس انا كنت مصّر انه هو الغلط . .
و مرت السنين و توفى ابوكم الله يرحمة .. انا هنا ما اقولكم فرحت ! لا والله ان انكسر قلبي
على بنتي الي ترملت ومعها ٥ اطفال
رحت للعزاء وانا تارك كل الخلافات و المشاكل
رحت اساندهم و اوقف معهم
و ما اقولكم كيف استقبلوني !
انا ولد الـ ***** يردوني كذا ؟
و يفشلوني كذا قدام الي يسوى والي ما يسوى !
رجعت للبيت وانا هم الدنيا على راسي !
انا الي الكل يحسب لي الف حساب
يهينوني كذا و بمجلس بيتهم !
من الغضب و الجهل الي فيني اخذت امكم
بالغصب .. ادري فيهم ما يستحملون عيال منصور .. ما كان فيه احد كلهم متزوجين و كلهم عندهم عوايل .. و مرت الايام و وصلني كلامن شيّن بأمكم من عمامكم .. هنا عاد قطعت كل العلاقات بهالعايلة
و قلت لهم عيالكم ربوهم انتو
ولا تعرفونا ولا نعرفكم ..
و عيالكم ما نبيهم .. ما هان علي جيتكم لبيتي بس لما اتذكر
فعايلهم .. وكلامهم ما احترموني ولا احترمو امكم
ولا تذكرو عشرتنا سنين مع بعض .. نوره وصمود كانو جداً متأثرين من كلامه .. ما عذروه ابداً .. هالسنين اخذت من عمرهم عمر . .
بس وضحت لهم بعض الاشياء الي كانو يسالون
أنفسهم سنين .. بـ ليش !
ام ماجد بكت بحرقة .. والذاكرة ترجع فيها سنين .. لـ الوقت الي
اخذها ابوها وترك عيالها .. ما هان عليها ابداً بالرغم من كل شي !
سمعها كلام منهم بس ما اهتمت .. كانو يكرهونها من كره ابوها
بس كان حب منصور و حب عيالها
مخليها مستحمله كل شي .. البنات ما حنّو ولا سامحوها لكن تغيرت نظرتهم لبعض الاشياء ..
.
في بيت ماجد .. شافت جالس على جواله وواضح حماسه
حست بشعور قهر !
يعني انت عادي !
و هي عادي !
وانا لا .. !!!!!!! انا حكت علي قبل لا تعرف الحقيقه حتى
و سمعتني كلام يغث !
و ضيعت حياتي .. و مستقبلي
و الان تكلمها .. !
و عادي
وبهدوء : العشاء جاهز .. محمد ما رد عليها ..
عبير بصوت اعلى : محمد العشاء
رفع راسه : طيب طيب الله يعطيك العافية .. وكمل محادثته .. عبير تنرفزت جداً وصعدت لغرفتها .
.
في بيت ابو طلال .. ماجد من دخل وهو يشوفهم كلهم متأثرين .. سلم على جده و امه برسمية جداً .. وجلس بجنب صمود وبهمس : شفيكم
صمود بضحكة تلطف الجو : نهوجس بالماضي
ماجد : اذا تبون تمشون يلا
صمود : لالا نبي نجلس شوي اذا ممكن
ماجد : طيب عادي ..
و بنفسه غريبّه !
صمود تبي تجلس وانا الي من الظهر اقنعها تجي !
وكانت رافضه تماماً .. اما عند صمود .. كانت تتأمل الانسانه الي تركتها وعمرها
سنة .. و كانت طول هالسنين تكرها اكثر .. و الان قدامك يا صمود بس مشاعرك
مو كره !
ليش !! لييييشش
اما عند نوره .. كانت هي الحنونه بينهم كلهم .. كان ودها تقوم تضمها و تقول لها يمه
مسامحينك
يمه بنترك الزعل و بنعيش حياتنا حول بعض .. ما احد يضمن عمره يوم .. اما عند ماجد
فـ حاول يفتح مواضيع مشتركة مع جده ..
.
في بيت ام ثامر .. ابتسام خلصت شغلها وكانت طالعه .. و صادفت عزوز داخل
عزوز بوقاحة : هلا بالزين
ابتسام تجاهلت .. عزوز قرب منها و سحبها بكل جراءه :
عطينا وجهه يا حلوه
ابتسام دفته بكل قوه .. و عزوز لانه ما كان بكامل وعييه .. طاح بسرعه و جلس يسبّها بـ ابشع
الالفاظ
ابتسام اخذت شنطتها الي طاحت من يدها
لما سحبها
و اتجهت للباب بكل سرعه .. و هي تكتم دموعها
و رجعت لـها ايام يحيى و وقاحته .. طلعت من البيت وهي تركض من غير
اي وجهه .. تبي تبعد عنه بس .. وكل شوي تلتفت ورا
تبي تشوف هو وراها ولا لا ..