🌺اصابتني لعنة الهرة (مكتملة)🌺

part22

الجزء الثاني والعشرون

#اصابتني_لعنة_هرة
#سناء_الصنهاجي
نجمة:اعمى بن اعمى لي كيشوف الغيام فالسما و كيدير حيكو فالما هي ديالنا كون غير بقينا فبلاصتنا نصبنا دوك لخوامي لي خديتا وبقينا تم بعدا الأمان جابلاه خلى ولقيفار كون كنا فالمدينة كون دارو بينا دياب،يلاه كملت هضرتي حتى كنشوف بلغاشي دار بينا 6 ديال رجال دورت عيني عليهم كيبان لي جوج خرين جايين وشادين شي واحد فيديهم ضاربينو حققت مزيان مايبان ليا غير سلطان منصور بداتو تكلم واحد فيهم “شكون انتوما وشنو كديرو فهاد ليل وشنو هازين معاكم فوق ديك لبهيمة باينة ماشي من هنا،سكينة حسيتها كترعد تشجعت وهضرت
نجمة:انا خالتك نجمة وهادي بنتي هازين معانا عشوب ديال لقمل ولحكة وصيبان وجدام الله يحفظنا ويحفظكم،تقدم منهم دوك جوج لي شادين سلطان شافتو سكينة يلاه اتهضر نغزتها سكتات نقز لي شاد منصور “سيدي هاد سيد لقيتو وراهم هو وشاتو وباين عليه عندو نجمة:ناري طلقو اولدي طلقو،جاوبني داك لي سولني “علاش كتعرفيه؟ نجمة:مسكين هداك سيد راه مريض بالحكةوجدام الله يحفظكم ولي مسو ايتعادا منو عاد كنا فدوار ديالهم داويناه هو وخوتو،طلق منو هداك دغية طاح حيت كانو ضاربينو لوجهو وبداو كيبعدوعلينا واحد بواحد مزادوش هضرة معانا خلاونا وهربو سالتين خايفين لانعديوهم
نجمة:سكينة أجي معايا نهزوه أجي،مشينا حدا منصور بدينا نتعافرو معاه مع هو تقيل جريناه حدا واحد شجرة كلسناه تم هزيت قرعة ديال لما رشيتو بشوية منها بدا كيحل فعينيه جا يتحرك شد فراسو من لور منصور:أححح شنو واقع؟ نجمة:انت اولدي لي شنو واقع ليك هدا غير سلطان ياحسرة خاصك تكون معلم كاع لفنون دالقتال وضارب معاهم وانت اضربوك طحتي،على فيها حجبانو منصور:منين جاني واحد فيهم فاص راه ضاربت معاهم اما منين كيجيك لغدار من لور ويغفلك فهاديك حاجة خرا سكينة:ناري جاوك من لور ضربوك شفتي امي اضلمتيه داكشي باش كيتوجع وأجي وانت أش كدير فهاد لخلة وفهاد ليل هاه منصور:كنصيد من عادتي كنخرج نصيد نجمة:ايوا الحمد لله لي لقيتينى مزال غير فهاد نواحي كدبنا عليهم حتى هربو سالتين منصور:همم هيا من عادتكم لكدوب؟ سكينة:ناس فناس ولقرع فمشيط راس هنا يلاه فكيناه كاليك مالفين بالكدوب منصور:انا غير سولتك ماشي حكمت وماشي كلت انتوما كدابات متخلطيش بين شي وشي على لعموم شكراً ليكم
نجمة:ايوا ماينسى لخير غير ولد لحرام وانت تهليتي فينا ودرتي فينا خير هادي أقل حاجة نديروها معاك حنى هاد ليلة انباتو هنا الى بغيتي بقى معانا حتى لغد ان شاء الله أش بان ليك منصور:الالة نجمة منردهاش فوجهك(فخاطرو:مزيان نيت باش نحضيكم ارباعة شلاهبية) نجمة:فخاطرها)(داكشي لي فراسك هو لي مغايكون غير بلاتي)مرحبا مرحبا،شعل منصور لعواد باش يدفاو من برد لخلاوات تجمعو على ديك لعافية كل واحد شاد خبز فيديه وكياكول نقز منصور منصور:لي يحقق فملامحكم يكول غير بنات هاربين من لمدينة
نجمة:كتبلع فريقها)ههه علاش اولدي ملامحنا باينين وحنا فنكابنا مغنبرين سكينة:هههه هادا تلف امي مابقاش كيفرق بين دوك لي عندو فلقصر وبينا حنايا لي شافة شيحاجة يكول الله يستر منصور:لا ماشي هكاك غير لقد ديالك بعد المرات تبانو كي لخواتات ماشي كيف أم وبنتها نجمة:حنا امولاي كيزوجونا هلنا بكري باش نولدو وليداتنا بكري اما مابينا وبين لمدينة غير لخير ولحسان منصور:اهم مزيان،رجع سكت كيفكر رجعات نجمة وسكينة بالور حطو راسهم على شجرة داتهم عينيهم غير سكينة لي داتها عينيها اما نجمة دايرة راسها ناعسة
ومقابلاه بنص عين كيفاش كيشوف فيهم وحاضيهم دقة لي خدا على راسو دوخاتو شوية رجع بلور وتكا مقابل مع سما حاط ايدو على كرشو كيرمش حتى داه نعاس ونعس،بقيت مقابلاه حتى عرفتو غرق فنعاس درت عند سكينة كنفيق فيها ويدي على فمها عارفاها اتفضحنا غير فاقت درت ليها بالاشارة تسكت وتنوض ورايا نضنا بشوية حيدنا بلاغينا فتحت لحماري وبشوية بدينا نتسلتو من حداه نتسلتو حتى بعدا ولعافية لي كانت شاعلة كاتبان لينا صغيرة عاد لبسنا بلاغينا وكملنا طريق
سكينة:الله ياربي واش انبقاو غاديين فهاد ليل شدني نعاس وكانت نعسة حلوة حتى فيقتيني اش بغيتي عندي؟ نجمة:اللهم نستغلو لفرصة وهو ناعس ولا حتى يفيق ومنصيبو كينديرو نزهقو،وصلنا حدا واحد البحيرة كلسنا نرتاحو غسلنا رجلينا او وجها من داك لحموم عاد رجعنا بحال بنادم سكينة:نجمة شعرك رجع كيف كان هدا كيعني نجمة:كيعني قربنا لدوار وقربنا لحنانة سكينة:فيا نعاس أختي والله وعييت ضروني رجليا نجمة:واخا اجي نرتاحو شوية ونتكاو وصباح نكملو،داكشي لي درنا تكينا تحت واحد شجرة قصيرة ونعسنا حتى لصباح.
غير بانت خيوط صباح وشمس بركات فاق سلطان منصور كيحك فعينيه بالخف كلس كيدور فراسو كاتبان ليه غير لعافية دلبارح لي طفات وهو بوحدو لي كاين طلع ليه دم كيضرب برجليه كيفاش داروها بيه وهربو وخلاوه مكانش عليه ينعس عمر شي واحد دارها بيها حتى لهاد جوجات ميمكنش…