🌺اصابتني لعنة الهرة (مكتملة)🌺

part29

الجزء التاسع والعشرون

#اصابتني_لعنة_هرة
#سناء_الصنهاجي

سكينة:أحم مدام نضتي على خير أختي اجي نوريو تواب لالة وردة تعزل وتختار،بقا هارون كيشوف فعينين نجمة لي كانو بحال شي قطة متمردة تحدي باين فعينيها وطريق لخوف مكايناش عندها طلعها من ساسهاراسها دار وخرج من لبيت،خديت نفس طويل من بعد ما توترت وتعصبت صراحة مكنتش انجاوبو ولكن هضرتو ستفزاتني بزااف مايسحابليش هكا داير،كلمني صوت رقيق وعدب وردة:لالة نجمة لاباس عليك؟
نجمة:تبسمت)لا الحمد لله الى بغيتي نشوفو تواب دابا مرحبا قولي ليا لوان لي كيعجبوك
وردة:كيعجبني الوردي ولبيض بحال ماما الله يرحمها كيكولو ليا كنشبه ليها بصح ادادة فضيلة
فضيلة:اه ابنتي بصح،غير دكرات وردة مها وتقبط قلبي وتفكرت لي خلاني نطيح على بان ليا خيالها وعلاش شيرات ليا طلعت ادي لا إراديا لعنقي لقيت سنسلة فبلاصتها ناري عندم يكونو شافوها هدا ماشي وقتها شفت فسكينة شيرت ليا براسها بمعنى لا،عاد رتاحيت
فضيلة:لالة نجمة الى كنت عيانة نخليوها لغدا حسن
نجمة:أ لالا دابا نيت انوريو لالة وردة شنو بغات،وقفت ودرت لحايك على راسي ونكابي وخرجنا على برا هزينا تواب من شواري ورجعنا دخلنا كاع تواب عجبو وردة خدات 4ديال تواب لبيض وزهري وزرق بحال لون سما ولبنفسجي بارد
فضيلة:صراحة كلشي عندكم غزاال توب ينسيك فتاني انا هدا بغيتو ليا نجمة:بصحة وراحة
فضيلة:واناخود هاد لكحل ولخزي وزرق لون ليل لهارون
نجمة:مرحبا،خداو لي بغاو من عندنا ومشات فضيلة تجيب لينا فلوسنا بقينا مع وردة
وردة:خويا هارون من نهار ماتت ماما و رؤية وهو ولا عصبي وطبعو حاد
سكينة:شكون رؤية؟
وردة:البنت لي كان مقرر ايتزوج بيها،نباها صوتو من بعيد
هارون:وردة سيري لبيتك وتعلمي متبقايش تعاودي أسرار لقصر لشيواحد لي هو غريب،درت شفت فيه مخنزرة وشفت فسكينة كنبغم نجمة:كتعاود لينا أسرار دولة مثلا بنادم وجهو صحيح مكيحشمش هارون:شنو كلتي امولات لمنادل؟درت شفت فيه نجمة:كنهضر بيني وبين راسي أمولاي كنتسارو بيناتنا وأسراري مكنعاودهمش لمن والى، شفت فسكينة ونابيتها نجمة:يلاه نتسناو على برا لحيوط عندها ودنين بغينا نهضرو كولشي كيتسمع علينا بحال لغربال لي عينيه كبار متعرفي ايمتا يولي معاك الغاشي،سبقت سكينة لبرا تبعاتني وسلطان بقا واقف ختو اكتشوف فيه وجهو ولا حمر. سكينة:واش حنا جينا باش تكولي لسيد على مو ونتهناو ولا جينا نوضو لحرب ونكلسو وسطها غير كولي ليا مافهمتكش
نجمة:هو لي كيتراض معايا بحال لولية وانا طبعي مكنسكتش وراكي عارفاني معرفتش ياختي كنقدش نسد فمي كايجيني بحال الى مستغل بلاصتو باش يهين ناس
سكينة:متنيايش كونما هو داك نهار كون شفارة دارو مابغاو فينا نجمة:منكرتش هادشي ولكن معرفتش مالو كايجيني مقيت وباسل وحاسل وعاجبو راسو بزاايد
سكينة:شفتي ختو شنو كالت ليك سيد مسكين راه مكروح جوج كرحات من مو وخطيبتو
نجمة:ولكن هادشي مايخليهش يحشي لمعاني لناس بحال الى انا لي بغيت نسخف ونترما عند رجليه عند بالو انا من داك نوع دلبنات لي دير اي حاجة باش سلطان يشوف فيها مشا بالو بعيد وبززاف
سكينة:سكتي لمرة جايا عرفي أش كتكولي بعدا جاتني ختو ضريفة نجمة:ايوا لكرش كتولد صباغ ودباغ وهداك سلطان ماشبه لجوهر غير فسبيب لي كيتزلك فيه سكينة:سكتينا راه داداه جايا،جات عندنا لالة فضيلة فضيلة:بسم الله هادا رزقكم ومولاي قاسم معيط عليكم بجوج ليلة لالة وردة مرحبا بيكم نجمة:لا مكاين لاش الالة فضيلة ربي يخليك فضيلة:لالا كلمة سي قاسم مكتنزلش الارض وعمر شي واحد نزل بيها داكشي باش نهار جمعة ان شاء الله مرحبا بيكم توقيت لمغرب هكاك يلاه تهلاو فراسكم ابنياتي،
خلاتنا لالة فضيلة ورجعات جرينا حمارنا وخرجنا من لقصر مع دورة خرجنا كيدوز عود من حدانا مطيرة لعجاجة خلانا كلنا غبابر وقف بالعود وكان سلطان هارون دار شافينا هاز حجبانو بقيت واقفة ممزحزحاش كنشوف فيه طلعني وهبطني ورجع ساك لعود ديالو بسرعة ومشا مخلي وراه غير لغبرة نجمة:تف يحساب راسو هو عنترة بن شداد على راجل كيداير ردنا كلنا غبرة بحال الى عبيد عندو سكينة:يلاه اختي راه عييت وشمس تبخات ليا قلقولتي،رجعنا لدار دخلنا غسلنا حالتنا وخرجنا مدينا رجلينا كالسين مجمعين كنهضرو على لعراضة