حكاية قمر

الفصل12

نروح لقمر
تاني يوم كانت قمر في اوضتها فاتحه حساب fake عالفيس ومنه فتحت صفحة فارس بتحاول تتطمن عليه بس لقت ان في بنت عملاله تعليقات وبتتفاعل معاه دايما فدخلت عندها وعرفت انها بنت خالته وانها ارتبطت به، فقفلت الصفحة وعينيها كلها دموع وقالت: نفسي ابقا زيك انسى في ثواني
وخرجت وقفت في البلكونه وبدأت تعيط
*********
في الوقت ده چنى كانت واقفه في بلكونتها بتكلم سيف عالتليفون بتطمن عليه وبعد ما قفلت سمعت صوت قمر وهي بتعيط فبصت جنبها عالبلكونه التانيه لقت قمر بتعيط فنادت عليها فرفعت وشها وبصتلها واول ما شافوا بعض أتفاجأوا
فقالت چنى: انتي قمر طارق
قمر: وانتي چنى اسماعيل
چنى بابتسامة: وحشتيني اوي، عامله ايه؟
مسحت قمر دموعها وقالت: الحمدلله
چنى بابتسامة: ما تيجي تقعدي معايا نتكلم شوية
قمر: طيب هستأذن واجيلك
دخلت قمر اوضتها وغسلت وشها واستأذنت والدتها تروح لچنى فسألتها نبيلة: مين چنى؟
قمر: صاحبتي يا ماما من ايام ابتدائي بس هي نقلت مدرسة تانيه
نبيلة: ياااااه ولسه فاكرين بعض
قمر: ايوه تخيلي بقا
نبيلة: وهي فين دلوقتي
قمر: ساكنه في الشقة اللي جنبنا، هروحلها بقا
نبيلة: ماشي
وراحت قمر لچنى اللي اول ما فتحتلها الباب حضنتها وقالت: وحشتيني اوي
قمر: وانتي كمان
چنى: تعالي ادخلي انا مش مصدقه
دخلت قمر بيت چنى وقعدوا يتكلموا كتير اوي وكل واحده حكت للتانيه عن حياتها وبعد شوية قالت چنى: معاكي صوره له
طلعت قمر تليفونها وفتحت صورة لفارس وناولته لچنى وهي بتقول: هو ده
بصت چنى للصوره وسألتها: وحصل ايه؟
قمر بحزن: معرفش فجأه سابني في نص الطريق ولا اداني اسباب ولا اي حاجه
چنى: اما ندل بصحيح، بكره ربنا يعوضك
قمر بحزن: يارب
چنى: هتتغدي معايا بقا
قمر: لا انتي اللي هتيجي معايا نتغدا كلنا سوا
چنى: هاستأذن من سيف طيب
قمر: ماشي ويلا قومي البسي طرحة وتعالي
اتصلت چنى بسيف واستأذنته ووافق وراحت اتغدت مع قمر وقعدت مع اهلها لحد ما سيف يرجع.....
*************************
نرجع لسيف
وقف سيف بعربيته قدام بوابة عزبة سالم المصري مستني فرد الامن يدخله وفعلا كلم فرد الامن الحج سالم اللي بلغه بسرعة انه يدخل سيف، فدخل سيف وركن عربيته ونزل الحج سالم المصري يقابل سيف بنفسه فقرب من عربيته وهو بيرحب به: يا اهلا يا اهلا بابن عشرة عمري
قفل سيف عربيته ونزل منها وحضنه وهو بيقول: ازيك يا عمي
فحضنه الحج سالم وبعدين شاور للناس انهم يجهزوا غدا بسرعه وطلعوا قعدوا في التراس يتكلموا فقال سالم: اكيد عطشان من الجو ده
سيف بعشم: اوي اوي
فنادى سالم على حد من الخدم يجيب واجب الضيافه لسيف وقعد قدامه بعد ما ناوله الماية عشان يشرب وبعد ما شرب سأله الحج سالم باستغراب: اومال فين فارس؟
سيف بابتسامة: متقلقش فارس بخير انا بس اللي نزلت اجازه
الحج سالم بقلق: ليه خير؟
سيف: ابدا والدي كان تعبان شويه
الحج سالم بعتاب: كده محدش يقولي
سيف بكسوف: حقك عليا، بس انا جاي اتكلم معاك في حاجه تانيه تخص فارس
الحج سالم بقلق: خير
رن تليفون سيف برقم مراته فاستأذن يرد عليها يطمنها وبعد ما طمنها قفل معاها وقال لسالم: احوال فارس
الحج سالم: مش فاهم؟
سيف بتنهيدة: هحكيلك كل حاجه من ساعة اخر اجازه نزلها لحد دلوقتي
الحج سالم بقلق: قول
حكاله سيف على كل حاجه واللي عمله فارس مع قمر وكمان حكاله عن علاقته ببنت خالته وسكت مستني رد الحج سالم
استغرب الحج سالم من الكلام اللي قاله سيف وسأله: انت متأكد يابني، انا ابني ميعملش كده
سيف: عمي انا اكتر واحد قاعد معاه واعرفه اكتر منك ده عشرة عمر وقولتلك عشان تعقله
الحج سالم بعصبية: اعقله!! ده انا هربيه من الاول وجديد، بقا هو فاكر ان بنات الناس لعبه ده مخافش يحصل كده في اخواته البنات
وفتح تليفونه عشان يكلمه بس سيف مسكه منه وحطه على جنب وهو بيقول: اهدا يا عمي
الحج سالم بكسوف: بقا فارس يطلع منه كل ده
طمنه سيف وقال: عاوزين نلحقه من اللي هو فيه
الحج سالم: انت تعرف البنت دي فين عنوانها؟
سيف: للاسف معرفش
وفجأه اتصل فارس على سيف فرد عليه، فشاورله الحج سالم ب: لا متقولش
وبعد ما خلص المكالمة بص لسالم وكمل كلام معاه وبعد شوية قال الحج سالم: والعمل
سيف: المهم دلوقتي بنت خالته
الحج سالم: سيبلي الحكاية دي انا هعرف اتصرف فيها
سيف: ازاي؟
فتح الحج سالم تليفونه وكلم اخت مراته وقالها تيجي هي وبنتها دلوقتي عندهم.....
*************************
نروح لفارس
كان فارس في مكتبه بيتكلم في الفون مع بنت خالته ساعة ما دخل عليه مازن وهو قلقان وقعد قدامه فبصله فارس وقفل المكالمة وسأله: مالك؟
مازن بقلق: حضرتك سمعت اللي حصل لزمايلنا على ايد الواد ده
فارس: ايوه
مازن: والعمل
فارس: هنتحرك بعد بكره نجيبه
مازن: وانا مع حضرتك؟
فارس: اكيد
فطلع مازن ورقة من جيبه وناولها لفارس وقاله: خلي الورقه دي مع حضرتك لو حصلي حاجه
اخد فارس منه الورقة وسأله: ايه اللي فيها؟
مازن بكسوف: مكسوف اقولك
فارس: قول ومتخافش
مازن: ده اعتراف مني بجوازي من حبيبتي عشان ترفع راسها قدام الناس
فارس: مش فاهم
حط مازن وشه في الارض وبدأ يعيط
فبصله فارس باستغراب وسأله: ايه الحكاية؟
مازن بكسوف: مكسوف اقولك
فارس: احكي اللي جواك ومتقلقش اعتبر انك بتتكلم مع نفسك
مازن بهدوء: انا كنت واحد مستهتر مضيع حياتي عالبنات واللعب بيهم
واتنهد وكمل: لحد ما قابلتها حبتني حب انا مستهلوش، وانا اتسليت بيها وكسرتها
بصله فارس وحس ان الكلام عليه برضه فسأله بهدوء: وبعدين؟
مازن وهو بيعيط: انا كنت ندل معاها اخدت اللي انا عاوزه وسيبتها هي تتعذب
حس فارس بشوية خوف وسأله: وليه عملت كده؟
مازن: عشان كنت طايش وفاكر ان الدنيا ملهاش اخر لكن اول ما حسيت ان الموت قريب مني عقلت
قام فارس من مكانه وقعد قدامه وسأله: انت عاوز ايه؟
مازن: فرصه اصلح غلطي واتوب انا عرفت قيمتها
ورفع راسه وقاله: تعرف يا فندم انت قدوتي، نفسي ابقا زيك ف الاخلاق والتعامل مع اللي حواليا واكيد لو في واحده في حياتك هتبقا اسعد واحده
حس فارس بحاجه غريبه جواه وبص لمازن وطبطب عليه وابتسم وقاله: متقلقش كل حاجه هتبقا كويسه
مازن: ان شاء الله
فارس: يلا قوم جمع الناس اللي هقولك عليهم عشان نجهز المأمورية وانا هكلم سيف عشان يرجع من اجازته
مازن: تمام يا فندم
ناوله فارس ورقه باسماء الناس اللي طلبهم ولما مازن خرج قعد فارس يفكر في كلامه، لحد ما تليفونه رن برقم بنت خالته فكنسل عليها واتصل بسيف اللي رد عليه فسأله: انت فين؟
سيف بكدب: انا في البيت
فارس: بكره تكون عندي، عندنا مأمورية
سيف: ماشي
وقفل معاه، اما فارس فرجع يفكر في كلام مازن وهو قلقان، لحد ما فتح تليفونه وحاول يكلم قمر....
*********************
نروح لبنت خالة فارس
بعد ما قفلت مع فارس المكالمة، دخلت عليها والدتها وسألتها: بتعملي ايه؟
مي: كنت بكلم فارس زي ما اتفقنا
سهام: وصلتي لفين معاه؟
مي: وقعته خلاص
سهام: كويس اوي، شدي حيلك بقا شوية عشان يخطبك ونخلص
مي: قريب، طالما انا طيرت البت اللي بيحبها
سهام: احسن، واهو بدل ما العز ده كله يروح لحد غريب، انتي اولى به
مي: عندك حق
وفجأه لقت سهام تليفونها بيرن برقم الحج سالم، فردت عليه وبعد ما خلصت المكالمة بصت لمي وقالت: ابو المحروس عاوزنا
مي بفرحة: اكيد فارس حكاله
زغرطت سهام وراحت غيرت هدومها وراحت هي وبنتها للحج سالم اللي اول ما شافهم كشر في وشهم وزعق في مي: ابعدي عن ابني يا حرباية.........