فَآرس ظًلُمتٌى

البارت ال9

((صدمت  سكر عندما فتح شادي عينيه فجاه فوقفت للانصراف عندما امسك شادي يدها قائلا...

شادي: استني يا سكر لو سمحتي... ممكن افهم ليه ما علقتيش لما الدكتور قالك يا مدام وهو فاكر انك مراتى... ليه ما قلتلوش الحقيقه...

سكر:سيب ايدى لو سمحت يا شادي وبعدين انا ما خدتش بالي اصلا انه قال كده.

شادي: ماشي.. هعمل نفسي مصدقك مع اني مش مقتنع تقدري بقى تفهميني ايه سر اهتمامك بيا... وايه اللي جابك اوضتي تطمني عليا..و ازاي عرفتي اني هكون تعبان ممكن تفسريلي كل ده انا عايز رد حاالا.. ومن فضلك اقعدي..

سكر: اديني قعدت عايز ايه يا شادي وليه كل الاسئله دي عادي يعني كل الحكايه اني عرفت من داده حسنيه انك ما رحتلهاش زي ما قلت ولا هي عدت عليك وانا كنت عارفه انك هتسخن وده معناه ان ما حدش معاك يراعيك يعني اكيد لازم ساعتها اجي اشوفك واطمن عليك يا بني ادم انت.. و اديني قاعده معاك اهو وسمعتك... في حاجه تانيه ولا امشي عشان انت لازم ترتاح...

شادي: علشان خاطري يا سكر خليكي معايا شويه انا من زمان ما حسيتش ان في حد مهتم بيا كده وانا تعبان قوي من اللي حصل امبارح مش الحادثه لا في حاجه ثانيه اللي تعبانى ومخنوق بسببها ومش طايق نفسي..

سكر بقلق: لا انت كده قلقتني انا مش متعوده عليك كده ايه اللي حصل فهمني..

شادي: انا برتاحلك قوي يا سكر وبحب اتكلم معاكي علشان كده هقول لك كل اللي حصل...
انا كنت امبارح عند بابا في الشركه وفضلت قاعد مستنيه لحد ما يجى وبعدين قمت دخلت الحمام في المكتب وهو جه وقتها وانا سمعت صوته و لسه بفتح الباب سمعته بيتكلم مع واحد..

سكر: واحد مين وبيقولوا ايه يخليك متضايق كده..

شادي: بابا كان جايب دكتور يا سكر وبيتفق معاه انه هيجيبله الملف الطبي بتاع شمس.. سمعته وهو بيقوله انا هجيبلك الملف الطبي بتاعها وانت كل اللي عليك انك تجيبلي عليه امضة شويه دكاتره معاك ياكدوا ان ما فيش اي امل من انها ترجع تشوف وان مشكله عماها دي عملت عندها خلل في اعصاب مخها وده يخليها مضطربه عصبيه ومش مسؤوله عن تصرفاتها اهم حاجه ان لو اي حد شاف الملف يحكم بان شمس فاقده للاهليه..حاجه كده زى شهادة معاملة الاطفال وبكده ابقى انا الواصى عليها واللى اسمه فارس ده يترمى في السجن..

سكر: يا نهار اسود هو في حد بيفكر كده احنا لازم نلحق نبلغ فارس قبل ما الملف يروح..

شادي: ما هو ده اللي مجنني يا سكر ازاي عقل بابا يوصلوا انه يعمل كده مع شمس بعد كل اللي عملته عشانا ده لولاها ولولا بيتها كان زمانا ضعنا... انا حاسس اني قليل قوي في نظر نفسي علشان مش قادر اقف قدامه وخايف اقول لفارس احسن ما يقدرش خوفي على شمس ويحرجني بالكلام عن بابا ويفكر اني متفق معاه وانا والله ما اعرف اي حاجه عن الموضوع ده غير بس امبارح..