جهاد [ كاملة ]

الجزء 5

نوميديا : ولكن نتا ما جبتيش الخيل ديالك .. كي غاتدير ليها ؟

إيثان [ شاف ناحية خيلها لي مربوط عند الشجرة ] : و الخيل ديالك لاش صالح ؟!

نوميديا [ تبلوكات ]: و..واش اتركب معايا فنفس الخيل  !! واش اتركب موراياا !! .. يعني ضهري عند صدرك !! .. لاا حراااام ما نقدرش ..

إيثان [ قطب حجبانو بعدم فهم ] : شنو لي حرام فهادشي !؟ .. عادي ما كاين تا حاجة لي حرام !

نوميديا : أكيد هادشي متوقع من مسيحي بحالك ! .. ايوا اسيدي فالدين ديالي حرام هادشي لي كايبان ليك عادي .. تا هاد الهضرة لي شادة معاك حرام غا هو جابتها الظروف غا الله يسمحليا ..

إيثان : ما فيا لي يدي و يجيب معاك فالهضرة فهاد الموضوع بالضبط حيت غير انخسرو انا و ياك ..

نوميديا : وا قولها لراسك نيت .. يالاه لا بغيتي نمشيو !

زادت بخطاويها ناحية الخيل و يالاه بغات تطلع هي اللولة .. سبقها هو و نقز فوقو واخد البلاصة للقدام ساد السراج فيديه و كايشوف فيها بابتسامة جانبية .. للحظة تخيلاتو غير فارس أحلامها لي كاتظل تتخيلو فعقلها و ترسم صورتو فمخيلتها .. يالاه كانت غاتسرح فخيالها و تغرق فبحر أحلامها معاه لي بدات كاتبنيهم من نهار جات عينيها فعينيه .. تا رجعها هو بصوتو للواقع المر لي كايضرب بأحلامها للحيط مفكرها أنهم ما يقدرو يتجمعو تحت أي اسم كان  من غير الخيانة .. إما خيانة الوطن و لا خيانة الدين ! ..

إيثان : واش غاتركبي و لا اتبقاي تاكليني بعينك !

ميقات فيه هي بلا ما تجاوبو و ركبات تاهي موراه بمساعدة منو .. ما دازوش تا خمسة دالتواني تا لقات راسها داخلة فسباق مع الريح فالسرعة .. ما عرفات باش تبلات فاش حسات براسها بحال ايلا كاتطير فالهوا و ما لقات تا حل من غير انها تشد فخصرو و تزير عليه باش ما تطيحش ، في حين هو كان فينما يشوف شي شجيرة صغيرة و لا حجرة كاينقز بالخيل عليه بالعاني باش تشد فيه .. باغي يحس بقربها لجسدو كيما حس بقربها لقلبو ..

بقاو غاديين بالزربة سامحين للهوا يداعب شعرهم و يراقصهم على نسماتو بحرية .. تا وقف إيثان الخيل فنفس البلاصة لي تلاقاو فيها أول مرة .. أو بالأصح اول مرة بالنسبة ليه حين ما عقلش عليها فالنهار لي جات عند دوك الفلاحة و هضرات معاه .. نزل هو من الخيل تحت انظارها اي حاملين الاستغراب .. دارليها إشارة بيدو باش تنزل و بالفعل جات وقفات حداه كاتتسنا أش غايقول ..

نوميديا : إيثان نطق لا بغيتي تنطق را ما خاصنيش نتعطل ! .. عمي را ايتشوش عليا !

إيثان : احم بغيت غير نسولك على [ عض على شفتو التحتانية ما عرف كيفاش غاييقولها ]

نوميديا : على شنو !!

إيثان : على دينك أ نوميديا ! .. بغيت نتعرف على الإسلام و ما لقيت حد نسولو حسن منك !