الحياة في نظر الثانوية العامية

الفصل الخامس

بدل فاقد

لأ مش فيلم أحمد عز لأ وأنما بطاقة البدل فاقد مكان بطاقتى إللى سرقها الراجل المتحمرش (المتحرش).
طبعًا أنا مكنتش عارف أبدأ منين يعنى أروح أعمل أيه وأيه الأوراق المطلوبة فطبعًا أسأل مين هسأل الخبرة كلها. لأ مش محمد صاحبى ولا مس جميلة. هسأل جوجل بسيطة عملت ريسيرش وكتبت إزاى أعمل بطاقة بدل فاقد؟
جوجل قالى:

من توافر عقد إيجار أو تمليك يوضح محل السكن
وأيضا وجود إيصال به عنوان السكن سواء كان إيصال مياه أو كهرباء أو غاز أو تليفون أرضي.

لأ يا جوجل يا حبيبي أنت فاهمنى غلط. أنا مش عايز كارنيه نادى الجزيرة. أنا عايز بطاقة الرقم القومي بدل فاقد
جوجل قالى:

وتتيح الحكومة إمكانية استخراج بدل فاقد لبطاقة الرقم القومي أونلاين دون الحاجة للذهاب إلي السجل المدني عبر منصة مصر الرقمية.

https://www.elbalad.news › ...

أونلاين يعنى وأنا قاعد مكانى أيوة كدة جوجل دلعنى دلع طب إيه الحجات دي هتتكلف كام؟!
جوجل قالى:

وفر السجل المدني التابع لوزارة الداخلية، 3 أنواع من استمارة استخراج بطاقة الرقم القومي، فهناك الاستمارة العادية وتكون رسومها 45 جنيها، على أن يستلمها بعد مرور 15 يوما، وهناك استمارة عاجلة برسوم 120 جنيها على أن يستلمها بعد مرور 48 ساعة، وأيضا هناك استمارة مميزة بسعر 170 جنيها، ويتم استلامها بعد مرور 24 ساعة.

طلما دخلنا فى موضوع المديات يبقى أسأل بابا لأن بعد ما دخلت ثانوية العامة وهو رافض أنى أرجع الشغل. يا مسهل

أنا: ياحج موضوع السجل المدنى ده هيخلص بس محتاج ٤٥جنيه

بابا: كام؟! ليه أنت هطلع كارنيه نادى الجزيرة؟!

أنا: ما أنا قولت له ياحج وهو مش مصدق

بابا: هو مين يلا؟!

أنا: جوجل يا حج

بابا: هو أنت لازم يعنى تعمل بدل فاقد دى مش لازم

أنا: يعنى يا بابا أمشى من غير بطاقة

بابا: بص هو أنت لو مُصر خلاص أدفعلك وبعد كدة أخصمهم من مصروفك.

أنا: ومين قالك يا حج أنى مُصر. عنها ما تعملت وبعدين هو إحنا هنروح حلوان كل يوم وبعدين أنا كدة كدة سبت مستر فوزى.

بابا: أحسن أنا كدة كدة مش مرتاح له طلما تبع خالتك رحاب يبقى مفيهوش خير

أنا: على رأيك ياحج طيب يا حبيبي أنا هقوم أذاكر .

بابا: ماشى يا حبيبي ربنا يوفقك