أيام العزاء
ملحوظة: أنا هتكلم عن أهم اللحظات إللى مرت عليا الفترة دى فترة الامتحانات.
ليلة الأمتحان (التربية الدينية، التربية الوطنية):
أنا فى أوضتى بجهز نفسي علشان أذاكر مواد لا تضاف للمجموع (طب هى لزمتها أيه المواد التى لا تضاف للمجموع؟! لزمتها تضيع الوقت شايفنا فاضين) شوفت الجدول بتاعى علشان أشوف المواد إللى علينا.
لقيت علينا مادة التربية الدينية (المفروض أنها تبقى أول مادة أساسية لأنها لو فضلت كدة هنفضل نتعامل مع كفار قريش دول وبعدين دول مسمينها التربية والتعليم فين التربية؟) ومادة التربية الوطنية (هاااار أسود أيه التربية الوطنية دى هو إحنا عندنا مادة بالأسم ده أنا مش المفروض علمى يعنى خلصت من التاريخ بمحمد على بعياله!) لأ دى سهرتنا لسة طويلة ده إحنا لسة هنتعرف على مادة جديدة بمنهج جديد هروح أعمل فنجان قهوة كدة علشان نبدأ التعارف.
أنا رايح المطبخ أمى شافتنى:
ماما: أنت رايح فين؟
أنا وأنا بمط جامد فى الكلام: أنا رايح أعمل فنجان قهوووووة
ماما: أيييييه!
أنا: انا رايح أجيب كوباية لبن لنفسي
ماما: ده أنا ماشربتش شاى لحد ما بقيت فى سنك. وأمى كانت بتخلينى أشربوا فى فنجان القهوة. ده أنا ماعرفتش طعم القهوة دى غير لما أتجوزت أبوك وكنت بشربها من السنة لسنة علشان صحتى علشان كدة بقيت قوية أما أنت شايف وشك أصفر إزاى شايف شعرك بدأ يقع أهو أما أنا أنا لسة بصحتى ياخويا. يا بابا أنت لسة طفل بتبنى جسمك وبتنموا
أنا: مين يا ماما إللى طفل هى دقنى دى مش مالية عينك ولا أيه ده أنا إللى قدى خطبوا (أيمن أيمون إللى زمانوا بيذاكر مع ريم مرمر دلوقتي وأنا لوحدى سنجل بائس)
ماما: بص روح أستحمى وأنضف كدة هتلاقى نفسك صافى ودماغك صافية
أنا: أنتى هتعملى رز باللبن علشان كدة مش عايزانى أقرب منوا مش كدة يا ولية؟
ماما: آه روح بس أستحمى
روحت أستحميت فعلاً كان عندها حق حاسس أنا بقى ذهنى صافى أمى دخلت الأوضة أديتنى كوباية لبن دافية قائلة لى: خد اللبن ده يدفى صدرك وأنا مش مستخسرة فيك حاجة أهو. رديت عليها: شكرًا يا ست الكل. بدأت أذاكر لكن بعد شوية عينى زغللت ليه؟ علشان الدش الدافئ مع كوباية لبن دافئ بينيم
يوم الأمتحان:
صحيت تانى يوم الصبح لقيت نفسي على المكتب وهنا أيقنت أنى مذاكرتش مادة الوطنية وسنينها جهزت نفسي بسرعة وأنا فى الأوتوبيس على أمل أنى أنقذ ما يمكن أنقاذه والحمد الله ماعرفتش أنقذ حاجة (الحقونا الحقونا بجد).
أنت تقرأ
الحياة في نظر الثانوية العامية
Humorالثانوية العامة مش صعبة ومش سهلة فى نفس الوقت لكن لو عندك هدف ومحتاج توصله أسعى وأجتهد وبرضوا مش هتوصلوا أومال أنت مفكر أيه (بهزر)
