الحبر الاسود (قطرة دم )

البارت السادس

#الحبر_الاسود
الكـاتبـة : حمـامـة الســلامْ .

#الجـزء_التاني.
'قطـرة دم''

#البارت_السادس

وردت وهي تقول : فهمني شن تبي مني بالزبط؟ .
: نبيك ونبي نحكي معاك .
قامت حواحبها بغضب وهي تقول : بعد حطيتك فالحظرر علاش تتصل ؟.
وفي نفس اللحظة فتح مالك الباب وهو عاقد حواحبه وسامع المكالمة من بدايتها ، ضيق عيونه وهو يشبح لحُور وهي من صدمتها تشبحله وحست بقلبها يوقف ،
قام حاجبه الايسر وهو يقول بملامح غضب : في من تكلمِي؟.
صكرت حور المكالمة وهي ترعش وساكتة .
علي صوته بعصبية لما قال : تكلمممي؟؟.
انتفضت حور ودموعها نزلو وهي تقول : وربي مانعرفه حظرته ورن من رقم تاني .
حط الاكياس ع الارض ونفخ بتذمر وهو يقول : تعالي وراي ، ومشي خش باتجَاه الكوجينة وحور وراه ودموعها ينزلو بصمت ، شبحاته اليديا خشت وراهم وهي تقول : خِيركم؟.
شبحلها مَالك بضيق وهو يقول : هاتي الرقم .
بلعت حور ريقها وفتحت التيلفون ومدتله ، خذي الرقم وسجله عنده واتصل بتيلفون حُور ، وعلى طول طفا مما خلاه يعرف ان الرقم حط حظر ، قام راسه وشبحلها وقال بنبرة تهديد : اقسم بالله يطلع تكلمي فيه بتشوفي شي مايعجبك .
وطلع وهو يشبح لــ اليديا بنظرات استحقار وهو قارن حواجبه بغضب .
شبحت اليديا لحُور وهي تقول : شن صار .
انهارت حور  ودموعها ينزلو وهي تقول : له ايام يتصل ونحطه فالحظر ويتصل برقم تاني هالمرة رديت ع جية مالك .
قامت اليديا حواجبها الزوز باستغراب : وليش تبكِي ؟، عارفة روحك مدرتي شي  .
شبحتلها حُور وقالت : مشفتيش قريب ياكلني.
ضحكت اليديا بهزوة وهي تشبح لتسنيم لخشت وقالت : مش ح يديرلك شي مدوريش ، وشبحت لتسنيم يلي قالت : خيركم ؟.
اليديا : مدوريش ، وسمعت طقة الباب يلي مشت فتحت وسلمت ع البنات لخشُو .
.
.
.
في شرقنا الحبيب .
فـي بـــنغــازي :-

الجو العائلي الجميل واللمة الحُلوة .
البنات كانو مقعمزات تحت شجرة ومدايرين دائرة ، وهلال وميسم شادين دربوكة وبيدربكُو ، ويعيني ع جمال الدربوكة الشرقاوية وجوهم السمح نعلي منكم يشراقة قداش نحبكم .
بدو يغنُو وكل وحدة تحط شتاوة .
ويردوو فيها مرتين ثلاثة ..
وكل مرة وحدة من البنات طلقها زغروطة تهبلل
مع عياطهم وتصفيقهم الناشط ..
وهلال يلي قعدت تغني بشتاوة وهما يرددو وراها :

ولعت ياحِي علي امها ، ولعت ياويش يملهَا .
وهما يردوو وراها ويضحكو ويصفرُو ، خلا حتى الشباب يلي من جيهة ثانية ينتبهولهم وهما يضحكُو وعاجبهم جو .

وبمجرد ما لارا شبحت مرت بوها طلقت شتاوة باعلى صوتها وهي تقول :
اس اس اس الشامت جاكن .... راكن قدامه تباكن ..
عيطت هلال بـــ : ايييييي ايي ايي .
وقعدو يخبطو عالدربوكة حسها وجعتني من كثر لحناس بتنفلق ع الزوز .
وهما شايشات ويغنُو ، لشافو سارة كيف طلعت من باب الكوجينة ع خشة صَلاح يلي تلاقُو ففم الباب وكالعادة صَلاح لازم ينابش يلي قال : دريةة .
ضحكتت سارة بخجل ، وفاتته محاولة ماتلفتش الانتباه ، وقامت راسها لما سمعت لبنات يشتّو :