بين نيران الماضي

Part 1

صـغار چنه و كُلشي
بعيون الصغار يصير چَنه
يا مراجيح الهوى لو حَـن گمـرنه .

__
بـغـداد الكَـرخ 1990

جنت راجعة من المدرسة مستلمه النتائج وفرحانة لأن نجحت للثالث متوسط ب معدل كُلش حلو اول ما رجعت للبيت كلت لـ امي و فاجئتني بـ جوابها من كالتلي

ام ميامين : ابوج ما يقبل تكملين دراسه و تقدملج واحد خوش رجال و يشتغل

اول ما سمعت هيج بجيت و صرخت
ميامين : ماااا اني اكمل دراسة شنو اتزوج بعدني صغيره اريد اكمل دراااستييي

ام ميامين : ماكو دراسة ابوج قابل و انطاهم كلمة عيب نگول الهم ما ننطي اكعدي وسكتي

عافتني و طلعت راحت تحجي وي ابويه انقهرت كُلش لأن ما يخلوني اكمل و يريدون يزوجوني غصب واني بعدني صغيره

طبعا اني عايشة ببيت ابويه هوه مزوج اثنين عددنا ٩ بنات و ٨ ولد عايشين ب بيت واحد وطبعا ابويه ميحب بنيه تكمل دراسه عنده عيب نوصل ثالث متوسط و يبطلنه

اني جنت احب الدراسة و شاطره كُلش بس حكم القوي ع ضعيف

بيوم من الايام اجه هالرجال تقدملي و ابويه وافق بدون ما ياخذ رأيي بس ما تزوجنا فسخت الخطوبة لان ما توافقنه

بعد مُده اجه شخص ثاني تقدملي اللي هوَ أحمـد من غير محافظه عن طريق زوجة اخويه

ابويه قبل بدون اي جواب مني وصارت الخطوبة واني طفله لا حول ولا قوه ...

تزوجت و استقريت ويا جانت ام زوجي ما تحبني بالبدايه واني طفلة غريبة اهلي بعيدين عليه هوَ صح انسان طبعه هادئ وحتى دوامه غير محافظة
يطلع صبح ويرجع بليل واني عايشه وي اهله بس ما حبوني لان بغداديه خلصت اول سنة من زواجي على خير بس يومية مُشكله ...

1995

صارت عندي اول بنيه سميتها مينا وفرحت بيها وهي اول فرحتي بحيث التهيت وياها و شوية تغيرت حياتي من الغربه البيها و جانت ام زوجي تخاف من مرت حماية

رجعت للبيت وهية ماقبلت انام بغرفتها لان غرفتي فوك واني ماكدر اصعد جانو يعاملوني معامله مو حلوه دوم وحدي حتى من أتمرض بديت اتأقلم كل حياتي و ربيت بنتي وحدي زوجي من الصبح لليل مو يمي و من يجي يلتهي وي اصدقائه گمت احس عنده علاقة بالعمل

صارت مشكله بيني و بينه زعلت يم اهلي مدة طويله و هوه ما بادر ولا اهتملي رجعت وحدي علمود بنتي
بنتي جانت ملاك من جمالها

بَـعد ثلاث سنوات || 1998

صارت عندي بنوته ثانيه اسمها فرح .. صارو بناتي ميونه و فروحه

بعد مدة راتب زوجي بده يقل بس صح ضروفنا مو زينة بس نطلع سفرات كل فتره ومتونسين رحنه لـ سوريا دوم جنه نروح سفرات سوا و الحمدلله ما قصر ويايه زوجي رغم انو جان وضعنا تعبان

بـ سنة الـ 2001 جبت بنوتي الثالثة جانت ثالث فرحتي و ابوها كُلش فرحان بيها جان شايلها و يفتر بيها

ميامين : شنو راح نسميها

احمد : سميتها رُسـل

صارت بنتي الثالثة رُسل والحمدلله فرحانه ب بنوتاتي جنت اشوفهن و اصفن اكول يا تُرى مصيرهن راح يكون نفس مصيري؟..

بعد فترة بدت مأساتي احمد گام يحب بنيه ويا بالعمل هالمره حبها من صدك و صارت مشاكل رحت لـ اهلي بقيت اشهر و هوه ما مهتم كالعاده يطلع وياها و متونس مع العلم بوكتها ابويه جان ميت

وصارت مشاكل بين اخواني ع البيت و الورث وهالحجي هذا اضطريت ارجع لـ عيالي لان بناتي تبهذلو رجعت بس يوميه زعلانه و ما رتاحيت و وراها بـ مده

صارت أحداث سقوط بـغـداد
احمد ترك العمل و كعد بلبيت ما يكدر يروح لبغداد وضعنا ساء بحيث بعنا السياره و غرفة النوم مالتنه وهو كاعد بدون شغل وما مهتم ابد

اني احب اهتم بروحي اعرف بالمكياج و اعرف اصبغ شعر و ميش ف فتحت صالون بغرفة صغيره بالبيت والحمدلله صارت عليه رجل حتى ملابس گمت ابيع مشت امورنا اشترينه غرفة و سياره بس تعبت بشكل ..

جنت اشتغل من الصبح لليل و اشتريت موبايل صرصور جان نطيته لـ أحمد

بيوم من الايام هوَ جان بالغرفه فوك عبالي نايم ردت اسبح ردت اطلع ملابس قبل ما افتح الباب سمعته يحجي ويه حبيبته رئستا فتحت الباب و همست بقهر

ميامين : أحمد هاي بعدك وياها مو كتلي عفتها

جاوبني بتوتر
أحمد : شبيج ميامين تره هذا صديقي

اخذت موبايله شفت رقم لكيته مُتصل بيها

أحمد : شبيج انطيني الموبايل

صحت بي و دموعي سبقتني
ميامين : انت شنو من بشر اني تعبانه اشتغل من الصبح لليل وشتريتلك موبايل تالي هم تخوني

عفته و نزلت جوه اخذت وعد على روحي بعد ما احاجي اعيش بناتي و بس

التهيت بالشغل و ويه بناتي شتريت ملابس الهن و صرت البسهن احسن لبس و ماخليتهن يحتاجن شي

2006 || دخول القاعـدة

بوكتها صار الوضع خطر صار قتل هوايه بيوم كاعدين نتريك سمعت صوت طلق گمت ادور على بناتي بخبصه طلعت بره أركض ادور عليهن و گلبي يدك بسرعه فتحت باب الشارع انصدمت من شفت ..

يتبع ..

رواية بين نيران الماضي
بــقلم ناديه صالح

لا تنسون التصويت للبارت و متابعه للحساب 🤍😍