عدالة ظالمة ⚖️
بقلم: منى الزوي ♡.
_________________
ماعلي ملام.....نهار بكيتي قتلي الشي اقسام....انكني انسيتك
(ماعلي ملام)
ماعلي اتلوم.....انكني انسيتك ياعزيز اليوم
لاتقولي عاود ونامظلوم.....ولاديرني حسبت عرب ظلام
جيتك وقتلي كل شي مقسوم...وقتلي سريب الحب غير اوهام
رديت منك ع الجفا مرغوم....واللي اتبدد ماترد اجمام
ماتلوم علي.....
عنوان الحلقه [زواج بيع ]
............
خيرالله: بعد عدا حيدر خذيت برمه ع الغلم صوت هرجه قيسهم متعاركين حطيت العلفه ومشيت شور الحوش
- كنكم ما مليتو كل يوم عركه كرهتونا العيشه
ميسون: نا قريب انهج وانخليه الكم هالبيت
حطت شالها على وجها واقعدت تبكي باتي نزل راسه يستغفر ،قعمزت يالا امي: خير يا يام ايش في خبريني منهو كايدك
ارفعت راسها وتبكي وتشهق: نبيدي معش عندي عليكم سلطه خلاص معادش عندي كلمه ولا قيمه
- خير يا يام ايش في احكيلي براحه
عطيه: دارت هالخبر كله عشان قلتلها الحاج عمر رايد سليمه وانا عطيته
جمد الدم في عروقي بحتت في باتي: من جد هالخبر؟
عطيه: هيا كلمه انا عطيته البنت بنتي ونا حر
خيرالله: عارفينها بنتك لكن الحاج عمر اكبر منك حتى انت تعطيه بنت الخمسطاش
عطيه: ما انا خذيت امك وهي صغيره
ميسون: الساعه السوده اللي خذيتك فيها قطعتني من هلي
عطيه: من اللي اهربت معاي ونست هلها يا ميسون ولا انذكرك
خيرالله: خلاص ايش جد عليكم فضولنا هالموضوع
سمعت صوت بكا لفيت لومينها سليمه كارسه في الساس تبكي يشويش وهي خايفه
صبيت وقلت ل باتي: تعال انريدك برا فكلمتين
ميسون: بنتي ماك عاطيها يا عطيه لوكان اتموت موت
عطيه: وعلي الطلاق ماتاخذ الا الحاج عمر
كريت باتي معاي: خلاص فضووووها
طلعته برا ولفيت عليه: صحيح هالكلام انت عطيتها له؟
عطيه: انعم صحيح بنتي ونا حر
- بنتك تقعد اختي والحاج عمر اكبر منك حتى انت وعنده ثلاث صبايا وبأحفاده
عطيه: الشرع محلله اربعه والراجل ربي عاطيه ما يقصر معاها اتعيش عنده احسن من عندنا
استغفرت ربي وخذيت نفس وحطيت عيني في عينه: وكان ما جا من خبرك حيدر ولد الحاج عمر خطبها مني
أنت تقرأ
عدالة ظالمة
Romanceستينات القرن الماضي. اجيال تورث الحب والعِداء،،جيل بعد جيل يولد حُب جديد في مجتمع تحكمه عادات وتقاليد ظالمه اسيظهر الحق يوماً ...ام سيعيش الناس تحت ظلم القانون... وطن ظائع وقانون ظالم.. هل أصبح القانون يجري بمراد البشر...ام انه دستور بلادي ينصر الظل...
