عدالة ظالمة

الحلقه5 ᥫ᭡

عدالة ظالمة ⚖️
الحلقه5 ᥫ᭡
بقلم: مُنى الزوي.

لايك قبل ما تقري ✨
--------

نفس اليوم تما كل يوم
ونفس الشي تما كل شي
تكر غطاك في نيتك النوم
اتجي لغطاك نومك ما يجي

............

عنوان الحلقه[عودة حيدر]
-----

خيرالله: طلعنا من حوش خالي.. علي فاصل نص الطريق هو لف ما كمل معانا خليته بكيفه مش هذا اللي يبيه باتي، شلت تبره للحوش: شيلني لسليمه انشوفها

- دوبك شايفتها مالك يومين عيب من العرب

تنهدت وادخلت للبيت

- حطيلنا الغدا
- ماتبي ترجا باتي؟
- لا حطي انتغدو نحن هو امتى ما يجي حطيله

مشت تبره شور المطبخ ريت الخبزه مغطيه في مكانها مزال: يابنت

اطلعت: نعم

- هالخبزه موش شلتيها لأمي هذي ايش دوتها

- درتها واجده قسمتها بينا وبينها
- اهاااا
مديت ايدي للخبزه كسرت منها وعزقتها ع الحطب تفحمت كليتها يابسه هكي انحبها لين جا الغدا تغديت ورقدت طول،،،وعيت على هرجة باتي وعلي يتغدو

عطيه: صار مشيت شور الغضيبه امك

بحتت فيه بطرف عيني : بالك تمشي اتراضيها واتردها

ياكل مابحت فيا بكل : اطلعت بروحها اترد بروحها، هي عاجبها قاعده كيد ع العرب

- ماهيش كيد على حد نا ولدها قاعد هي فتره واندبر اموري انطلع امي معاي

ضحك لين شرق رفعت حموديتي وطلعت من البيت مشيت شور الجامع صليت العصر طلعت منه وقفت على سوق الخضرا خذيت خضرا ولحم لبيت خالي ومشيت شورهم المزرعه مفتوحه والغلم والابل موش قاعدات قيسه شالهن موسى للشط وين ما قربت للحوش امي ومرت خالي قعدات قدام الحوش امي اتخيط ومرت خالي اتنقي في العدس
- انمسي بالخير عليكم يا هلنا
فجره: الخير منك وفيك يا باتي مرحبتين
ميسون: مراحب يانظر لعيون يا ميزتي بالدنيا النتباهى بيها
حطيت الشكاير وحبيت راس امي: كيف حالك يام

ميسون: بشوفتك طيبه يمي
فجره: ايش اللي معاك يا خيرالله ليش هالتعب ما خصنا خير نحن

- الله يدوم عزك يا خاله عارف ان المزرعه ما ناقصها خير والله

فجره: الله يسلمك يام،،تريح ياخاله اشرب طاسه شاهي

قعدت يالاهن في حوسة لخياطة والدبش

فجره: ياابنت جيبي طاسه

حط امي السلك من يدها: وكك يا فجره البنت كراعها مجروح
اتريد امي اتصبي اتجيب طاسه اطلعت علينا سبايب حيرتي ام ظفاير ماسكه في طرف الباب وين ما نظرتني ردت ادخلت: يام هاكي الطاسه