عدالة ظالمة

الحلقه6 ᥫ᭡

عدالة ظالمة⚖️

الحلقه6 ᥫ᭡
للكاتبه:  مُنى الزوي.~

.....................

رودس: مشينا شور الشط هو قدامي ونا وراه بيش ما اتجينا كلمة الناس لين ما تباعدنا من اجلوتنا اوصلنا للخلا وقف ضحكلي:  هي تعالي
ضحكت وجيته نجري وصلت يالاه رفعت راسي له:  هههههه گبيت لميه عشان نطلع انجيب اخرى

- وانا من الاذان نرجا فيك

- ع الشط؟

- لا قدام بابكم

دخل ايده في جيبه طلع برتقاله:  ومعاي هذي

- هههههههه ليش جايب وحده بس

- ناكلوها مع بعضنا انذوقو نفس الطعمه هي تعالي

خذا من يدي الدلو ومشينا شور نخل عالي قعمز تحت الشجره وبحت فيا: تعالي هي

قعمزت يالا وحطيت البرتقاله في فمي انقشر فيها تعبتني مديتها له: هاك انت قشرها گنها هكي مرخيه هيا

خذاها وقال: خلاص وقته عدا الشتاء طلع ماعاد في الا الذابل توا

- اووف تو يجي الصيف ويش يمشيه
- خير من هالصقع هلگ عظامنا
مدلي نص البرتقاله خذيتها وقعدت ناكل هوا ما كلا بحتت فيه:  كنك ما تاكل

ساكت وسارح فعيوني قطع الصمت وقال : [رودس انت حكاية روحي الوحيده]

انشوفله وساكته عيونه في عيوني انا صبيت رفعت الدلو: امي اتهزبني انكاني طولت

صبا خذا الدلو:  لا ما تهزبك تعالي انعبيلك هي وانكان انشداتك قولي زحمه باهي

- باهي

مشينا شور الشط وين ما قربنا منه قالي وقفي مكانك مشا هوا عبا اميه وجا وصلني للبيت
في الطريق سألته: ليش انتو هكي؟  ليش امكم مش معاكم

بحت فيا بطرف عينه وضحك: ليش انتي مش عارفه

- لا عندي علوم لكنهن موش كثيره خبرني انت ايش قصتكم

حكالي قصة امه وبوه وعلى غيتهم ووقت اهربت معاه وكيف كانت حياتهم مع عمامهم

- ليش جيتو هنا بعد ما كنتو مرتاحين غادي

- غادي موش هذك الراحه مافي شغل ع الاقل هنا شغل تجاره فلاحه اي شغل في الحمدالله

وصلنا قريب المزرعه عطاني الدلو:  امشي توا انا العصر جايكم اطلعيلي انشوفك

- ضحكت وعزقت ظفيرتي وراي خذيت الدلو ومشيت وانشوف وراي هو متكي ع الساس ويضحكلي

انتي حكاية روحي الوحيده

كلمته في قلبي ومسمعي كل ما انتذكرها نضحك بروحي حطيت الميه وفتحت الباب: يام ياام
اطلعت عمتي من الدار:  انعم يا عمه
- هذي لميه جبتها نعجن؟