عدالة ظالمة ⚖️
الحلقه4 ᥫ᭡
بقلم: منى الزوي ♡.
__
سليمه:
قبل ما يطلع الحاج قالي ردي للدار نا عيوني ذابله وجسمي ساخن وجعانه من جيتهم ما كليت حاجه صبيت للدار جسمي يرجف نبي بس ناكل تغطيت وقعدت نبكي
ادخلت علي صليبه: صبي يا بنت ميسون
قعمزت بسرعه انشوفلها وعيوني مدمعه ردت قالت بصوت اعلى: صبيي قلت
فزيت بسرعه عزقت البطانيه ومشيت يالاها وخايفه امسكت يدي بسرعه وكرتني وراها
- حولي كنك شن تبي
صليبه: حسك اسكتي
شالتني للمطبخ عزقتني على الوطا بقوه طحت على يدي مسكتها ونبكي قالت بصوت عالي: بسرعه اعجني وديري خبزة للعشا بعدها تعالي انقولك شن اتديري
طلعت وخلتني بروحي مطبخ كبيره في نهايتها في سطلين واحد اميه واحد صابون ومن الجهه الثانيه اسطولة الدقيق والتموين قعدت نبرم اندور في شي نعجن فيه ونرجف من الصقع لقيت طناجر بس طلعت طنجره كبيره حطيت فيها دقيق مالقيت اميه نعجن بيها دخلت عليا امنه بنت صليبه بحتت فيها فنصت
نبي انكلمها لكن خفت، بس ماعنديش حل ثاني: نبي اميه مالقيت
قالت وهيا طالعه بدون ما تلتفت عليا: امشي جيبي ولا تبيني نا نطلع
قعدت في مكاني جتني صليبه صبت وراي مدت يدها طلعت الدلو عزقاته ليا: صبي جيبي اميه
خذيته وصبيت : مانقدر نمشي انخاف
مسكت وذني: الرد اتفكيني منه اللي انقولها اتقولي حاضر امشي يلا
خذيت الدلو وطلعت بسرعه العيال الصغار يمشو وراي من صوت بكاي طلعت والدنيا ريح قويه ثببت محرمتي ومسكت الدلو زين السماء مغيمه والشجر يهتز بقوه الشوراع فاضيه
وصلت الشط حطيت الدلو وقعدت بكيت لين سدني وين ما حسيت روحي تأخرت عبيت اميه ورديت كان عندي امل انشوف خيرالله لكنه موش قاعد
الدلو ثقيل والريح قريب ترفعني نا من مكاني الميه قعدت اتصب على دبشي بعد نسرع في مشيتي متت من الصقع
من دخلت المزرعه ريت صليبه عند الباب عظامي رقدن
امصيبه عند الباب واتشوفلي بمكر: حطي لوطه
نزلت الدلو لوطه امسكت يدي وقربتني الها: ايش عندك طولتي يا قليله الحيا
- ماعندي شي جبت اميه بس والله
ضغطت على يدي ; هذا كله غير اتجيبي اميه، اهو الشط ماهوش بعيد
نا نزلت راسي نبكي وانكر في يدي منها على جية غزال
غزال: يام خليها عنك بنت صغيره
صليبه: صغيرة عمر لكنها موش صغيرة فكر ينخاف منها بنت الفلاح
اعزقتني بقوه خبطت في الساس
أنت تقرأ
عدالة ظالمة
Romanceستينات القرن الماضي. اجيال تورث الحب والعِداء،،جيل بعد جيل يولد حُب جديد في مجتمع تحكمه عادات وتقاليد ظالمه اسيظهر الحق يوماً ...ام سيعيش الناس تحت ظلم القانون... وطن ظائع وقانون ظالم.. هل أصبح القانون يجري بمراد البشر...ام انه دستور بلادي ينصر الظل...
