غرام في المترو

الفصل الرابع🚉

* الفصل الرابع *♥🚉

أشرق نور الصباح ليبدأ يوم جديد، مازالت تلتزم غرفتها منذ أن عادت بالأمس، يهرب النوم من عينيها كلما تتذكر ما سيقع به من شر علي يد هذا اللعين رجب.

"أنتي لسه نايمة؟"

كان صوت عزيزة التي ينهش القلق فؤادها علي ابنتها

جلست بجوارها والأخرى تغطي جسدها كاملاً بالغطاء لا تريد رؤية أحد

"قومي يا بنتي كولي لك لقمة، ده من إمبارح الضهر و أنتي علي لحم بطنك و نايمة"

"معلش يا أمي ممكن تسيبني لوحدي، تعبانة ومش قادرة أتكلم"

"لو تعبانة قومي أخدك علي المجمع الطبي نكشف هناك"

صاحت بالرفض وصوتها وشيك علي البكاء

"أنا تعبانة نفسياً ومحتاجة أقعد لوحدي، حرام يعني تسبوني في حالي؟!"

نهضت عزيزة وتردد بحزن

"لا حول ولاقوة إلا بالله، يارب أبعد عنها الهم والحزن وريح قلبها"

استيقظت ابتسام وخرجت علي صوت والدتها فسألتها

"في إيه يا ماما مالها غرام؟"

جلست عزيزة علي الأريكة تخبرها والشجن يغزو ملامحها

"والله ما عارفة يا بنتي إيه اللي صابها، خايفة لتكون الولية اللي اسمها رشا جرحتها بكلمة ولا عملت معاها موقف، أصل أنا عارفة أختك نفسها عزيزة أوي"

صدح جرس المنزل فقالت ابتسام

"أهي هند جت، سيبينا إحنا هنفرفشها و نقومها تخلصلك علي التلاجة"

فتحت الباب و ولجت هند تلقي عليهم تحية الصباح، و سردت لها عزيزة حال ابنتها منذ أن جاءت من الخارج بالأمس حتي الآن، فأخبرتها هند

"ما تقلقيش عليها يا خالتي، أنا وابتسام عارفين هي بتفك إزاي"

ولجت كلا من ابتسام وهند بخطوات غير مسموعة إلي غرام التي تغمض عينيها وتمنع دموعها، يكفيها بكاءً منذ البارحة

لمست هند مشغل الموسيقي علي هاتفها

وبدأت الفتاتان في الغناء بشكل كوميدي، جذبت ابتسام الغطاء من فوق شقيقتها، نهضت و ظلت تنظر إليهما بغضب لن يكتمل فتحول إلي ابتسامة ثم ضحك من أفعال صديقتها وشقيقتها وطريقة غنائهم الفكاهية

"يعني الواحد ما ينفعش يقعد مع نفسه؟!"

جلست بجوارها صديقتها و عقبت بمزاح

"أومال لازمتي كصديقة ولازمة أختك إيه لما نسيبك حزينة مع نفسك؟!، ده يبقي حتي عيبه في حقنا، ما تقولي حاجة يا بوسي"

ضحكت ابتسام بمكر

"أنا ممكن أروح لخالتي عدلات وأقولها يرضيكي نسيب غرام زعلانة، و هي مش هيرضيها، هتيجي تعمل الواجب مع غرام"