٦ شارع المنفلوطي باشا

الفيلر و البوتوكس ( الخاتمه )

قام زياد بسرعه عشان يفتح الباب و لما فتح لقي
عمتهم ووراها حسين المحامي اللي كان ماسك شغل والدهم و ٢ من الجاردات ( رجال للحمايه)
زقت الباب و دخلت و دخل الكل وراها
زياد بسخريه: ايه الدخله دي يا عبير ميصحش علي فكره دي بيوت ناس
عبير : اسمي عبير هانم يا ولد انا ميشرفنيش اني اكون عمتك حته
زياد بسخريه : طب عاوزه ايه يا عبير ياللي للأسف عمتي
قعدت عبير و قبل متقعد نصفت الكرسي و هيا قرفانه و حطت رجل علي رجل : عاوزه اللي عندكم
زياد : و ايه بقا اللي عندنا
مش كفايه سرقتي كل حاجه عاوزه مننا ايه تاني
عبير بغضب : انا مسرقتش كل ده حقي ابوك كان عاطفي و غبي و هيضيع فلوس بابي
زياد بسخريه :طب متاخدي فلوس بابي و تدينا باقي فلوس بابي احنا كمان .. فكرني كدا كانو كام يا مازن
مازن: مليون جنيه
زياد: حلال عليكي ٥ مليون و تسيبي الباقي موافقه
عبير بسخريه : مشكلتكم انكو أغبيه
زياد: لا و انتي الصادقه انتي اللي حراميه لعبتي ف دماغو ف اخر ايامو لحد معملك توكيل و سرقتي كل حاجه و خلتيها ب اسمك و سبتي كام حاجه كدا الضرايب تحجز عليهم عشان شغلك يكون ف السليم و اي فلوس ع ابويا للضرايب خلاص كدا بح
عبير بصت فالساعه: مش وقت لعب عيال انا جايه اخد حقي اللي انتو عرفينو كويس اوي كنز بابي
مازن بصوت عالي: كنز اي يا ام كنز ورحمت ابويا يا عبير لو ممشيتي انتي و الدولابين دول لمسح بيكي بلاط البيت يا عنيا
بصتلو عبير بقرف: الظاهر ان البيئه اللي حوليك اثرت عليك جامد
مازن و هو بيردح : اسم الله يا بيئه هو مش بابي اللي جايه تاخدي كنزو كان من نفس البيئه يا وليه
عبير بغضب: هيا حصلت
هنا دخلت الست سعاد و خالد ابنها: هو في اي ياسي الاستاذ زياد مازن بيزعق ليه
عبير: مبقاش كمان غير العالم البيئه دي تدخل ف كلامنا
سقفت سعاد ب ايدها : بيئه مين يا ام بيئه يا شعر عيره و حواجب ممسوحه و رموش تركيب مالك يا وليه شايفه نفسك علينا ليه منتي من نفس البيئه ياختي
مازن بتصفير : اديها يا خالتي مترحميهاش
سعاد و هيا تغمزو : امال ايه انت فاكرني هسكت ..اسمع دي كدا
مازن باهتمام : سامع
دانتي يا وليه مفكيش حاجه طبيعيه وريني كدا ياختي شفايفك اللي نطراهم علينا دول.. قولتيلي نفخاهم ب ايه
شمس بحماس: فيلر يا طنط
سعاد : اسم الله عليكي يا عيون طنت .. هو ده يابت يا شمس اللي شاده بيه وشها لحد مقرب يبقي ف قفاها
شمس بتوضيح : لا يا طنت ده بوتوكس
سعاد باستفسار : علي كدا بكام دول يابت يا شمس غاليين ولا لا اصل الراجل محروس عينو ميملهاش غير التراب عاوزه ياختي اروح انفخ
زياد بزعيق : ايه عيادة التجميل اللي قاعدين فيها دي كملي خناق
سعاد : عندك حق يا سي الاستاذ زياد
قلعت سعاد الشبشب : هاتولي بقا الوليه دي انا بقا هشد و انفخ ف امك من غير بورتكس و لا الفينر
مسكوها الجاردات و كأن حد كهربها
سعاد : انت بتمسكني انا يالا يا عرة الرجاله ايه يا ولا العضلات دي كلها ده اتلاقي كان بيفطر سندوتشين فينر كل يوم
ولااا يا خالد نادي الرجاله من ع القهوه هما خلاص طلعو روح القتال اللي جوايا
اشهد يارب قاعدين ف امان الله تجيلنا المشاكل لحد عندي
ثم وجهت كلامها لعبير : و انا بصراحه بحبها
دقايق و الصاله اتقلبت عاركه و الرجاله اللي مع عبير مبقوش قادرين يقفو ع رجلهم و سعاد راكبه ع ضهر عبير و بتشدلها الاكستنشن
سعاد : ياختي و كمان شعرك تركيب ستات هم
دقايق اخري و انفض العراك و توعدت ليهم عبير بكمية الكدمات اللي ف وشها و جسمها أنها هتحبسهم
سعاد : خدي ياختي ال ... قولتيلي اسمو اي يا شمس
شمس بانبهار: اكستنشن يا طنت
سعاد: خدي ياختي اللي قالت عليه ده و غوري ف داهيه و لو فكرتي تبلغي هنقول انك بتتهجمي علينا و عاوزه تتخانقي معايا و انا مكسورة الجناح صح يا رجاله
رد عليها كل اللي ف الصاله : صح يا خالتي احنا شاهدين
سعاد: فضولي الساحه من القتال يا ولاد عشان ده وقت غدا
يلا يا مازن نلم اثار الحرب
مازن بتزمر : هو مفيش غير مازن
سعاد: يلا و بلاش برطمه بدل مقوملك
جري مازن يعدل من شكل الصاله
سعاد: انا هدخل اجبلكم الغدا و نتغدا سوا عملالكو حلتين محشي انما ايه يستاهلو بقوكو
زياد بفرحه: مش عارف اقولك ايه والله يا خالتي انا اول مره ف حياتي احس ان ليا ضهر اتسند عليه
سعاد: اوعي تقول كدا يا واد دانتا ابني زيك زي خالد
شمس: طنط ممكن تعلميني الحركات دي بتاعتك
سعاد: شهرين زمن ف المنطقه المعفنه دي و هتتعلمي فنون القتال كلها والله ياحببتي .. لو رجعت لقيت الصاله مبتلمعش يا مازن هنسل الشبشب ع دماغك
مازن : دي هتشف و ترف يا ست المعلمين
التقطت طرحتها و لبست الشبشب و مشيت بهدوء : يلا هدخل بقا عشان العصر وجب و هجبلكو المحشي و اجي
مرت الايام و السنين و قرر زياد و اخواتو انهم مهما يبقي معاهم فلوس مش هيخرجو من المكان ده
لقي تزمر شويه من شمس بس سعاد قدرت تعوضها حنان الام و بقت صحبة سما جدا و الاتنين دخلو كلية فنون جميله جددوا البيت من اولو لاخرو و جابو عفش جديد ليهم و لست سعاد و جابو عربيه لمحروس جوزها يشتغل عليها بدل مهو قاعد مزهقها ف عيشتها و خالد خطب شمس بعد معاناه انو يأقلمها ع حياتهم و عاداتهم و تقاليدهم و زياد اتجوز سما ف سنه ٢ كليه و معاهم دلوقتي زين و مريم السنين بتجري و المنطقه حالها بقا احسن بكتير زياد و اخواتو ساعدو ف تجديد جامع و مستشفي و مدرسة غير المساعدات اللي بتروح لأي حد محتاج
المنطقه عملت اكتفاء ذاتي بمساعدة زياد و اخواتو الناس كلها بتحبهم و مبقاش في حد محتاج كل المناسبات بقت مبهجه و مليانه خير الكل بيكبر
زياد و مازن و بيرجعولهم ف كل حاجه و بالتالي مبقاش في خناق ولا مشاكل
عمتهم مقدرتش تدخل المنطقه لأنها خافت ف الاول و بعد ٨ شهور اتسجنت و الحكومه اكتشفت قضايا كتير عليها خسرتها كل حاجه لحد م ماتت ف السجن
: جميله اوي الحكايه دي يا جدو
: هيا دي حكايتكو بجد انت و جدو مازن
زياد و هو بيبلع الدوا و بيشرب مايه : و النبي معارف انا ابويا ملقاش غير الاسماء دي و النبي انا مكسوف
: هو كانت اي بقا قصة الكنز دي يا جدو
زياد: لحد الآن محدش يعرف بس اللي عرفتو من جدتكو سعاد ان من زمان بيتقال ان البيت ده في كنز لملك اسمو الكابر كان بيقدر الذكاء و بيحب الناس الاذكيه ف لما جه يموت بما انو معندوش ابن ولا زوجه و كان اخوه ظالم فعمل المتاهه دي كلها و قرر ان اللي هيعرف يحل اللغز ليه الحق انو يبقي اغني اغنياء الارض في ناس كتير حاولت تفتح الباب و ف مره اتفتح ل ٣ رجاله بس لما دخلو مرجعوش تاني معنديش اي تفسير ليه الباب اتفتحلنا و اتفتحلهم بالذات و من وقتها ياسيدي محدش جرب و احنا عشان مكناش نعرف القصه جتلنا الجرأه و نزلنا البدروم عادي
دخل مازن و هو مركب حفيدو ع ضهرو و بيلف بيه ف الصاله
مازن: يخربيتك هيجيلي الغضروف انا ناقص
امك بتاكلك ايه يا واد دانتا عجل
: مش ماما اللي بتاكلني تيتا سعاد اللي ع طول بناكلني
دخلت سعاد و شمس و خالد مسندينها و سنانها واقعه و بتتكلم بالعافيه: بتجيبو سيرتي ليه يا عيال
جريو عليها الاطفال و قال واحد منهم : احكلنا ياتيته ع خناقه من خناقاتك بليز
سعاد : ياااه فاكرين يا عيال خناقتي مع الوليه عمتكو الحربوقه الله يرحمها بقا
مازن : ياااه دانتي كنتي وتد
سعاد : و لسه وتد يا واد اقوم اوريك .... طب وحيات امي يا مازن لو مشيلتني و لفيت بيا الصاله لنسل الشبشب ع دماغك
مازن بضحك: مخلاص بقا العضمه كبرت شيليني انتي انا مش قادر ولا اقولك احكيلهم بقا ع الخناقه يلا
سعاد : بصو يا عيال كل الحكايه بدات مع الفينر و البورتكس
تمت ❤️