حب بنكهة المشاكل❤

البارت16 الاخيرة🖐

بعد مرور سنة:-

اسمهان بعد سفرتهم حملت ب توم بنات كانت متبيش تو لكن مهند كان فرحان هلبا زين خطب البنت الي يحبها سافر باش يقرا  بس رجع باش يحضر عرس اختة
سمر واسلام اتفقو انهم يتزوحو بدون عرس ويسافرو لالمانيا وقدرو يقنعو اهلهم واتزوجو بس حتى هي رجعت باش تخضر العرس حلا وجهاد قرب عرسهم

~~~~~~~~~~~~

يوم الحفلة

حلا ف دار العروسة
سمر: اهدي علاش خايفة
حلا: مش عارفة
.....وبعد مادرجوها حطوها ع المسرح وهيجو ورقصو
جنات تشبح لاسمهان ب حقد فوق ما انها خدت مهند جاية للعرس ب كل عين وقحة
هند: اسمهان خيرك
اسمهان: مشعارفة شكلي بنولد

( الكلمة هادي طول جت ف ودن جنات)

سمر: خلي اليوم يفوت وبعدين اولدي كيف ماتبي
اسمهان: خزي عليك ياكلبة

~~~~~~~~

جهاد خش رفع حلا ومشو
الصالة فضت قعدو العيلة بس يلمو ف الحاجات ويوتو ف رواحهم
جنات شبحت اسمهان: اني كلبة لو خليتك تتهني ب الي ف بطنك...وجت ضربتها تيرو علي بطنها
الكل انصدمو
اسمهان بدت تعيط وتنزل منها امية
جواهر مشت تحري لاسمهان: تي شن درتي فيها
سمر شدت جنات من شعرها: ياكلبة يابنت ال$$#&# تبي بتقتلي ولد خوي
هند اتصلت بمهند وقالتلا
مهند خش يجري: كيف صار فيها هكي
سمر: الكلبة جنات ضربتها
اسمهان تعيط: مش وقت اسئلة تو ارفعني بنمووووت

~~~~~~~
اول ماصلو استقبلوها طول ودخلوها
مهند وجواهر ومنير يراجو
مهند مقعمز ع الكرسي ويبكي ويدعي
اسمهان ف الحجرة تعيط وقريب تتقطع من الوجع
مهند يبكي: ياربي منبيش نسمع عليها خبر يبكيني يارب تنوضلي بصحتها منبيهمش الي ف بطنها اهم شي هيا منبيش نقدها زي مافقدت رنيم
~~~~~~~~

علي يضرب ف جنات: تبي تقتلي 3 ارواح باش تشبعي حقدك ياحقودة!!! شن كان قتلتيها مهند بيرجعلك!!!!
جنات: خلاص يابابا سامحني
علي: علي شن بنسامحك! تي انشاء الله ربي يسامحك
سهام: خلاص يا علي بتقتل البنت حرام عليك
علي لما تعب من الضرب حط العصا وطلع
سهام: علاش درتي هكي
جنات تبكي: هي خدت مني مهند
سهام: مهند ميبيكش كان يبيك راهو ماخطبهاش ولبسها الدبلة قدام عينك...ادعي انشاء الله ميشكوش فيك  وتنحبسي
جنات: اسكتي معاش تزيديني

~~~~~~~~~

كلهم قاعدين يراجو برا فجآة تطلع الدكتورة
كلهم التمو عليها
الدكتورة: هي حالتها تعبت هلبا والي ف بطنهاواحد قدرنا ننقدوه ووهو حالتة كويسة والتاني آسفة مقدرناش ربي يعوضكم
مهند قعمز ع الكرسي يبكي
هند نقدرو انخشولها توا
الدكتورة: لالا مازال حالتها خطيرة
مهند يبكي بدون صوت ويفكر ف اسمهان لما تسمع الخبر كيف يصير فيها
زين مستاجع عليه: مديرش ف روحك هكي يامهند اهم شي سلامتها هي

~~~~~~~~~~~~

اليوم التاني

منير: لو اسمهان ناضت وقالت بنشكي فيها ماتلقى بنتك الا ف الحبس
علي: استهدي بالله يامنير
منير: بنتك قتلت حفيدي حرقت لمهند قلبة
~~~~~~~~~~

اسمهان ناضت لقت مهند جنبها وباين عليه تاعب
مهند لما شبحهها جاها طول: اسمهان حبيبتي انت كويسة
اسمهان: مهند شن صار ف بناتنا
مهند حط راسة لوطة: قدرو ينقدو وحدة وحدة لا
اسمهان بدت تبكي وتعيط: مهند لا متقولهاش مهند لاااا
مهند: اهدي حبييتي لما تكوني انتي كويسة حنعوضوها
اسمهان: كيف نعوضوها كيييف
....وقعدت تبكي لين الدكتور خشت عليها عطتها مهدئ وبدت ترقد

~~~~~~~~~

بعد مرور ستة سنوات

مرت السنين وصارو المفاجآة نبدة ب جنات اسمهان سامحتها لكن جنات عدبها ضميرها لين لقوها منتحرة
سهام استسمحت من العيلة وسامحوها اسمهان تقبلت فكرة ان خلاص قعدت عندها بنت وحدة عايشة والحمدالله باقي شخصيات الرواية عايشين حلا حامل وسمر جابت ولد وزين مسافر يكمل ف قرايتا ف تركيا مسرة وعمر حتى هما مسافرين باش مسرة تقرا في شخصية محكيتش عليها من وفاة عبدالله الي هي(ميلودة) قلتلكم ان من وفاة عبدالله تعبت بس بعد صراع المرض توفت من سنة تقريباً

~~~~~~~~~~

العيلة كلهم متلمين ف جنان القصر ويشوو ويهدرزو
حلا: الجو مكسد بلا سمر وزين
اسمهان: بدات زين لينا ايام فاقدين الهبال متاعة
وفجآ...

يخشو سمر واسلام وزين الكل انصدمو وقعدو يسلمو بعدين قعمزو يهدرزو
سمر: الله علي القصر رايح احلا من القبل
مهند: منور ماهو فيه اسمهان
اسمهان: عارفة
زين: لا واتقة من نفسيها
الكل:🤣🤣
منير: كيف حال بوك يااسلام
اسلام: كويس الحمدالله
مهند جت عينة علي آسيا ومجد وهما يلعبو ع الدرجيحة
مجد: نوعدك لما بنكبرو شوية بنخطبك من خالي
آسيا: اني واتقة فيك
محد: بنسكنك ف اخلا من القصر هادا
مهند: هند شدي ولدك المعفن
هند: خيرا
مهند: يوعد ف بنتي بيسكنها ف قصر وبيخطبها
احمد: والله الا ولدي يعرف يختار مشاء الله
اسمهان: بس انشاء الله ميتعدبوش زي متعدبنا
مهند: اصلا مش حنخليها تتعدب وتعيش الحب بنكهة المشاكل زينا

#النهاية💕

~~~~~~~~~~

العبرة:-

1..متكونش شخص متدخل وطماع زي عبدالله بسبب افعالة مات بدون مايحسة حد
2..عمركم متكونو اشخاص حقودين وحسودين زي جنات ارضو بنصيبكم لان الحقد ميجيب ل صاحبة الا المشاكل
3..متغلطوش زي غلطة اسمهان ومهند يمكن هما قدرو يصلحوها بس في غيركم لا
4..خلو كل شي بينكم نظيف وبالحلال زي حلا وجهاد وسمر واسلام ومسرة وعمر علاقتهم كانت حلوة بدون ولا غلط

~~~~~~~~~~

وبفضل الله كملت اول رواية ليا تعبتني هلبا لان كانت عندي ظروف واطريت نقسم الحلقة علي اتنين ومرات علي تلاتة باش منطولش بس مع دالك كنت مقصرة انشاء الله تكون عجبتكم اهم شي رايكم وهل النهاية حلوة اولا ومتنسوش حتى الايك❤

دمتم في رعاية الله وحفظه💕

رواية: حب بنكهة المشاكل❤

للكاتبة: منار رمضان💗