سداد وبنت العرب

البارت الرابع والثلاثين

سداد وبنت ألعرب
البارت الرابع والثلاثين

بقلم الكاتبة الزهيريه الزهيريه

غادرت الكلاب عندما شبعت
حتمًا ستعود عندما تجوع
فعند المصالح تأتيك الكلاب مشتاقه

ألق/  مرات صير موقف بحياتنه ينطينه آمل وأنه راح تكون حياتك أفضل بس سبحان الله وبلمح البصر يجيك شخص يهدم حياتك والآمل فوگ راسك وينزلك اسفل السافلين  وآني ومن عرفت نفسي حامل بصراحة فرحت فرحه لا توصف  احس الدنيا كلها ما واسعتني من الفرحه  لإن قبل چنت افرض حبي على سداد وهو ما يقبل هسه لا غصبن عليه  ومجبر يقبل  بيه صرت واقع حال بحياته

لكن واويلي من كلمة لكن لإن تلغي كل الكلام والأحلام والأماني إلي قبلها وسردار من إتصل بيه وگلي على سالفة الإسقاط تخبلت هو اني چنت اترجى من الله أرتبط بسداد واجتني فرصة عمري  أنوب أروح بيدي إنزل الحمل هاي ألا واني مخبله 

بس أثناء كلامي ويه سردار إلي لفت إنتباهي آنه سردار چان هواي خايف ومرتبك وما معقوله هذا خوفه كله من سداد بس أحس اكو شي وضامه سردار عني وعن سداد
والا شبي مصمم ألا  ينزل الحمل

وبعدها گامت مومه دگلي ناعم في حين هي  تموت من عندي گاضيتها ويايه بس عياط وصياح ورزايل وبعد ما عرض عليه سردار انه  اسقط الحمل ب 5 ايام وتحديدًا العصر

مومه/ ألق أريد بالليل بعد ما تصعد هلات لغرفتها تنزلين أريد احچي وياچ بس بدون ما تعرف هلات بالموضوع

الق/ وعدتها إنه إنزل وهلات صارت بعد ما عرفت إني حامل أحسها گوه لازمه اعصابها لا تنفجر بأحد وحتى إلي صارت إذا احچي وياها تنتر بيه بسبب وبدون سبب بس اني چنت ابلع إهانتها إلي حالها حال كل واحد چان يهين بيه

وبيوم إلي نزلت لمومه بالليل وهي اخذتني للحديقة وهي تتلفت وعبالك احنه مجرمين شلون نسحب ونطلع من البيت ومن صرنه بالحديقه وبدت الحديث

مومه/ شوفي ألق إنتي هسه صرتي مو غريبه علينه وأريد من الله ومنچ انه تنزلين الحمل لإنه إذا ثبت عن طريق المحكمه إنتي حامل أكثر واحد راح يتأذى هو سردار

وفي وقتها كل نية سردار هو يساعد سداد لا أكثر بس الأنسان ما يعرف شنو راح يصير مستقبلًا الا لمن تنگلب عليه عاقبة الأمور

الق/ شوفي خاله اني أعزكم واحترمكم لان فتحتولي بيتكم لو ما انتوا چان اني هسه بالشارع بس الحمل ما أنزله وانتوا ليش مخلين في بالكم إنه سداد ما راح يقبل بالطفل أحتمال يقبل وحتى اذا ما قبل يبقى الطفل آني أعتني بي معليه بسداد

مومه/ ماما انتي بعدچ صغيره وگدامچ العمر كله في سبيل انه تزوجين وتخلفين وتعيشين حياة طبيعية شسوين بهذا الطفل إلي مستقبلًا راح يكون نقمه عليچ في حال سداد ما قبل بيچ منو يقبل يزوج بنيه وياه طفل فكري وقرري ترى عاجلًا أو آجلًا سداد راح يعرف بس من هسه اضمنلچ سداد ما ممكن يقبل بالطفل وبيچ وبعدين فكري وين تروحين بي منو يعيشه فكري أفضل الچ