سداد وبنت العرب

البارت السادس والاربعون

سداد وبنت ألعرب
البارت السادس و الاربعون 
بقلم الكاتبة الزهيريه الزهيريه

حين يصل الغراب لقمة الجبل
يغادرها الصقر لقناعته انها لم
تعد قمته

ألق/  مرات نمشي بمواضيع ما نعرف نهايتها لان لو نعرف نهايتها ما نمشي بيها أصلاً ونجنبها بس نرجع ونگول نظرتنه في وقت المشكله غير نظرتنه عنها بعد ما يمر فتره عليها وآني في وقت ما چنت حامل حاولت بكل جهدي إنه أريد أثبت لسداد انه اني ما خايفه منه وانه هذا ألي ببطني أبنه بس فيما بعد عرفت مثل ما يگول جدي الما يسوگه مرضعه سوگ العصا ما ينفعه

واتاكدت انه هذا المثل صحيح لان سداد اذا مو من حسن ذاته يجي عليه ويريد أبنه وما تنفع ويا لا محاكم ولا قضايا بس في وقتها أجى راس الشهر وقبضت فلوس بنت رغد إلي مخليتها يمي ورجعت أتفقت ويه المحاميه على ثاني يوم رحنه اني وجدو وانطينه المحاميه توكيل خاص

وبنفس الوقت هي گعدت تكتب صيغة الدعوه وكملتها ودخلت يم القاضي ختمها القاضي وانطى موعد للجلسة وطلعت وگالت / خلاص كملتها بقى بس يوصلهم التبليغ سردار وسداد يعني سوين تبليغين واحد لسداد واحد لسردار

الق/ بلا زحمه ست سردار ساكن في بغداد عادي نوصله التبليغ بس سداد ساكن في إربيل شلون يوصله التبليغ

المحاميه/ حبيبتي طالما سداد بأربيل خلي يسوولچ  تبليغ واحد يخاطبون بي سردار وإنه يتم من خلال سردار تبليغ سداد ويرجع موقع التبليغ من قبل سردار وتاخذي لأقرب مركز شرطة على بيتهم  وهمه يوصلون التبليغ اله ويرجعون ورقة أستلامه التبليغ جيبيها حتى نرفقها بملف القضيه

اخذت الورقة التبليغ وكملتها من المحكمه وطلعنه بيها للمركز وطبعًا المبلغ مال يمشي بدون رشوه مستحيل واخذ من عدنه 25 آلف وگال تعالوا بعد 3 ايام اخذوا ورقة أستلام التبليغ ورجعنه للبيت وجدو يحچي عليه

ويگلي جدو / بويه جولان  يصرف هلگد فلوس زين مني ما وگف گلبي ولچ شتحصلين همه اليرفعون قضايا بس بوگ فلوس انتي شكو مصخمه وجههچ ورافعه قضية  هسه خاف هذا الزلمه الكردي يجيب الأكراد ويگاومونه شلون بيك جولان وين تولي إذا اجوي عليك الأكراد

الق/ شنو يگاومونه ليش هي عشاير اني نمشي بالقانون

جدو / شوف هاي الخبله هو بقى قانون بالبلد  هسه الحكم للقوي والفقير يخلي عينه بعين الله

الق/ جدو شيريدون يسوون خلي يسوون  اني ما خايفه

وجدو سكت وبس يهز بيده وعافنه وطلع بس إذا اگول اني مو قلقه أكذب لآنه معقوله سردار وسداد راح يسكتون بس بعدين اقوي نفسي واگول آني على حق ليش خايفه يعني بين قوسين أفكاري مضاربه

ومر 3 أيام من أجى سردار لبيتنه واني ما اعرف بوجوده الا من صاح عليه جدو ورحت من دخلت شفت سردار ارتبكت بس تمالكت أعصابي ومن شفته خليت عيني بعينه بدون خوف وهو بده كلامه ويايه