سداد وبنت العرب

البارت السابع والاربعون

سداد وبنت ألعرب
البارت السابع والاربعون

بقلم الكاتبة الزهيريه الزهيريه
ليش كل ما يشعر به الآنسان
يمكنه البوح به
وحتى ان امكنه البوح
فالصمت أحياناً أكثر بلاغه من الكلمات

الق/  مرات نخطط ونصرف فلوس ونركض بموضوع ونصور خلاص هذا الشي بعد وقت قليل يصير ألي تريده بس بين لحظة والثانيه ينهد على راسك كل إلي سويته وتطلع على گولة جدو لا ابوعلي ولا مسحاته

وما بقى أيام قليله تنعد على الأصابع تفصلني عن جلسة المحكمة واني هاي الأيام كل ما يقرب موعد الجلسه يصير عندي نشاط مو طبيعي يعني شلون ماخذه جرعة المنشطات إلي ياخذوها الرياضيين  وچنت أتخيل انه من المحكمه تحكملي القضيه لصالحي راح يجي سداد يتوسل بيه ويريدني أسامحه وراح يعوضني عن كل الاذيه إلي سببه إلي الظاهر هاي تخيلات بس بخيالي المريض لآنه كل هذا ما صار والي صار الاسوء منه لإنه أخذتني العزه بالإثم

إني بعد ما اجتي اخت سداد جيهان وشگد نصحتني بس اني چنت غبيه وما عرفت مصلحتي أبد وجوابي چان الها بالرفض وهي هم استسلمت وراحت هذا كله وأني مصوره خايفين مني على أساس آني شخصيه مهمه ويخافون مني بس الظاهر آني عندي الغباء عابر الدرجه المئويه وبقى 3 أيام بس على الجلسه من ندگت الباب وجدو چان بالحمام من ثبرنه ثبيره وهو يصيح هذا ياهو اطلعن شوفن منو

طلعت وبس فتحت الباب صار بوجهي سداد طبعًا وراح بالي على أحلامي الورديه انه جاي يريدني أسامحه بس هاي الأحلام الورديه گبل صارت أحلام سوده من حچى وهو يضحك باستهزاء وبدون سلام

سداد/  زين بعدچ محتفظه بالحمل ما بقى شي راح تولدين ويطلع المعوق وضمي لكتيبة المنغولين والمخابيل العندچ بس خطيه ما راح تلحگين تضمي للكتيبه ولا تعتنين بي

الق/ وليش هو اني وين راح اولي لا تخاف راح اگابله واگعد أعتني بي حتى لو أنت نكرته ما يهمني

سداد/ البعيده غبيه لو تستغبي ما راح تلحگين تربين وتعيشين دور الأمومة لآن راح ارفع عليچ دعوه لآن إنتي تعرفين وكلش زين وما معقوله تلعبين على نفسچ انه اني ما أعرف ولا شايفچ وشفت خلقتچ من دخلنه للملهى والقينه القبض على كل الموجودين بالملهى وأنتي چنتي من ضمنهم وحمدلله حتى تسجيل كاميرات الملهى والأماكن المحيطه بالملهى صورتچ من طلعتچ شبه مصلخه لو نسيتي

الق / آني بالبدايه ظنيت انه دى يستدرجني بالحچي ودى يسجل الحچي مالتي وخصوصًا شفت الموبايل بيده
جاوبته/ انت شنو تريد تبوگ لساني على أساس انطيك اعتراف أنه اني ما أعرفك غير بيوم الدخلتوا للملهى ومو انت البعتني لغزوان

سداد/ شگد شفت اغبياء مثلچ ما شفت أبد وليش اني جاهل ومعيدي مثلچ حتى اجي احچي وياچ واسجلچ لا عيني يا جاهله بالقانون اي شي يتم تسجيله خارج إطار شركات الإتصالات لا يؤخذ بي بالمحاكم ولا يعتبروا دليل بس حبيت ابشرچ إنه تم إلقاء القبض على غزوان وأعترف انه جميله باعتچ اله وألي باعچ الجميلة هو صاحبچ إلي نهزمتي ويا هيثم وبگتي فلوس عمچ نزار آلي بعدين هو بدوره وتحت تهمتچ الكاذبه اخذ الفلوس مني فهمتي يا غبيه وغزوان وجميلة اعترفوا عليچ