سداد وبنت العرب

البارت السابع عشر

سداد وبنت ألعرب
البارت السابع عشر
بقلم الكاتبة الزهيريه الزهيريه

اشتقت لشخص اعجز عن مدى اشتياقي له
فقط أكتفي بالصمت من شدة حنيني اليه

ألق/ مرات الظروف تخليك تحتاج ناس  ما تكون الك سابق معرفه ويكون عندك آمل عسى يساعدوك  بس ردة فعلهم غير متوقعه واني من دخلوا الجماعه المسلحه علينه مثل آي حدث بالعراق دائمًا الرؤوس الچبيره تخلص نفسها واليوگع بيها الفقير واحنه بوضعنه غزوان والزبائن ويا نهزموا واحنه البنات وگعنه بيها  آني عمري كله ما متعرضه لمنظر إطلاق النار ابد ما شايفه هيچ شي إضافةً الى اني أبد ما شايفه ناس تصوب ودم  عبالك جبهة ونفتحت علينه  هذا كله كفيل إنه يخليني عقل ما ظل براسي واكو أثنين يتحاچون بينهم واني خفت لا ياخذوني مثل ذني البنات بس من بست ايده وتوسلت بي ردة فعله ذهلتني  ضربني من قوة ضربته إذني طلع منها دم وهذا الولد الضربني چان يحچي ويه ولد ثاني بس كردي وهذا الولد الثاني أجى گومني من الگاع وعرفت فيما بعد إسمه  اوزجان  من گومني طلع مناديل ورقية  وانطاني
وهذا الضربني ما افهم منه غير بس كلمة إيدز

وبعدها طلعونه كلنه واكو سيارات هواي وتم نقلنه لمكان فيما بعد عرفت أنه مقر لقوات البيشمركة وخلونه بزنزانة وآني حالي حال كل البنات الجابوهن نبچي  وأعرف شگد مر وقت حتى دخلن بنات إثنين يحچن كردي ويباوعن علينه واكو بعدهن هم دخلن أثنين يدفعن بعربانه وبيها جدور وگامن يصبن شوربه وكل وحده من عدنه ينطوها ماعون شوربه وصمونه وهن بعدهن يحچن بالكردي وبعدها طلعن وأني بالنسبه عني گد ما بچيت دموعي نشفن اجتي يمي

أريج / وگعنه بيد الما يرحمون تدرين هنا راح ينلعب بينه طوبه ذوله قوات البشمركة وخصوصًا لكون احنه عرب

الق/ ادري حتى هنا اكو تفرقه شو احنه بالحضيض يعني هذا الطيحان حظ هم بي أكراد وعرب

أريج/  هسه شوفي اكو ويانه بنات كرديات راح يطلعن ونوگع بيها احنه صدگ ألق انتي من يا محافظه

ألق/ اني من بغداد ساعة الگشره الطلعت بيها من بيت عمي صدگ شر أهون من شر الله لا يوفقك هيثم كون الله يحرگك بتيزاب على السويته بيه

أريج/ اني من الكوت تدرين ألق اذا تعرفين منو باعني هنا مصدگين اني الباعني أخويه بعد ما مات أبويه عافنه اني وأخواتي وأمي برگبة أخويه بالبداية چان زين بس بعدها سلك طريق الدمبله ونطلب على عدد راسه بعنه بيتنه وسددنه بس ما نسد غير ربع المبلغ وبعدها باعني لرجال چبير بالعمر وهو ذاك الرجال باعني هنآ باربيل وصار تقريبًا 3 أشهر ما أدري بأهلي ولأ اعرف شي عنهم وهنا ممنوع تستعملين الموبايل بأمر من غزوان واذا يلگون موبايل عند وحده اعتبريها اختفت من الدنيا كلها

ألق/ اني اريد اعرف شنو راح يسوون بينه

أريج/ بعد ما يخلصون تحقيق ويانه كل وحده يرحلوها على محافظتها