" ကိုယ်စောင့်နေတာ ကြာနေပြီ "
ထင်း အခန်းထဲဝင်ဝင်လာချင်း ကျွန်တော် ပြောလိုက်မိတဲ့စကား ။ ကျွန်တော့်ရဲ့အသံက နည်းနည်းတော့ အီစီကလီသံဖြစ်နေမှာပါ ။ ထင်းရဲ့မျက်ခုံးတွေကအပေါ်ဘက်ကိုတက်သွားသလို လက်မှာပတ်ထားတဲ့နာရီကိုလဲ ငုံ့ကြည့်လိုက်ပြီးမှ ကျွန်တော့်ကိုပြန်ကြည့်ပုံက အချိန်ကွက်တိရောက်လာကြောင်း အသံတိတ်ပြောပြနေသလို ။
ထင်းက သူ့ပုံစံအတိုင်း လွယ်ထားတဲ့ကျောပိုးအိတ်ကိုဖြုတ်ပြီး ဘေးဘက်ကခုံအလွတ်မှာတင် ၊ တစ်ရှူးတစ်ရွက်ကိုလှမ်းယူပြီး မျက်နှာအနှံ့ကိုလဲ မြန်မြန်ဆန်ဆန်သုတ်တယ် ။ လုပ်စရာရှိတာတွေကို သွက်သွက်လက်လက်လုပ်နေပေမဲ့ ကျွန်တော့်ကိုတော့ အခုထိစကားတစ်ခွန်းမပြောသေးဘူး ။ ထင်းက အဲဒီလိုမျိုးဥပေက္ခာပြုလေ ၊ ကျွန်တော်ကပိုပြီးအရောဝင်ချင်လေပဲ ။
" ထင်း "
" ပြောပါ "
ထင်းက ကျွန်တော့်ကိုစကားပြောရင် အခုလိုမျိုးသံပြတ်နဲ့ပဲပြောတတ်တယ် ။ ကျွန်တော့်ကိုမို့ အဲဒီလိုပြောလေသလား ၊ ဒါမှမဟုတ် ထင်းရဲ့ပြောဆိုပုံက ပုံမှန်ဆိုရင်ကော ဒီအတိုင်းပဲလားဆိုတာကို တော်တော်ကြီးသိချင်နေပါပြီ ။
" မနက်ကဘာစားခဲ့လဲ "
" ထမင်း "
" ဟင်...ထမင်းတစ်မျိုးတည်းလား "
ရင်ဘတ်ကိုဖိပြီး အလွန်အမင်းအံ့သြဟန်နဲ့ပြောလိုက်တော့ ထင်းက ကျွန်တော့်ကိုမျက်လုံးလှန်ကြည့်လာခဲ့တယ် ။ ထမင်းတစ်မျိုးတည်းစားလို့မရတာကို ကျွန်တော်သိတာပေါ့ ။ ထင်းနဲ့ စကားများများပြောချင်လို့ကို အကြောင်းရှာလိုက်တာပါ ။
" ကြက်သားနဲ့ "
" သြော်...တော်သေးတာပေါ့ ၊ ကိုယ်က ထင်း ထမင်းတစ်မျိုးတည်းစားလာတာလားဆိုပြီး စိတ်ပူသွားတာကွာ "
" . . . "
" တစ်ခုခုတော့သောက်နော် ၊ ကိုယ် ထင်းအတွက်ပါ အအေးမှာထားတယ် "
" ကျွန်တော် ရယ်ဒီမိတ်တွေ မသောက်ဘူး "
" ရယ်ဒီမိတ်မဟုတ်ပါဘူးကွာ ၊ အသီးအစစ်နဲ့ဖျော်ထားတဲ့ စပယ်ရှယ်အအေးပါ "
KAMU SEDANG MEMBACA
ထင်း (Ongoing)
Romansaပျော်စရာကောင်းတဲ့ အဖြစ်အပျက်တွေ မပါဝင်ပါ ေပ်ာ္စရာေကာင္းတဲ့ အျဖစ္အပ်က္ေတြ မပါဝငပါ 8/7/2023
