သူရဲကောင်းဆန်စွာသေဆုံးခြင်းစနစ်

ကင်းစောင်နှင့်သူ၏လမ်းပြလေး {2}

  စစ်ဆင်ရေးအတွက် တန်ဖိုးရှိတဲ့ သတင်းအချက်အလက်ကို ရခဲ့တာကြောင့် ကင်းစောင့်တပ်ရဲ့ ကယ်ဆယ်ရေး လုပ်ငန်းစဉ်က ချောချောမွေ့မွေ့ပဲ၊ သူတို့က အကြမ်းဖက်လက်နက်ကိုင်တွေ မခုခံခင်မှာပဲ အခြေအနေအရပ်ရပ်ကို ထိန်းချုပ်လိုက်နိုင်တယ်။ မူလဇာတ်ကြောင်းထဲမှာတော့ ဒီစစ်ဆင်ရေးက အကြမ်းဖက်သမားတွေကို အောင်မြင်စွာ နှိမ်နင်းနိုင်ခဲ့ပေမယ့် အသေအပျောက်များစွာ ဖြစ်ပေါ်စေခဲ့တယ်။ ဒါပေမယ့် ဒီအချိန်မှာတော့ အဆုံးအရှုံးတစ်စက်မရှိပဲ အောင်မြင်ပြီးမြောက်ခဲ့ကြတယ်။

ယိုးနစ် မြင့်မားတဲ့ ပလက်ဖောင်းပေါ်မှာ ရပ်နေပြီး ဆူညံနေတဲ့ လူအုပ်ကြီးကြားထဲကို စကင်န်ဖတ်ကာ သူ့ကို သတင်းပေးခဲ့တဲ့ လမ်းပြကို ရှာဖွေရန် ကြိုးပမ်းသော်လည်း ပတ်ဝန်းကျင်ရှိ ဆူညံသံများနှင့် မနှစ်မြို့ဖွယ် အနံ့အသက်များက ကင်းစောင့်တွေအတွက်တော့ သည်းမခံနိုင်စရာပဲ။ လမ်းပြက သူ့ရဲ့ ဝိဉာဉ်လမ်းညွှန်ကို ရည်ရွယ်ချက်ရှိရှိ ဖုံးကွယ်ထားမယ်ဆိုလျှင် ကင်းစောင့်အနေနဲ့ ခြေရာခံနိုင်ဖို့ ခက်ခဲလိမ့်မယ်။

“ဆရာ၊ စစ်ဆင်ရေး ပြီးမြောက်သွားပါပြီ။ အဖွဲ့ကို လူပြန်စုခိုင်းလိုက်ရမလား” ကင်းစောင့်တစ်ယောက် သူ့အနား ရောက်လာပြီး ညွှန်ကြားချက်ကို တောင်းဆိုလာတယ်။ ပတ်ဝန်းကျင်က စီစီညံညံအသံတွေကလည်း သူ့ကို စိတ်မသက်မသာဖြစ်နေစေတယ်။

“လူစုခိုင်းလိုက်”
ယိုးနစ် အချိန်အတော်ကြာအောင် လှည့်ပတ်ကြည့်ရှု စစ်ဆေးပေမယ့် သူရှာနေတဲ့ လူကို မတွေ့တဲ့အခါ ဒီနေရာမှာ ဆက်နေနေဖို့ ဆန္ဒမရှိတော့ဘူး။ အဲ့ဒီလူ Biyashi မှာ ရှိနေသ၍ သူရှာတွေ့နိုင်မှာပဲလေ။

သူ ခေါင်းကိုလှည့်လိုက်တာနဲ့ လူအုပ်ကြီးကြားထဲမှာ ကုန်တိုက်ထဲက လမ်းလျှောက်ထွက်လာတဲ့ ပုံရိပ်လေးတစ်ခုကို လှမ်းတွေ့လိုက်ရတယ်။ ယိုးနစ် အလျှင်အမြန် ရွှေ့လျားသွားလိုက်ပြီး အဲ့ဒီ့ လူအုပ်ကြီးဆီရောက်အောင် လွှားခနဲ ခုန်ကျော်လိုက်တယ်။ ဒါပေမယ့် အဲ့ဒီလူကို တွေ့ခဲ့တဲ့ ကုန်တိုက်နားရောက်တော့၊ သူ့ရဲ့ အရိပ်ယောင်တောင် မတွေ့ရတော့ဘူး။