أستاذنا | Our teacher

البارت 7

هلووو ~

أحب أشكر كل من ينتظر البارتات الجديدة بفارغ الصبر، لمن يقرأها، يعلق على سطورها، ويصوت لها بالإعجاب، شكرًا لكم جميعًا

أنتم سبب لاستمرار هذه الرواية ♡♡

أعتذر إذا فيه أخطاء إملائية ..

استمتعوا بقراءة هذا البارت اللطيف ~

-------

طلع من الغرفة متجهز للمدرسة وعلى كتفه شنطته ..

كان مستغرب هدوء ناصر خاصة انه ما سمع له حس وهو تعود عليه يصحى قبله ..

وصلته الإجابة أول ما طلع للصالة وشافه نايم في مكانه المعتاد واللابتوب على بطنه ..

قهقه بصوت خافت وهمس: باقي أسبوع على تسليم المهمة، ليش شاد حيله لهالدرجة ..!

قرب منه بعد ما ترك شنطته على الأرض، وسحب اللاب بهدوء من على بطنه يحطه على الطاولة ..

لكن حركته هذي قدر يحس فيها ناصر وصحته من النوم مستغرب ..

جلس بإرهاق وهو يحك شعره، عيونه شبه مفتوحة، وصوته مبحوح من النوم: كم الساعة ؟

راشد: ارجع نام واضح انك سهران وما نمت إلا من وقت قصير ..

ركز ناصر عليه وعقد حواجبه: متجهز؟

تكتف راشد: للمدرسة ..

تأفف ناصر وتوه بيقوم من مكانه لكن تفاجأ براشد يمسكه من أكتافه ويرجعه: قلت لك ارجع نام !

انزعج ناصر من حركته: ليش؟ تبيني أغيب ع الفاضي!

راشد: وش اللي ع الفاضي، ايش بتستفيد لما تروح المدرسة وتنام هناك؟

مو البيت أريح ؟

ناصر: وأنت وش بيضرك؟

رجع بيقوم مرة ثانية لكن انصدم براشد يدفعه بقوة لدرجة انه صار مستلقي على ظهره ..

سحب راشد البطانية ورماها عليه بحيث تغطيه: احمد ربك بحل عنك الواجبات وبشرح لك الدروس اللي ماراح تحضرها اليوم، ارجع اخمد لا تداوم ..

خذيت جوالي معاي اذا احتجت شي لا تتصل.. ارسل!

شال راشد شنطته وطلع من الملحق تارك ناصر بصدمته من إصراره على انه يغيب ..

قعد يحاول يفكر ويحلل تصرفه وليش تغيرت معاملته له فجأة ..

معقولة بسبب قهوة أمس؟ لا يكون القهوة فيها شي!