ليتني لم اكن

حاله طارئه

جلال بحزن: للأسف زي متوقعت، الكتف الشمال مخلوع خلع كامل و في كسر في ٣ ضلوع من القفص الصدري وكسر في الساق، للأسف علشان الكسور بقالها فتره فمش هتلتئم بشكل صح، لازم تدخل جراحي و كمان....في عندي شك أن العضم المكسور ضغط علي الأعصاب، و أنت يا حازم دكتور و عارف كويس يعني إيه، هي أن شاء الله تكون كويسه و حقيقي أنا آسف. لازم العمليه تتم في أقرب وقت ممكن لأن حالتها طارئه أوي و أي تأخير مش في صالحها، و كمان واضح أن نفسيتها سيئه لأبعد الحدود و هتبقي أسوأ مع العمليات كمان بسبب التعب و الإجهاد.
حازم بحزن علي إلي حصل للمسكينه دي: تمام يا جلال إعمل اللازم؛ و أنا معاها نفسيًا لحد متبقي كويسه، المهم تبدأ في إجراءات العمليه و تشوف هي مستعده أمتي.
جلال: أول متدفع فلوس العمليه للمستشفي هيكوني بإمكانا البدء علطول.
حازم: طب هي العمليه هتتكلف قد إيه؟؟
جلال: في حدود ٥٠ ألف.
حازم بصدمه بس حاول يبان طبيعي: تمام أن شاء الله هنتصرف و ندفعهم في أقرب وقت.
راح جلال يكمل شغله.
بص حازم لحسام و أحمد ها يا رجاله شخللوا جيوبكم كده و كل واحد يقب بالي معاه.
حسام بضيق من استزراف أخوه وهما في الموقف ده: يعني أنت عايز تقنعني أننا هنشخلل جيوبنا فنطلع ٥٠ ألف جنيه أنت عبيط و لا بتستعبط.
حازم: الاتنين و الله يا أخويا، يعم فك كده، يعني هو استعباطي ده  إلي هيوقف الكون، أنا بس بحاول ألطف الجو. خلينا نتكلم بجد بقي، أنا لسه قابض المرتب انهارده هما مش كتير ٥٠٠٠ جنيه بس فكده متبقي حوالي ٤٥ الف.
حسام: هلم فلوس الدروس هيكون معايا علي بكره ٥٠٠٠ زيهم وفي معايا ١٠ آلاف جنيه في البنك يبقي كده هيتبقي ٣٠ ألف.
أحمد: هبيع الآيفون بتاعي هيبقي في حدود ٢٠ ألف كده علشان ده أحدث حاجه.
حازم: حلو أوي كده اتبقي ١٠ آلاف.
حسام: أبوها ده مش هيرضي يسلفهملنا.
حازم: يسلفنا إيه أنت مش مشوفتش عمل إيه امبارح، ده مكلفش نفسه يتطمن عليها و لما اتصلنا عليه و عرفناه أنها كويسه و أن كل ده من قله الأكل قالك ده دلع علي الفاضي و اتضايق لما عرف أننا جبناها مستشفي خاصه و قالك أنا مش هدفع حاجه عايزين تعالجها أنتوا حرين ومشفناش وشه من ساعتها، ده بجد خساره فيه أنه يكون أب فعلا مش كل أب يعرف يبقي أب، و مش كل ذكر في البطاقه راجل في الحقيقه.
حسام بهمس: أهدي يا حازم مينفعش الكلام ده قدام أحمد.
حازم بأسف: معلش ماخدتش بالي و اتعصبت شويه، أنا آسف حقيقي يا أحمد بس أنا بردو مش غلطان في إلي قولته.
نغزه حسام و قاله بهمس: يا دبش، أنت جيت تكحلها عميتها يا فالح.
بعد أحمد عنهم و وقف عند باب أوضه ليا قرب منه حازم و قاله عايز تدخلها.
هز أحمد راسه بالموافقه.
حازم: طب أدخلها بس هي آخده منوم علشان جسمها ميوجعهاش اكتر فمتقلقش انها مش بتصحي و بلاش عياط هي هتبقي كويسه.
حضنه أحمد و قاله: شكراً أنكم واقفين جنبها، أنتوا عملتوا إلي أهلها معملهوش. ودخل لليا.
قرب حسام من حازم تعالي نروح نجيبله أكل ده مأكلش حاجه من امبارح.
حازم: يلا بينا. حسام تفتكر ال ١٠ آلاف الأخيره دي هنجيبها منين.
حسام بحيره: مش عارف ممكن نستلفهم من كوكي و أعتقد أنها مش هتتأخر علينا، مأنت عارف هي كانت بتحب ليا قد إيه.
حازم بإقناع: ممكن بردو
جابوا الأكل و رجعوا لأحمد، خبطوا علي باب الغرفه فقام أحمد فتحلهم
أحمد: اتفضلوا ادخلوا.
حسام: خد يا أحمد كل أي حاجه أنت مأكلتش من امبارح.
أحمد برفض: شكراً يا مستر بس حقيقي مش عايز آكل أي حاجه.
حازم بجديه: بس أنت لازم تاكل يا أحمد علشان متتعبش و بعدين لازم تروح تنام وترتاح أنت تعبان هنا من امبارح.
أحمد: أنا مش هسيب ليا.
حازم: متقلقش هنرجع تاني و هي كده كده مش هتفوق غير علي بكره.
وافق أحمد بعد إلحاح كبير من حسام و حازم و رجعوا البيت بعد موصي حازم الممرضه علي ليا و أنها تاخد بالها منها علشان لو فاقت و أداها رقمه علشان لو حصل أي حاجه ترن عليه.
دخل حسام و حازم شقتهم لقوا والدهم و والدتهم في انتظارهم.
كاميليا بلهفه: عملتوا إيه يا ولاد طمنوني إيه إلي حصل و ليا مالها، انا عايزه أفهم كل حاجه.
حازم بتعب شديد: معلش يا ماما أنا محتاج أرتاح، بقالي يومين مطبق و عندي بكره شغل بدري و مش هينفع مروحش كفايه انهارده  خلي بقي حسام يحكيلك. ودخل أوضته بسرعه قبل أما مامته تقول أي حاجه.
كاميليا بصت لحسام برفعه حاجب.
حسام: إيه متبصيليش كده، اقعدي و انا احكيلكم.
حكي ليها الحكايه كلها من أول إلي حصل لليا في اليوم المشؤوم لحد دخولها المستشفي.

كاميليا وهي بتمسح دموعها إلي خانتها: يعيني عليكي يا ليا، متبهدله يا حبيبتي من الست دي من و أنت صغيره.
ح

سام: بس هو في مشكله صغيره، ليا محتاجه عمليه بحوالي ٥٠ ألف جنيه إحنا معانا حالياً ٤٠ ألف منهم و لسه ١٠ آلاف مش عارفين نجيبهم منين.
كاميليا بسرعه دون تفكير: ...........
----------------------------------------------
نكمل البارت الجاي😂😂
⭐البارت الثامن خلص الحمد لله⭐
تتوقعوا كاميليا هتعارض أن ولادها يصرفوا علي عمليه ليا ولا هتساهم معاهم وتكملهم الفلوس؟؟🤔🤔
مستنيه آرائكم و توقعاتكم في الكونتس☺️
دمتم سالمين يا أحباء الزهره❤️