أحمد انت كنت نايم يا حبيبي ؟
= كنت نايم آه يا رائد، عايز حاجة يا حبيبي
_ لا يا حبيبي انا آسف، كمل نوم
= لا ما انا صحيت خلاص، كنت بترن ليه يا قلبي ؟
_ كنت عايز اتخانق معاك، لو فاضي
= يا حبيبي احنا مش لسه متخانقين يوم الاربع ؟
_ اخص عليك يا احمد، انت بتعد عليا الخناقات
= لأ يا روحي مبعدش ولا حاجة، يالا نبتدي ؟
_ طب بص انا مش عايز اكون ضاغطك، لو عندك شغل الصبح ممكن تنام ونأجل الخناق لأي يوم تاني
= لا يا حبيبي نتخانق دلوقتي عادي، عندك أفكار ؟
_ مش عارف، إديني جايد كدا
= اممممم، مبقيتش تهتم بيا زي زمان ؟
_ لأ زهقت منها
= طب قول اني اتغيرت معاك
_ مش عارف، بحس انك بتعرف ترد كويس في الحتة دي ومبعرفش ازنقك
= طب هقولك، الخناقة النهارده غيرة، قشطة ؟
_ حلو دا .. بس هغير من مين، دا انت قطعت علاقتك بكل الستات و الرجاله اللي في الدنيا و حته الاكونت بتاعك مسحته ومبقتش تتعامل مع بشر تقريبا
= اسألني على البنت اللي بتعملي لاڤ على كل صوري
_ أحمد مين الواطية اللي بتعملك لاڤ على كل صورك
= مخدتش بالي خالص، اسمها إيه ؟
_ مش عارف
= امرأة هزت عرش مصر
_ نادية الجندي
= لأ احنا مش بنلعب أفلام، هو الأكونت اسمه كدا، يالا قول
_ الواطية بتاعة الرجالة مسمية نفسها امرأة هزت عرش مصر عايزه تخطفك مني
= آه دي خالتي يا رائد
_ سوري يا احمد اني شتمتها، مكنتش اعرف انها خالتك
= لأ رائد احنا هنهرج، سوري إيه في نص الخناقة، من امتى بنعتذر واحنا بننكد
_ تمام، مين الواطية بنت الواطية أخت الواطية اللي عاملالك لاڤ
= لا احترم نفسك متزيطش
_ ما انا اندمجت
= طب اندمج من غير قلة أدب
_ حاضر
= خالتي يا رائد
_ يا سلام، وانا إيه اللي يضمني انها خالتك ؟
= افتح البروفايل بتاعها، هتلاقيه مليان صور ليا انا وولادها واحنا اطفال ومش لابسين بنطلونات
أنت تقرأ
One Shots
Romanceكل بارت قصة مختلفه تتحدث عما يدور بروحنا أمسك فؤادك فالقلوبُ مدائِنٌ ماكُلُّ من سكنَ الفؤادَ سيمكُثُ
